Kerina Lit Alasenna (Jesaya 53:4a)

Kerina Lit Alasenna (Jesaya 53:4a)

“Tapi situhuna ia nge si maba kiniseranta, ia nge simersan si mesuinta” (Jesaya 53:4a)


 


Lit sada cerita kerna sekalak anak si nguda-nguda denga, kundul ibas bangku perkuliahen. Ibas acara wisudana, waktu si dem keriahen ibas ia namatken sekolahna, iundangna me nandena tapi la banci ikut bapana. Alasenna mela akapna ndatken bapa si la erpengidah. Mela akapna iuru-uru teman-temanna kari ia. Ngidah sikap sibage tangis teriluh nandena. Nina nandena: “nakku, jujur me aku genduari man bandu, situhuna matandu ena mata bapandu nakku. La kam erpengidah kitik-kitik nari. Ibereken bapandu matana duana segelah kam banci erpengidah anakku.” Minter tangis teriluh anakna ndai dingen mindo ampun ibas sikapna selama enda man bapana.

Ibas renungenta sekalenda ituriken alu rolih-olih kata “tapi” seh 6 kali. Ertina kai siterjadi enda lit kerina alasenna. Labo kerina penatap mata jadi penggurun. Kerina lit penjelasenna. Secara medoni Mesias e la lit daya tarik jasmani tah pe kehagan si man baban ku tengah. Em adi penatap manusia. Beda kange e adi penatap Dibata. Kai siibahan Tuhan e tuhu pelin-pelin guna kiniulin manusia. Alu kai si ni alamina e situhuna segelah kerina jelma ialemi, ibenarken, itebus, ras ipepalem. Kai si ni alamiNa e labo perban kesalahenNa tapi dosa kerina jelma i babaNa seh mate segelah manusia terkelin. Si meteh kerna perbahanen Jesus e pasti tek dingen ngaloken ia jadi juruselamatna.

Sebage pelajaren dingen perenungen man banta kerina segelah ula pedas mereken kesimpulen tah pe menghakimi kalak sideban. Si nehenlah uga Tuhan merangkai kai siterjadi e jadi alatna guna mereken kiniulin man kerina jelma. Kerina lit alasenna ras penjelasenna. Erlajarlah kita alu cara Tuhan maka si idah Dibata tetap erdahin ibas kerina keciba geluhta.

Pertoton          : Ajari kami ngasup ngidah perbahanenNdu e Tuhan. Amin.

Pokok Pikiren  :  Ula pedas menghakimi tapi tataplah alu penatap Tuhan.


Pdt. Daud Sembiring

(GBKP Rg. Namorambe)

___Klasis Medan Namorambe___

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba