Bijak Menyalahkan (Matius 7:1)

“Ola salahindu kalak sideban, gelah kam pe la salahi Dibata.” (Matius 7:1)

“Ola salahindu kalak sideban, gelah kam pe la salahi Dibata.” Em Kata Dibata ngerana ibas kesempaten enda. Adi bage perlu dengan kin kita ningetken salah kalak? Akap kami, perlu tapi pentarlah kita nalahken janah tutup celah Iblis ambil kesempaten erdahin tapi Tuhan erkuasa. Nalahken siikuasai keleng ate atau segat ate. Nalah guna mpekena reh jilena labo ncedaken dingen meneken. Guna sie jadilah pentar ibas nalahken/menghakimi.

Sekalak filsuf nampati kita kerna sienda, gelarna Jean Paul Satre, nina, “Penilaian anda akan menghakimi anda dan mendefenisikan anda.” Ibas menghakimi e arahna sala saja man kalak sideban tapi pe man kalak simelasken cakapna. Ibas mereken penilaian e ncidahken ise kita, baik pemetehta, moralta, kinitekenta, karakterta rsd. Ujian terberat labo soal nalahken kalak tapi saat katanta e teridah arah kualitas geluhta. Biasana lebih gampang nalahken kalak si segat ate asangken sikeleng ateta. Meriah memang si akap nalahken kalak gia mungkin kebenarenta e perlu denga iuji mulihi baik data ras faktana. Ibas nalahken kalak e arus min sieteh alasen ras sudut pandang ibas salahna e. Ula min sempat ibas kita nalahken kalak, kita enggo mbenarken si salah dingen nalahken sibenar. Pentarlah kerna sienda.

La lit manusia si la pernah erbahan kesalahen. Perban sie ula gampang nalahken kesalahen kalak. Sebab ope lenga nalahken, perlu kita rukur, “pantas nge aku nalahken ia?” Ngidah sie nampati kal perkatan William Shakespeare, nina, “Bersabarlah untuk menghakimi karena kita semua adalah orang berdosa.” Reh buena kita ngerana, reh melalana celah kita ipersalahken. Reh buena kita nalahken kalak reh galangna kesempaten kita ipersalahken. Ibas kita nalahken kalak, tutuplah celah Iblis erdahin. Perbaiki diri, kelengi teman, litbatken Tuhan. Amin.

Pertoto            : Ajar kami pentar rukur ras erbelas Tuhan. Amin.

Pokok Pikiren  :  Bersabarlah untuk menghakimi karena kita semua adalah orang berdosa

Pdt. Daud Sembiring

(GBKP Rg. Namorambe)

____Klasis Medan Namorambe____