Khotbah Minggu 27 Desember 2020, Langit ras doni Muji Tuhan (Masmur 148 : 1 – 14) (

Invocatio      : “Sebab kerina sinasa lit Dibata njadikenca, janah kerina e lit erkiteken IA dingen man gunaNa. Terpujilah Dibata seh rasa lalap. Amin “ (Roma 11 : 36)

Ogen              :  Jesaya 61 : 10 – 62 : 3   (Tunggal)

Khotbah        :  Masmur 148 : 1 – 14  (Responsoria)

Tema              :  “Langit ras doni Muji Tuhan”

1. Kata Perlebe

Selaku manusia tentu siakui maka lit nge keterbatasen gegeh ras kengasupenta ibas ndalani geluhta. Labo kerina dingen labo kai pe banci ilakoken manusia ibas geluhna. Terutama makeken wari-wari si ibereken Dibata man manusia. Megati kal wari-wari si idalani e labo ipergunaken alu mehuli terlebih-lebih guna naksiken kerna kemulian ras kekelengen Dibata. Justru si terjadi manusia megati makeken wari-wari siaturna jadi kesempaten nuduhken si mehuli, kedungenna terbuang alu sia-sia. Tentu sie me si perlu irenungken ibas wari enda, kuga makeken kesempaten si ibereken Dibata ibas geluhta segelah kesempaten e banci si pakeken encidahken kiniulin Dibata bas doni enda.

1. Isi Teks

Masmur 148 eme salah sada masmur siisina nehken puji-pujin man Dibata. Sie banci siidah maka ibas kerina Masmur 148 enda, isina kerna pujin man Tuhan Dibata. Janah pujin e isehken kerina tinepa Dibata si lit ibas doni enda (bnd. Ay.7), termasuk pe manusia salah sada bagin tinepa Dibata (ay. 11-14). Masmur enda iperkiraken rehna ibas masa / periode kenca pembuangen. Sie teridah arah isina, maka lit keterkaiten ras masmur-masmur  “Tuhan Raja” (Masmur 96-98; bnd. 103:20-22 ; 104 ; 19 ras 29 ;  uga kuasa Tuhan merentah ibas kerina tinepaNya ay. 5-6; 11-14). Ibas situasi si bage rupana maka pendilo enda eme pujin man Tuhan sebage respon ibas pembebasen si isehken Dibata man bangsaNa, si enggo mereken keselamaten ras kemenangen. Palas pujin bangsa e teridah ibas ermeriah ukur, ngerayaken kuasa Dibata ibas kerina tinepaNa bage pe mbangun mulihi ergiah ukur guna muji Dibata kenca mulih i pembuangen nari.

Tole pe ibas bahan khotbahta enda iajuk segelah manusia muji Dibata ibas geluhna. Kondisi enda tentu berkaiten erat ras situasi bangsa Israel si paksa sie enggo pulah ibas masa pembuangen nari. Emaka tuhu-tuhu ia nehken puji-pujinna man Dibata, dingen ngataken bujur man Tuhan ibas kerina situasi kegeluhen si enggo ibentasina. Ungkapen ‘kerina jelma’ nuriken maka setiap elemen manusia aruslah ngataken bujur man Dibata. Subuk ia sibiak raja, penguasa-penguasa ras kerina bangsa-bangsa, bage pe anak perana singuda-nguda, orang tua ras anak-anak arus muji gelar Dibata ibas geluhna. Lalit perbedaan penguasa ras rakyat, lalit perbedaan usia tua ntah nguda. Tapi muji Dibata e merupaken pendilo Dibata (panggilan Tuhan) man kerina tinepaNa.

Terdauhen isingetken pemasmur maka kerina tinepa arus muji gelar Tuhan, erkiteken gelarNa ganjangen asangken kerina gelar, janah kemulianNa ganjangen asangken doni ras langit (ay. 13). Ertina maka enggo seharusna Dibata ipujiken ibas doni enda, sabab ibas hakekatna kai pe labo ngasup nandingi kuasa Dibata si mbelin e. Jadi keharusen muji Dibata e turah erkiteken enggo isaksiken kuga belinna, ras kuga muliana Dibata e itengah-tengah  kegeluhen manusia. Termasuk pe Dibata erkuasa nge ibas kegeluhen manusia ras tinepaNa si deban.

Adi ikaitken ras bahan invocationta, teridah pergumulen pikiren Paulus si ngejapken maka kerina si la terpahami ras la terantusi manusia ibas kegeluhen enda, banci salih jadi pujin si turah arah pusuh peratenta erpalasken kekelengen Dibata. Dibata mereken perukuren man manusia, emaka tugas manusia eme rukur seh ku batas kengasupen manusia ngukurisa. Lit batas-batas si la terukuri manusia ras e hanya banci ialoken alu nehken pujin man Dibata sijadiken kerinana. Paulus ngidah maka mbue hal si terjadi ibas kegeluhen enda si la terantusi ras si la terdungi manusia rikutken gegeh, kebeluhen, ras kepentarenna. Perukuren manusia la ngasup ngatusi perukuren Dibata. Emaka si perlu ibas kalak si erkiniteken eme muji ras mpemuliaken Dibata  si mada kerinana alu ngataken jadilah sura-suraNdu ibas geluhku.

Ogenta pe nuriken berita keriahen ras pembebasen siinubuatken Nabi Yesaya kerna :

• Jerusalem, anak kuta Sion, si enggo igenepi ibas Jesus Kristus. Janah IA reh maba keselamaten ras kemenangen man bangsaNa.
• Dibata engkelini bangsaNa, alu maba kebebasen man kalak si tertaban, majekken mulihi bangsa e (memulihkan harga diri umat yang selama ini dilecehkan oleh bangsa lain), janah kinirajanNa pe maba dame.

Palas bangsa e ibas ngaloken berita keriahen ras pembebasen eme ermeriah ukur, ersurak muji Tuhan erkiteken igejapkenna uga perbahanen Dibata si mbelin  siisehken man bana. Gambaren perbahanen Dibata si mbelin e, si inanami Jerusalem eme desken penganten si make paken si sehkel jilena bageme Tuhan nguisi aku alu keselamaten ras kemenangen (ay. 10). Bage pe pujin ras keriahen ukur bangsa e, encidahken sada keyakinen si pasti nandangi perbahanen Dibata maka la banci lang IA engkelini bangsaNa (ay. 11).

• Pengkenaina

Arah Minggu kenca Natal enda, teridah maka Jesus nggo tubuh man banta. IA sinemani perdalanen kegeluhennta. Alu bage reh tangkasna buah kinitekennta man Dibata, janah kuasa Dibata simbelin, sila tersibari kita, sila terukuri kita arus min teridah arah kegeluhennta, bage pe pujinta man Dibata  e  sicidahken ibas kesetianta man baNa.

Selaku  tinepa Dibata, kita enggo ngidah kuasa ras keleng ate Dibata erdahin ibas geluhta, enda tentu jadi buah kesaksin man banta, maka labo erngadi-ngadi Dibata njagai dingen engkawali ibas geluhta.

Muji ras mpemuliaken gelar Tuhan eme bagin ras pendilo kubas kegeluhennta selaku kalak si erkiniteken, la terjeng geluhta, tapi pe man kerina tinepaNa, langit ras doni muji Tuhan. Palasna ibas pendilo enda eme erkiteken Tuhan si erkuasa ibas kegeluhennta.

Alu bage kai silit ibas kita, siinanami kita ras siilakoken kita e ibas Dibata nari rehna ras e kerina guna kemulianNa. Labo lit kengasupenta erbahan kai pe adi la kin Tuhan si mere gegeh man banta. Ibas kesadaren si bagenda rupa maka situhuna kai pe silakoken kita arus nge sipertanggungjawabken kerinana man Dibata.

Pdt. Christmas P. Ginting, M. Th, MH

(GBKP Rg. Griya Rumah Tengah)

___Klasis Medan Namorambe____