Tnjukkanlah Kasihmu (Johanes 14:24)

“Kalak si la ngkelengi Aku, labo ikutkenna katangKu. Kata si ibegindu labo katangKu tapi rehna ibas Bapa si nuruh Aku e nari” (Johanes 14:24)

Aktif ibas aktifitas gereja la jaminen lebih erkiniteken. Rende ende-enden rohani labo njadiken lebih rohani, artis beda iman pe beluh ngendekenca. Beluh ertoto labo patoken lebih badia. Tiap minggu ku gereja la jaminen ukurna ras lagu langkahna bersih. Empat contoh enda banci nge ilakoken kalak si labo tek man Tuhan Jesus sebab perbahanenna tempa-tempa rohani padahal perayakenna medoni denga. La kin bias denga kai siibahanna (aktif, ertoto, rende, ras ku gereja) e ncidahken kiniteken ras keleng ateta man Tuhan Jesus?

Njawab penungkunen idatas ndai, akap kami perlu silurusken pemahamenta kerna engkelengi Tuhan e seh ija. Pertama, seh kal riahna siakap ndalanken Kata Dibata gia e la sendalanen bagi sura-sura dagingta. La siakap beban berat ngikutkenca, rikut ras tetap ermetedeh ate siakap lalap megi ras ngorati kebenaren Kata Tuhan. Peduaken, litna hubungen si sehat, akrab ras komunikasi intim. Uga ningen keleng adi labo merincuh ercakap-cakap, bertukar pikiran ras Tuhan. Hubungen si sehat e teridah arah komunikasi dua arah labo saja soranta ngenca ateta ibegiken. Peteluken, megegeh ras tetap ngataken bujur man Tuhan arah susah senangna kegeluhenta sebab sieteh maka Dibata merancang simehuli man banta. Peempatken, nggeluh dem kekelengen. Tanda ngkelengi Tuhan e arusna ngasup ngkelengi keluarga, teman bahken imbangta e. Mberat tapi arus. Cidahkenlah keleng ate e. Adi siempat enda enggo lit ibas kita maka keleng ateta man Tuhan lanai iraguken nari.

Pertoton                      : Tuhan pengasup kami ngkelengi Kam ibas erkiniteken.

Pokok Pikiren              : Keleng ate e labo saja teridah arah aktifna kita pelayanen tapi uga hubungenta ras Tuhan siaktif.

Pdt. Daud Sembiring

(GBKP Rg. Namorambe)

___Klasis Medan Namorambe____