Bulat Ukur (Ulangen 10:12)

“Genduari o, bangsa Israel, bagikenlah kai siituntut Tuhan Dibatandu man bandu; sembahlah Tuhan, dahikenlah kerina si perentahkenNa. Kelengilah Ia, dahilah dahinNa alu bulat ukurndu” (Ulangen 10:12).

Ula sungkun uga mbelinna keleng ate Tuhan man banta sebab kitik nari nge siakap man banta iadep-adepenNa. Abu taneh si la ernilai ndatken erga i mata Tuhan, budak dosa ndatken kebebasen guna nggeluh i lebe-lebe Tuhan, kebutuhen nggeluh icukupken guna nerusken kegeluhen i doni enda rsd. Akap kami enda enggo cukup ncidahken keleng ate Tuhan e man banta. La lit ipindo Tuhan simulihna man banta seakatan “Kelengi IA alu bulat ukur.” Kai pe terjadi baik susah tah senang, keleng ate sierbahanca kita tetap ikut Tuhan. Guna mpeteguhi tuntuten enda, rolih-olih Tuhan mpersingeti kita gelah ula lupa erdalan ibas keleng ate e. Dikune enggo luar jalur erkiniteken maka mulihlah ku dalan sipinter. Asal e lanai lit ibas bangsaNa e maka kai siibahanna ciga ate Tuhan, hambar kualitasna, mberat ka ndalanken perentah Tuhan e ibas geluhna.

Lit dua pelajaren sibuat arah tuntuten Tuhan enda; Pertama, Nina Tuhan “genduari”, labo mbarenda tah pagi. Adi nggo lewat lanai terulihi, adi sipagi labo terjamini. Mengubah situasi ras waktu sitepat mengubah masa lalu ras masa depan eme genduari. Engkelengi e arus beluh make kesempaten. Peduaken, Ngkelengi e nggeluh ras dinamis labo formal ras kaku. Beribadah, ndahiken pelayanen, ertoto labo berarti ia engkelengi Tuhan alu bulat ukur sebab banci saja perayakenna medoni denga tapi kalak singkelengi Tuhan e pasti ermetedeh ate ersembah, meriah ndahiken pelayanen, erkemalangen ertoto man Tuhan.

Pertoton          : Pengasup kami ngkelengi Tuhan alu bulat ukur.

Pokok Pikiren  : Ngkelengi Tuhan alu bulat ukur e maba keriahen ibas kerina kondisi kegeluhenta.

Pdt. Daud Sembiring

(GBKP Rg. Namorambe)

____Klasis Medan Namorambe____