Latihan Iman (Heber 6:10)
“Dibata bujur nge. Labo pagi ilupakenNa dahin si enggo idahikenndu e. IingetNa nge keleng atendu nandangi Ia, si icidahkenndu arah nampati teman-temanndu kalak Kristen, subuk si enggo idalankenndu bage pe si paksana idalankenndu” (Heber 6:10)
Percakapen anak ras bapana.
Anak : “O Pak, keleng denga nge Tuhan e man banta? Kita enggo nutus ku gereja, ertoto, pelayanen, rsd. Engkai maka lalap lit masalah bas kita, misalna masalah keuangen, kesehaten, rsd. Lenga dung sada reh ka sidebanna. Tah enggo me ilupaken Tuhan kita e ateku?
Bapa : “Kusungkun kam lebe nakku. Kam me sekolah denga, biasana adi sanga ujian kenaiken kelas e, guru hadir tah lang bas kelas? Ngerani ia tah mereken soal ujian guna ikerjaken murid?”
Anak : “E hadirlah pak. Dung berekenna soal ujian kundul ia janahna ngawasi kami. Adi sanga ngajar maka ia ngeranai.”
Bapa : “Genduari pe bage nakku. Enggo melala kita erlajar arah Kata DIbata, ertoto, muji Tuhan. Janah genduari lit ujian iman, apakah Tuhan la hadir sanga kita ngalaken ujian e? Inget Tuhan la pernah nadingken kita gia kentisik. La lit persoalen si galang si la terdungi Tuhan tapi la ka lit persoalen sikitik kal pe ilupaken Tuhan. Tuhan tetap erdahin ibas setiap situasi guna mereken kiniulin man kalak sierkemalangen man baNa. Tujunna segelah kita naik kelas. Tandana naik kelas eme reh dewasana, reh megegehna kiniteken ras pertendinta. Lit nina pedah kalak pentar; Iman yang hebat dapat memindahkan gunung batu, tapi tetap beriman saat gunung batu itu tidak berpindah adalah iman yang sejati. Ate Tuhan kinitekenta e seh ku tingkat iman sejati labo iman hebat.”
Si jadi perenungen man banta eme tetap erbahan simehuli kai gia jadi sebab “Dibata bujur nge. Labo pagi ilupakenNa dahin sienggo idahikenndu. IingetNa nge keleng atendu nandangi IA…..” (Heber 6:10)”
Pertoto : Ajarilah kami tetap erbahan simehuli Tuhan. Amin
Pokok Pikiren : Tuhan la pernah nadingken kita gia kentisik.
Pdt. Daud Sembiring
(GBKP Rg. Namorambe)
___Klasis Medan Namorambe____
Leave a Reply