Khotbah Minggu Advent II, 06 Desember 2020, Keterkelinen Kalak Si Tutus (Masmur 85:9-14)

Invocatio     : “Dage man banta, nterem kap saksi si ngkeleweti kita. Emaka si aguilah kerina si ngambati ibas perdalanenta, bageepe dosa e si lalap ncerawisi kita. Tutuslah ateta ngikuti perlumban si lit ilebe-lebenta” (Heb.12:1)

Ogen           :Markus 1:1-8

Khotbah      :Masmur 85:9-14

Tema           :Keterkelinen Kalak Si Tutus

Apai kita si pernah erkadiola (Ind.menyesal)? Tentu rata-rata kita pernah nggejapken penyesalen, subuk e erkawiten ras pendahin, pelayanen ras pe masalah jabu. Penyesalen banci jadi turah erkiteken kesalahen si ilakoken kita ntah pe salah menempatken kepercayaan man sesekalak jelma, janah tinadingna erban kita la nyaman. Emakana lit kalimat humor singataken maka “namanya penyesalan pasti selalu datang terlambat, karena kalau di awal itu namanya DP” alu kata sideban perlu kel kita hati-hati ope erban sada keputusen gelahna ola turah penyesalen, bagi si inanami bangsa Israel si paksana terpuruk erkiteken dosana iadep-adepen Dibata. Penyesalen bangsa e teridah arah Masmur anak-anak Korah si jadi palas khotbahta.

Tupung si e anak-anak Korah, eme kesusuren suku Lewi, nehken pertoton guna bangsa Israel gelah ibaba Tuhan min mulih, ipegeluh mulihi jenari mindo gelah min icidahken Tuhan keleng ateNa si tetap nandangi bangsa e (ay.5-8), ertina ia mindo gelah bangsa e ipulihken Tuhan. Teridah ije lit penyesalen, jenari igejapna maka kepeken la lit si ngasup memulihken keadaan bangsa e adi la kin Tuhan Dibata. Tapi sedar ia maka pemindon e arus kang iumputi sada aksi, kai e? Bas palas khotbahta enda isehken pengajaren man bangsa Israel, gelahna atan ipulihken maka arus min ia lebe megiken kata Tuhan dingen nadingken dosa-dosana (ay.9) sebab Tuhan enggo ersikap ngkelini kalak si tutus. Alu kata sideban pemindon arus kang iumputi alu usaha (kewajiben), segelahna ibegiken Tuhan pemindon e. Adi kegeluhen bangsa e nggo tuhu-tuhu encidahken keleng ate, tutus, dame sada ras sidebanna bagepe erban keadilen, ije me kesangapen ibereken Tuhan seh maka sampur asil jumana. Bageme gambaren pemulihen ibas Dibata nari, la terjeng mereken ulih si mehuli ibas hubungen Dibata ras bangsaNa tapi pe mabai dampak si mehuli ka nge nandangi asil jumana. Eme sabapna maka Masmur enda isehken anak-anak Korah guna jadi persinget man bangsana. Bali bagi berita si isehken Johanes Peridiken arah ogennta.

Johanes Peridiken emekap penggenapen nubuat Dibata si isehken nabi Jesaya (Jes.40:3). Ia me si mbuka dalan guna kerehen Mesias. Johanes Peridiken dahinna emekap mpeseh berita ibas Dibata nari jenari iperidikenna kalak ibas gelar Tuhan alu lau. Nina Johanes “Jeralah, maka kam iperidiken, gelah dosa-dosandu ialemi Dibata” (ay.4c). Tandana sekalak jelma ‘jera’ eme iperidiken, sebagai simbol kininggiten nadingken dosa. Jenari ikatakenna maka nandangi reh me sekalak si lebih erkuasa asangken ia, si mperidiken alu Kesah Si Badia, eme si eteh kita alu gelar Kristus Jesus.

Minggu enda eme Minggu Advent si peduaken, kita iajuk gelah tetap ertima dingen pe mpekena diri guna ngalo-ngalo kerehen Kristus si peduakaliken ku doni enda. Janah bas minggu enda pe kita isingetken arah Kata Dibata si seh man banta, segelah tetap ngergaken keleng ate Tuhan ras pe nggeluh ibas kebenaren, sabab adi lang sinanami me kai si inanami bangsa Israel, nggeluh bas keterpuruken erkiteken itadingken Tuhan jenari turah penyesalen. Tema-ta eme “Keterkelinen Kalak si Tutus” tek kita maka arah ketutusennta ngerembakken diri ku Tuhan, ngelakoken kebenaren, keadilen ras kekelengen erbahan kita tetap atan njemak padan Dibata guna ngaloken keterkelinen. Tentu ibas si e, iperluken proses desken perdalanen, megati lit si ngambati (invocatio), tapi tetaplah tutus sebab Tuhan enggo ersikap ngkelini kalak si tutus (Msm.85:10).

Pdt.Elisabeth R. G

(GBKP Gedung Jodor)

___Klasis Medan Namorambe_____