Khotbah Minggu 10 Januari 2021, Pujilah Kemulian Ras Kuasa Tuhan (Masmur 29  : 1 – 11)

Khotbah Minggu 10 Januari 2021, Pujilah Kemulian Ras Kuasa Tuhan (Masmur 29  : 1 – 11)

Invocatio   : Tapi nina Jesus man ajar-ajarNa e, “Engkai maka kam mbiar ? Kurang kal tuhu kinitekenndu !” Jenari keke Jesus, isergangiNa angin meter ras galumbang ndai. E maka enggo seh kal tenengna. (Matius 8 : 26).

Ogen         : Markus 1 : 4 – 11

Khotbah   : Masmur 29  : 1 – 11

Tema         : Pujilah Kemulian Ras Kuasa Tuhan


Perpulungen si kelengi Tuhan. Minggu enda eme Minggu 1 kenca Epiphanias ija Ephipanias ertina manifestasi, penampakan,  nerangi, teridahlah eme kerna kemulian ras kuasa Dibata.  Erpalasken 3 bagin Kata Dibata sijadi khotbah paksa enda ipetangkas – icidahken me kemulian ras kuasa Dibata e ija ibas invocatio Matius 8 : 26 e teridah arah patuhna angin meter ras galumbang si paksa e ngentam-ngentamken perahu siidatasi Jesus ras ajar-ajarNa i dano Galilea e man perentah Jesus gelahna teneng. Kenca isergang Jesus angin meter ras galumbang e, ngadi minter angin meter ras galumbang e mahanca dano e enggo seh kal tenengna. Enda banci jadi erkiteken dano Galilea epe Dibata sinjadikenca, IA empuna, lit iteruh kuasaNa. Emaka tunduk (patuh) dano e nangdangi perentahNa. Dano Galilea e cukup mbelin ija gedangna 21 Km dingen belangna 13 Km. I dano e banci rempet-rempet reh angin meter ras galumbang si merawa/mehantu, janah em si jadi tupung Jesus ras ajar-ajarNa erlayar alu perahu i dano e. Paksa e jelma si enterem termasuk ajar-ajar Jesus memahani maka angin meter ras galumbang jadi erkiteken roh-roh jahat sangana merawa ntah erkiteken Lewietan eme naga si takalna 7 si lit i dano e ngamuk. Alu ngadina angin meter ras galumbang e, ncidahken maka la saja dano e tapi sinasana si lit ibas dano epe lit iteruh kuasa ras kehendak Jesus. Ijem teridah kemulian ras kuasa Tuhanta e. Kai siibiarken manusia, kepeken la kai pe erjumpaken kuasa Jesus.

Perpulungen si mehamat, bagepe ibas ibas ogen Markus 1 : 4 – 11, kemulian ras kuasa Tuhan e teridah arah pengakun Johanes Peridiken kerna Jesus e ija iakui Johanes maka Jesus e ndauh lebih erkuasa ras mulia asangken ia seh maka mungkuk ngosari nali sepatuNa pe Johanes la metunggung. Padahal man jelma si enterem, Johanes sebage sekalak nabi, ia sekalak si mbelin ras mehaga si teridah arah kepatuhen kerina jelma i taneh Judea ras i kota Jerusalem reh ndahi ia gelahna iperidikenna. Kuasa ras kemulian Jesus si mbelin epe teridah arah kai siikataken Johanes maka adi ia mperidiken alu lau tapi Jesus e mperidiken alu Kesah si Badia. Janah kenca Jesus iperidiken (Jesus jine iperidiken banci erkiteken piga-piga alasen, eme : Alu e Jesus si la erdosa e mpersadaken diriNa ras manusia perdosa; IA si la erdosa enggo mulai nanggung dosa manusia siiteruskenNa seh ku kayu persilang; Jesus iperidiken labo erkiteken tanda jera, tapi dalanNa memasuki umat si mbaru si patuh man Dibata. Adi alu khotbah ras peridin Johanes terbentuk sada bangsa si bersih, la kel ate Jesus IA ringan i darat persadan e), talang langit janah Kesah Si Badia nusur ku babo Jesus bagi nderapati. Terbegi pe sora i Surga nari, “Kam kap AnakKu si Kukelengi, Kam kap si ngena ateKu”. Alu e Dibata jine ngakui ise kin Jesus e situhuna. Adi, kalak si mehaga ras mbelin jine enggo ngakui maka Jesus e mbelin, erkuasa ras mulia, maka tuhu me bage.

Seterusna perpulungen si ermeriah ukur ibas Tuhan, ibas Masmur 29 : 1 – 11 si biasana ipake ibas puncak wari raya Sapo-sapo ntah Pondok Daun, teridah pemasmur eme Daud nehken pendilo gelahna muji Tuhan erkiteken kemulian ras kuasaNa. Siidilo nehken pujin man Tuhan e eme si nasa nggeluh i surga emaka sikap ras carana, aslina bagi siiterjemahken ibas bahasa Indonesia eme, “Sujudlah kepada Tuhan dengan berhiaskan kekudusan” (ay. 2) sabab si ringan i surga e eme mahluk-makluk si eksistensi ras keberadanna seri ras keberadan surga e. Si man pujin e jine eme Tuhan si mulia ras si mada kuasa si meganjangna. Tuhan e tuhu-tuhu erkuasa emaka soraNa pe dem alu gegeh ras kuasa (ay. 3 – 4, 10) mahanca bagi isenaken ibas invocatio angin meter ras galumbang pe minter ngadi njadiken dano Galilea e teneng kal. Sora Tuhan sidem kuasa e mahanca sinasana la lit si ertahan emaka batang-batang kayu penggelen (ay. 5), deleng Libanon lompat-lompat desken anak lembu ras deleng Hermon mengkat-engkat desken anak banteng (ay. 6), kilap erkinar (ay. 7), taneh mesawang mugur-ugur ras gurun Kades mundu-undu (ay. 8), ngugur batang kayu kerangen erbahanca bulung-bulung nartaren (ay. 9a). Erkiteken sie kerina, bangsa Tuhan si lit ibas Rumah Dibata ersurak “Permuliakenlah Dibata” (ay. 9b).

Kerina enda banci jadi erkiteken bagi isenaken ibas nats enda, sora Tuhan e lit 7 kali ibelasken eme ibas ayat 3, 4, 5, 7, 8, 9 tanda kuh, lengkap, sempurna (bdk. tupung Dibata nepa si nasa lit ibas Kejadin 1 : 1 – 31 ija 7 kali Dibata ngataken maka siijadikenNa tuhu-tuhu mehuli) erkiteken angka 7 e rehna ibas angka 3 + 4 (3 eme sorgawi eme Dibata Bapa, Anak ras Kesah si Badia ntah Trinitas janah 4 e eme duniawi. Angka 7 e ertina surga ras doni ipersada, bdk Ketangkasen 21 : 1 – 8).

Nats enda ngingetken kita maka Tuhan banci ncidahken kuasa ras kemulianNa arah fenomena alam. Banci jadi pandemi Covid 19 enda dalan Tuhan nginget kita gelahna ngubah perilaku ras cara geluhta ija kidekah enda lit deba kalak enggo dekahen i darat rumah subuk erkiteken sibukna dahinna ntah pe terjeng kongkouw-kongkouw (pulung-pulung) ras temanna meriah asangken pulung ras anak jabuna i rumahna, tabehen iakap kalak man i warung, restoran, rsd asangken i rumah. Sitik-sitik lit kalak mesegu kal lawes ku mall gia terjeng dalan-dalan ntah cuci mata. Megati iban kalak alasenna la sempat ngikuti kebaktin Minggu, PJJ, PA, rsd erkiteken sibukna dahinna, sangana i luar kota ntah lenga dung dahinna. Pandemi Covid 19 enda mahanca arus kita buen i rumahta. Ntah e kin dalan Dibata pedeher mulihi hubungenta ras anak jabunta ? Pebue waktunta erkebaktin ras anak jabunta ? Menikmati kebersamanta ras anak jabunta ?

Peringeten Natal si enggo lakoken kita ibas bulan Desember tahun 2020 si lewat mahanca reh tangkasna sieteh ras sigejapken maka Tuhanta e mulia, erkuasa ras perkeleng. Emaka patut kal kita tetap muji IA alu mpeteruk dirinta rikut nggeluh ibas kebadian sabab kita eme kalak si enggo ibersihkenNa ibas dosanta nari. Alu bage sinanami me tetap dame ras keriahen ukur bas geluhta.


Pdt. Eben Eser Depari, M.Th

(GBKP Rg. Sp. Selayang)

____Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba