KHOTBAH MINGGU 20 DESEMBER 2020, Advent IV, Tuhan Kap Ras Kam (2 Samuel 7:1-16)

Invocatio        : “Kerna IA me katangku asum ningku, pudin Ia reh asa aku, tapi belinen IA asa aku, sebab ope denga aku tubuh pe IA enggo lit” (Joh. 1:30).

Ogen               : Roma 16:25-27 (Antiponal)

Kotbah           : 2 Samuel 7:1-16 (Tunggal)

Tema              : Tuhan Kap Ras Kam

Kerina si terjadi ibas geluhta subuk derbih, sendah ras pagin apai pe kita manusia lalit si metehsa. Hanya rencana ngenca banci si rencanaken, tapi keputusen guna banci tercapai rencanata e hanya Tuhan si metehsa ras mengijinkenca e maka banci terjadi. Dibata si nepa doni ras isina, wari-wari si man bentasenta la terlepas ibas kuasa Dibata. Emaka man baNa ngenca kita arus erpengendes. Janah sada hal si penting ndalani kegeluhen ras Tuhan la aru ateta sebab Tuhan kap ras kita.  Sebab lit Dibata jadi pengarapenta si lebih meteh kerna si mehuli si enggo irancangNa nandangi kegeluhenta.  Bagi siialami Raja Daud, ersura-sura ia mbangun ingan guna peti perpadanen. Tapi itulak Dibata sura-surana erkiteken lit terbelinen sura-sura Dibata nandangi Raja Daud eme arah kesusurenna reh me si mimpin kerajanna seh rasa lalap.

Ibas bahan kotbahta ituriken kerna tenah si ibaba nabi Natan man Raja Daud. Ija pada awalna Raja Daud ersura-sura guna mbangun ingan peti perpadanen si ibawa ibas tanah pembuangen nari. Erkiteken lenga lit inganna sementara i tamaken i rumah Obet Edom (sekalak si asalna i kuta Gat nari), kenca si e ibuat ka peti perpadanen e jenari isimpan i bas sada kemah. Sura-sura Raja Daud cukup mehuli peti perpadanen e inganna ibas rumah pertoton. Emaka Raja Daud ersura-sura guna mbangun mulihi rumah pertoton si enggo runtuh e, gelah banci jadi ingan peti perpadanen. Janah igejapkenna maka Tuhan enggo masu-masu geluhna. Tupung Raja Daud enggo ringan ibas istanana erkiteken Tuhan ngkawali ia ibas kerina musuh-musuhna nari. La metunggung iakapna ia tading ibas istana sedangken peti perpadanen e isimpan ibas sada kemah (2 Sam 7:1-2). Tapi kai si jadi sura-sura Daud la i kehendaki Tuhan. Isuruh Dibata arah nabi Natan guna pebetehken sura-sura Dibata. maka labo Daud si mbangun rumah man inganku (Janah e labo jadi sada tuntuten Dibata selama enda (ayat 4-7)).

Ibas sura-sura siipeseh Dibata man Daud, teridah enggo Dibata  ngerancang geluh Daud ras kesusurenna. Ibas ayat 8-16 ituriken kerna rancangen Dibata man bana seh man kesusurenna eme :

1. Ipilih Daud jadi Raja guna bangsa Israel (ija Daud iangkat arah sekalak permakan biri-biri).
2. Dibata tetap nemani Daud kujapape ia lawes. Ras naluken kerina musuh-musuhna.
3. Ibahan Dibata ia terberita bali ras pemimpin-pemimpin i doni enda.
4. Dibata ngkawali bangsa pilihenna alu mereken negri inganna tading.
5. Dibata mereken kesusurenna man Daud ras njadiken sekalak ibas anakna si dilaki jadi Raja ras njadiken kerajanna tetap paguh(kesusurenna e eme Raja Salomo; ia me pagi si majekken rumah pertoton e (Bdk. I Raj. 4:5)).
6. Dibata e erpadan maka Ia jadi Bapa man anakna e, mperlakuken ia sebagai anak, ngukum ia di kune salah, tapi padan dibata tetap amin kai pe si jadi nandangi kesusurn Daud. bagepe Dibata erpadan kesusurenna e la erpeltep-peltep ras kerajaanna tetap rasa lalap bagepe kuasana tetap rasa lalap.

Kai siibahan Dibata man Daud jadi sada persinget man banta maka. Nai nari Dibata enggo ngaturken kegeluhenta alu kuasaNa. Sada hal si penting siperlu siimani guna jadi penjemba nandangi kegeluhenta maka Tuhan tetap ras kita bagi temata. Bagepe rancangen-rancangen Dibatata e pasti rancangen si mehuli man banta. Bagi tertulis ibas kitab Jeremia 29:11 “Aku ngenca meteh sura-surangku nandangi kam, eme gelah kam senang labo gelah kam cilaka. Rencanaku eme mereken wari si pepagi bagi siirapkendu”. Jadi si perlu silakoken tetap kita ndalani kegeluhenta alu erpengarapen man Dibata ras ndahiken dahin si enggo ipercayaken Dibata man banta alu dem ketutusen. Tuhan enggonetapken kai harus silakoken janah seh ija harus si lakoken sesuai ras gegeh si ibereken Dibata man banta. Emaka ula aru ateta ndahiken ras ndalani kegeluhen enda sebab Tuhan kap ras kita. Emaka ula kita kecewa atau menyalahkan Tuhan adi lenga tersehi kai sinisuraken kita e. Sebab siilakoken kita e labo sura-sura manusia tapi sura-sura Tuhan. Bagi ende-enden Pujin si erjudul “Waktu Tuhan Pasti Yang Terbaik”. Janah ibas kita ngelakoken rancangen Dibata la terlepas ibas kuasa Tuhan emaka kerina kemulian guna Tuhan (Puji-pujin si meganjangna guna Tuhan). Bagi siilakoken Johanes Pridiken alu meteruk ukur ia ngaloken dahin e, amin ia reh leben asangken Jesus Kristus, amin ia si mpridiken Jesus tapi tetap alu meteruk ukur ia ngerana janah tetap Jesus e ipeganjangna. Bagepe Rasul Paulus ibas ia jadi perberita si meriah tetap isehkenna pujin si meganjangna man Dibata (invocatio ras ogen). Emaka tetap sidalani geluhta alu ndalanken sura-sura Dibata alu dem kiniteruken ukur ras kerina geluhta si pergunaken guna mpeganjangken gelar Dibata. khususna ibas minggu Advent pe IV ken enda tetap kita semangat ras erpengarapen sebab Tuhan kap ras kita.

Pdt. Merry P. Sitepu, S.Th

(GBKP Rg. Rampah)

____Klasis Medan Namorambe____