Syarat Tingkat Tinggi (Masmur 96:7)

“Sembahlah Tuhan alu make paken si badia, o doni kerina, dahilah IA alu gentar.” (Masmur 96:7)

Isi Masmur enda kalimat perintah labo sebatas pengajuk. Perintahna pertama jelas e me “sembah”. Sembah berarti mpeteruk bana, merendahken diri i lebe-lebe sinepa ia. Tinepa sirukur e ietehna ise ia ras ise Tuhan e. Perintah peduaken e me ersikaplah, pesikap banalah adi reh man Tuhan. Pake paken sibadia ras dahilah alu dem kehamaten ras kinimbiaren. Labo saja pusuh tapi daging kula pe arus ersikap.

Masmur enda turahna ibas konteks kegiaten ibas Rumah Pertoton. Ersembah man gana-gana (ayat 5) arus berbeda ras cara ersembah man Tuhan (ayat 9). Penembahen man Tuhan arus teridah arah pusuh sidem kinihamaten, kebiaren ras pusuh siermeteh ate. Kenibadiaan nggeluh pe arus tetap iperjuangken, make paken sibadia. Kualitas geluhna arus teridah sentudu ras sura-sura Dibata.

Geluhta e pemere Tuhan simbelinna man banta manusia, tapi uga kita makeken kegeluhenta e jadikenlah ibadahta man Tuhan. Memang keterkelinen e cuma-cuma ibereken Dibata man banta erkelang-kelangken Yesus Kristus ibas kayu persilang tapi ngikut Tuhan e arus bayar harga eme persang kayu persilang ras nimbak sura-sura daging. Karunia Tuhan e gratis sialoken kita tapi mpergunakenca la cukup cakap manis. Tempa cakap rohani tapi pendalanken rohana. Ngerana kerna surga perayaken medoni. Em ia melala denga kepe siman pekenan adi ersembah man Tuhan. Ngaloken perkuah atena e la man galaren tapi nggeluh peraten Tuhan e perlu syarat tingkat tinggi. Dem kehamaten man Tuhan, njaga kebadiaan ibas geluhta ras ncidahken keleng ate man Tuhan ras tinepa sideban. Amin.

Pertoton            : Pengasup kami ersembah Tuhan. Amin.

Pokok Pikiren  : Ngaloken keterkelinen e tanpa syarat tapi ikut Tuhan e bayar harga, persan silang.

Pdt. Daud Sembiring

(GBKP Rg. Namorambe)

___Klasis Medan Namorambe____