KHOTBAH NATAL II, 26 DESEMBER 2020, Jesus Kap Singkelini Manusia (Johanes 3:14-21)

KHOTBAH NATAL II, 26 DESEMBER 2020, Jesus Kap Singkelini Manusia (Johanes 3:14-21)

Invocatio          : “Tuhan Si Erdolat reh alu kinimbisanNa, lako jadi raja si dem alu kuasa. Nehenlah, radu ras kerehenNa, ibabaNa upah man bangsaNa”(Jesaya 40:10)

Ogen               : Galati 4:4-7

Kotbah            : Johanes 3:14-21

Tema               : Jesus Kap Singkelini Manusia


Engkai maka kita arus muji Tuhan? Selain kita sebage tinepa, muji  Tuhan sebage pengataken bujur sebab  enggo ibereken Dibata keselamaten, keterkelinen arah pengorbahen Tuhan Yesus Kristus. Kinitekenta man Yesus si enggo mereken erbage-bage penampat ibas kegeluhen mabai kita tetap setia ernalem man baNa. Ibas Dampar sideban pe secara aspek pengalamen rohani sigejapken nge tuhu adi ersembah kita man Tuhan, lit perasaan Dame, tenang, terkawal siakap kegeluhenta. Bicara gulut ukur, mbiar, turah aru ate  adi sisembah ras mindo penampat kita baNa lit siakap pertenengna ras megegeh kita, tentu enda termasuk ulih penemani Tuhan kita sierbansa malem ateta muji IA. Tentu muji Tuhan la terjeng arah biber ras sora saja, termasuk arah pengkebet geluhta pe ilumbaken tetap kita mpermuliaken Tuhan.

Prikopta eme percakapen Nikodemus ras Yesus. Nikodemus eme sekalak pemimpin agama kalak Yahudi ras ia kalak parisi bahken ia I juluki pengajar Israel ( ay 10). Ibas sada berngi, Ia reh ndahi Yesus  alu nungkun nina : “O guru, ieteh kami maka Kam me guru si isuruh Dibata. Sabab ise pe labo ngasup erbahan tanda-tanda sengget bagi siibahanNdu, adi la kin Dibata ras ia”. Nikodemus reh man Yesus ibas berngi, mungkin enda ilakokenna gelah ula ieteh jelma sienterem. Tapi ibas sisi sideban teridah maka Nikodemus secara terbuka reh man Yesus amin pe Yesus ianggapna sebagai “guru”. Bagi Nikodemus tanda-tanda sengget sini bahan Yesus e ncidahken maka Yesus e lebihen asang Yohanes. Ras tanda-tanda Mujizat sibahan Yesus e mungkin sebagai tanda kerajaan Dibata secara politik. Tapi Yesus njababsa alu mereken pengertin simbaru man Nikodemus tentang kerajaan Dibata. Nina Yesus “ise pe labo ngejapken Dibata rajana adi labo ia tubuh pedua kaliken”. Megi perkataan Yesus Niodemus balik nungkun “banci kin kalak mbelin tubuh pedua kaliken ?”. Emaka guna njabab Nikodemus ibas ay 5-8 Yesus ngataken maka sibanci bengket kubas kerajaan Dibata eme kalak situbuh ibas lau ras dingen kesah Dibata. Ras ikataken Yesus maka manusia tubuh ibas orang tua nari tubuh secara daging tapi ibas kesah ia tubuh secara pertendin. Alu e ngatakenca maka Nikodemus (kerina kalak) si atena bengket kubas kerajaan Allah harus dilahirkan kembali secara pertendin.  Yesus negaskenca maka kalak sibengket kubas kerajaan Dibata labo cukup erkiteken ia kesusuren kalak Jahudi tapi pe harus iubah secara pertendin. Bage pe iterangken Tuhan Jesus  kerna uga kin kegeluhen kalak sitek man Dibata  e labo terjeng ibas pengakun saja tapi harus ngelakoken kegeluhen situhu-tuhu (ayat 14-15) si la erkerin-kerin, simehuli e labo ersung-sung, labo ibas erpaksa-paksa tapi ngelakoken simehuli harus rasa lalap janah la erkeri-kerin, sebab Dibata pe labo pernah keri keleng ateNa man manusia uga gia nggo melketna kegeluhenta tetap nge terus iberekenNa keleng ate guna merubahen kita meteh dosa ras jera ibas dosanta nari. Sada dampar keleng ateNa alu mereken anakNa si tonggal eme Jesus e (ayat 16) gelah kita la bene, tentu enda pengorbanen siluar biasa sebab labo lit pengorbanen silebih hebat asangken sekalak singgit mate mereken kesahna man kalak sideban. Tapi amin bage gia mgati denga kalak langa bo nggit ngaloken keleng ate Tuhan e, megati kita la ngataken bujur ibas kai sienggo iberekenNa man banta, megati denga meriah siakap nggeluh ibas kegelapen. Apaika man kalak sijahat labo ngena ateNa terang Kristus e, sebab mbiar ia teridah kejahatenna (bnd ayat20). Arah kai situriken Tuhan Yesus man Nikodemus kedungenna tek ia, emaka reh nge ia ndahi terang e dingen tek nandangi Jesus e. Emaka ibas ogen iterangken tanda anak-anak Dibata singgo ngaloken Jesus e, ibereken Dibata Kesah Si Badia guna ngajari kita erlebuh ersembah man baNa, janah lanai kita nggeluh iperbudak kejahaten dosa tapi kita nggo menang janah ngaloken kerina kiniulin ibas geluh enda.

Adi sinen kubas kinata kegeluhenta secara norma umum ibas masyarakat, kai nge ulihna kita ngelakoken kebujuren? Pasti ulihna pe kebujuren, gia lit ka ibas piga-piga kasus labo e hasilna. Bage pe sebalikna adi silakoken la mehuli pasti ulihna pe datken hukumen. Adi secara norma masyarakat pe bage hasilna apaika ilebe-lebe Tuhan. Tapi amin gia nggo eteh kita adi ngelakoken sibujur e hasilna pe simehuli sialoken ibas temanta manusia bage pe ibas Tuhan nari, ngakai maka mbue denga siidah kalak ngelakoken si la bujur? Jawaben si rusur sibegi uga makana mbue denga kalak ngelakoken si labujur e erkiteken mesera ndahikenca nina, mbue tantanganna ras membutuhken pengorbanen terkadang nina. Tapi si la bujur e la erbanca rugi bahkan banci memuasken sura-sura dagingna amin gia ngerugiken kalak ntah pe dirina sendiri. Nikodemus selaku guru pengajar ras pemimpin agama reh ndahi Yesus. Sebab lit ketedehenna guna ngangkai kai siibegina ras siidahna ibahan Yesus. Adi senen kerna kubas kegeluhenta uga nge ketedehen ukurta guna banci ngangkai kerna pengajaren-pengajaren Yesus. Lit dengan nge waktuta guna mpelajarisa ras ngerenungkenca ? Nikodemus memang tujuanna guna ngangkai kai sibegina ras iidahna tapi justru kenca ia jumpa ras Yesus ia mendapatkan pemahaman yang baru silabo terpikirkenca sebelumna. Jadi kitape ibas perjumpanta secara pribadi ras Tuhan akan memberikan pemahaman simbaru ibas geluhta, mpehuli biak-biak silanga payo ibas kita.


 Pdt. Jeri Karlo Tarigan, S.Th

(GBKP Rg. Tangkahen)

___Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba