Simbelinna (Matius 11:11)

“Ingetlah Johanes Peridiken kap simbelinna ibas kerina manusia si nggo pernah nggeluh. Tapi si kitikna i bas Kinirajan Surga belinen asangken Johanes Peridiken” (Matius 11:11)

Bicara isungkun kita secara pribadi, kai nge ninta ikataken sekalak “si mbelin”. Postur badankah? Jabatenkah? Popularitaskah? Melala banci sibereken jababna. Ibas konteks kita sekali enda, Jesus nuriken maka Johanes Peridiken e sekalak simbelin. Jesus kuakap labo sembarangen mujiken sekalak jelma. Bahken Kaisar Roma pe la pernah ipujiken Jesus perban kehebaten pemerintahenna. Enda sekalak si sangana ipenjaraken ikataken Jesus kalak simbelin. Bas kai kin maka ikataken Jesus ia sekalak simbelin?

Jesus nuriken Johanes Peridiken kalak si mbelin. Ia mbelin teridah ibas cara nggeluhna  sederhana. Perayakenna lanai medoni, sesaat tapi labo berarti nadingken urusen doni. Tugasna tetap maba pertobaten ras mperidiken. Ambah sie Johanes Peridiken selaku kalak sienggo iurapi Tuhan la ndarami popularitas pribadi, tapi tetap menyuaraken alu lantang suara kenabiaan, kritiken man si la payo gia penjara jadi gancihna. Tah lanai ikutken kala kia. Tapi sada hal siteridah kal ibas ia e me la nggit kompromi ras dosa. Integritasna, spiritualitasna tetap ijagana ibas ngaloken pendilo Tuhan e. Ia labo tading ibas zona aman tapi zona iman.

Kenca mujiken Johanes Peridiken, ialihkenNa cakapna alu mengangkat topik Kinirajan Dibata. Jadi lanai soal ise simbelinna ibas sada misi pelayanen, pendahin, jabaten sebab parayaken kerna Kinirajan Dibata e ndauh lebih penting, genting asangken kerinana. Kehadiren Johanes Peridiken enggo mbuka dalan mentas Juruselamat e bengket ku doni enda, bengket ras ndalani dalan simaba keterkelinen. Adi misina enggo seh maka ia undur diri ras mpetandaken Jesus e Mesias dingen Juruselamat. Sekalak simbelin ietehna ndigan ia tampil ras ndigan ia arus menarik diri arah jelma sinterem. La ia syndrome power.

Pertoton                      : Ajar kami tetap ernalem man baNdu Tuhan.

Pokok Pikiren              : Sekalak simbelin ietehna ndigan ia tampil ras ndigan ia arus menarik diri arah jelma sinterem

Pertoton safaat           :  Korupsi ibas Indonesia enda.

Pdt. Daud Sembiring

(GBKP Rg. Namorambe)

____Klasis Medan Namorambe_____