Malam Natal, 24 Desember 2020, Sinalsal Si Erkinar (Jesaya 9:1-6)

Malam Natal, 24 Desember 2020, Sinalsal Si Erkinar (Jesaya 9:1-6)

Invocatio   : Ipupusna pagi sekalak anak dilaki janah arus ibahanndu gelarNa Jesus sabab IA me pagi sinebusi bangsaNa ibas dosa-dosa nari. (Mat.1:21)

Ogen       : Titus 2:11-15 (T)

Kotbah   : Jesaya 9:1-6

Tema      : Sinalsal Si Erkinar


Ibas malam natal enda, siperingeti me wari ketubuhen Tuhannta Yesus Kristus. Kerehen Dibata ku doni enda ibas diri Jesus Kristus lako maba dame ras keriahen man doni enda (Joh.3:16). Ketubuhen Jesus nerangi si gelap, segelah asa si ngaloken terang e nggeluh me. Kai kin gelap e? si gelap e me kerina perbahanen manusia si la ngena ate Dibata. Adi nulih kita ku bas tahun enda, seh kal Buena perbahanen si gelap jadi, bagi kejahaten sosial (judi, narkoba, peperangen, pembunuhen, pinangko, rsd). Tempa-tempa kerina kejadin erdalan bagi semalna saja, si jahat enggo hal si biasa. Si enda kerina mpeturah persoalen ngenca, piah dungna manusia lanai meteh apai si benar, apai lang. situasi enda me siikataken gelap, janah arah malam Natal enda ate Dibata reh ndahi kita alu maba terang ntah sinalsal si erkinar.

Bahan Kotbah ta eme bagin Proto Jesaya si nuriken kerna pengharapen kerna kerehen Mesias. Mesias siituriken Jesaya enda eme sekalak anak dilaki si tubuh arah kesusuren Daud nari si merentah alu kebenaren ras kebujuren si maba kedamen man kerina bangsaNa (ay.6). bagin kitab enda rehna erkiteken situasi bangsa Dibata tupung e nggeluh ibas kegelapen. Kegelapen siituriken Jesaya teridah ibas bindu 5:8-29 kerna ukumen si bereken Dibata man Israel (melala kata “cilaka”). Pemimpin lanai mikirken rayatna, si terang isalihkenna jadi gelap, si pagit isalihken jadi entebu, nggeluh ate-atena saja. Bage gambaren kerna kegelapen siituriken Jesaya maka reh rawa Dibata man bangsaNa alu nabansa. Nggeluh ibas tabanen labo senang, nggeluh rate mesui, enda si erbahansa turah pengharapen kerna kerehen Mesias si mulahi bangsa e pagin. Bangsa si nggeluh bas kegelapen enggo ngidah sinalsal si erkinar (ay.2), janah keriahen si mbelin e bali ras kalak si ermeriah ukur tupung paksa peranin tah pe asum mbagi-mabagiken barang rampasen (ay.3). Ertina ijenda kegelapen ndai nggo bene erkiteken sinalsal si erkinar ndai janah maba kemalemen ate desken kalak si rani, dem lumbungna. Keriahen Israel e sebab lit pengharapenna Mesias si tubuh e desken sekalak Raja si mimpin rayatna alu kebenaren ras kebujuren (ay.7). lang ngenca sie, Mesias e merupaken penampat si meganjangna, Dibata si Mada Kuasa, Bapa si rasa lalap, Raja Dame. Gambaren Mesias siipadanken Dibata man manusia gelah pulah ibas kegelapen nari janah anak e pe pagi sinebusi bangsaNa ibas dosa-dosa nari (Invocatio).

Ketubuhen Jesus maba terang man banta janah terang e nggo reh man banta kerina manusia. Sienda ilakoken Dibata erkiteken lias ateNa guna nelamatken manusia (ogen ay.11). Lias ate ntah keleng ate Dibata singajari kita gelah nadingken kegeluhen si la ngena ate Dibata ras sura-sura doni gelah nggeluh sikuasai dirinta, bujur dingen si sembah Dibata alu biak kegeluhennta i doni enda. Sinalsal e nggo erkinar emaka “medakken mata si pentang kerna kebenaren” sebab ibahanNa kita jadi sikerajangenNa, jadi bangsa si bersih, si mesikel erbahan si mehuli. Erkiteken lias ate Tuhan kita ertanggung jawab pegara Yesus bas pusuhta segelah kegelapen italuken.

Bahan Kotbah ras Ogen merupaken dua teks singerana kerna topik si seri tapi arah sisi si berbeda. Ibas Yesaya ijelasken uga kerina janji ras pengharapen nandangi Mesias si reh sebage penampat man manusia janah kitab Titus ngerana labo ngenca penampat si terjeng pengharapen ngenca tapi lit lias ate. Lias ate sinialoken manusia isedari maka keterkelinen e gratis ras arus irespon alu perbahanen sinisuraken ulu Sinalsal e. nggo kita ngataken bujur man Dibata si nggo melepasken kita bas kegelapen nari?

Ibas malam natal enda, lit nge kedamen, sinalsal e erkinar bas pusuhta?  Kita enggo terdaya erkiteken dosanta , kai dage siarus si lakoken gelah banci kita terkelin? Enda labo erkiteken kebeluhen ras kepentarennta tapi enda erkiteken lias ate Dibata si ngasup mulahi kita. IA me sinampati kita ras simperdameken kita ras Dibata seh maka ukumen e pe isalihkenna jadi keterkelinen. Malam natal enda iajuk kita gelah kita ngaloken Sinalsal si erkinar e. Ibas kita ngaloken Yesus e, nggeluh bas gelap e geluhta pe dem sinalsal Kristus. Tandana kita ngaloken Yesus tubuh selaku Raja ras ulu sinalasal mari dage siterangi senina ntah pe turangta si tading bas gelap. Ibas kita ngerayaken wari ketubuhen Tuhanta Yesus si enggo engkelini kita, kita arus encidahken biak geluh kalak si berkualitas, baik ibas sikap, perukuren, pengerana, bagepe pengkebet perbahanennta.  Selamat ngerenungken malam natal ras mperingeti wari ketubuhen Tuhan Yesus. Pediatlah Sinalsal e Erkinar bas geluhta….


Pdt. Rita Armenia Br Ginting, S.Th

(GBKP Rg. Namorambe)

__Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba