PEKAN KEBAKTIN KELUARGA WARI KE II // Ersembah Ibas Jabu

Invocatio         : Tupung aku tayang i das ingan medemku, ku inget Kam; gedang-gedang         berngi rukur aku kerna Kam (Msm.63:7).

Ogen               : Heber 10 : 19-25

Khotbah          : Daniel 6 : 1-10

Tema               : Ersembah Ibas Jabu

Kata Dibata ibas pekan kebaktin keluarga sipeduaken enda ibabai kita ngenen kegeluhen Daniel ibas kepatuhenna ersembah man Tuhan Dibata ibas kerina dampar geluhna. Terlebih-lebih ibas lit perbeben simesangat bas geluhna. Isekin Daniel? Daniel eme sekalak tawanan perang si ikut i tangkap Nebukadnezar radu ras kalak Jahudi sideban eme kalak Jahudi ibas golongan bangsawan siiangkut ku Babel guna i didik ras i pekerjaken ibas pemerintahen. Daniel erdahin iteruh pemerintahen Raja Nebukadnezar, Belsazar, ras Darius ibas tahun 605-536 SM. Ibas cakap Ibrani, gelar Daniel artina Tuhan kap Pembelaku atau Tuhanlah Hakimku. Daniel iangkat jadi Gubernur ibas kerajaan Babel janah pendahinna ulin asangken wakil-wakil raja sideban bagepe asangken gubernur-gubernur e.

Ibas Daniel pasal 6 enda menam seri ras Daniel pasal 3, ija duana pasal enda nuriken kerna litna sada kiniseran si ialami kalak Jahudi ibas mempertahanken kinitekenna man Tuhan Dibata si isembahna. Ibas Daniel pasal 6 ituriken  maka Daniel ndatken sada kiniseran/ancamen labo erkiteken ia kalak Jahudi ras beragama Jahudi saja,  tapi erkiteken litna kecemburuan (cian ate) ibas wakil-wakil raja ras dua pejabat tinggi kerajaan. Ibas latar belakang kecemburuan enda me i pakena   ketutusen Daniel ersembah (kinitekenna e)  guna erbahan  ia menderita dingen ndabuh ibas jabaten e nari. Kalak enda ngajuk Darius selaku raja tupung si e guna erbahan sada undang-undang si bertentangen ras kiniteken kalak Jahudi (Daniel) si labo mungkin i patuhina. Si menarik ijenda eme kerna kalak si memusuhi Daniel,  ibas carana guna ndabuhken  Daniel e labo  ia ndarami  titik lemah Daniel , tapi ndabuhken Daniel  arah gegehna (titik kekuatannya) eme hubungenna ras Dibata siselket. Kai si iyakini Daniel man Tuhan Dibata eme erbanca  labo ia gentar tupung ialokenna pe surat ibas perintah kerna ise si la nembah man raja maka i tamaken ku gua singa. Daniel la mbiar tapi tetap njaga integritas rohanina (ayat 10) ija Daniel terus ertoto man Dibata 3 kali 1 wari bagi si biasa ilakoken kalak Jahudi. Kai si yakini Daniel encidahken maka ia sekalak si tuhu-tuhu banci encidahken buah kinitekenna arah pendahin si mehuli seh maka ngena pe ate raja man bana.  Ija ia erdahin alu payo ras dem tanggung jawab dingen terteki ibas kai-kai pe. Tupung lit ancaman man bana kinitekenna tetap tertuju man Dibata ,iendeskenna kerina persoalan geluhna janah Daniel tek maka Tuhan si mbela sa, Tuhan si iteki Daniel e ngasup encidahken keadilen itengah-tengah litna ketidakadilen.

Erlajar arah Daniel, tupung lit ibas kesuliten, tekanan, entah pe erbage-bage perbeben si mberat biasana mabai kita murah kel ngelupaken Tuhan, sebab matanta hanya tertuju ku bas belinna masalah e labo nari man Tuhan. Emaka si man usihenta bagi si ilakoken Daniel ibas masa-masa sulit tetap ernalem man Tuhan ija tupung pejabat-pejabat tinggi pemerintahen Darius rusaha ndarami alasen guna menuduh ntah pe nalahken Daniel alu mindo gelah raja mpedarat surat lako ngelarang kerina kalak nembah Tuhan, dewa, ntah pe manusia si deban kecuali man raja ngenca, ise si ngelanggar i ambekken ke gua singa tapi Daniel la surut erkiniteken tetap i sembahna Tuhan Dibatana amin terancam kedudukenna bage pe kesahna. Sabab man Daniel, Dibata saja si patut isembah. Tetap ukurna sebab itandaina Tuhan si sembahna e ngasup mbela ia. Kesetiaan Daniel ertoto enda pe jadi usihenta kuga Daniel la ngkurangi waktuna ras Tuhan Dibata alu tetap ndalanken kebiasaan ertoto bagi si lakoken kalak Jahudi umumna (jam 9, jam 12, ras jam 3 karaben). Eme kepeken erbanca ia tetap megegeh la sitik pe gentar tupung menghadapi ancamen ibas aturen si ipedarat kerajaan Babel.

Ibas kebaktin pekan keluarga enda mabai kita mengevaluasi kuga kegeluhen penembahenta man Tuhan i tengah-tengah masa pandemi COVID-19 si rusur sikataken masa-masa sulit. Kuga nge kegeluhen penembahenta baik secara pribadi, jabu-jabu, tetap nge kita ertoto, tetap nge kita ngoge kata Dibata, si litken nge denga jam-jam doa nta? Entah banci jadi masa-masa sulit enda sijadiken alasen maka lanai kita tutus sa ersembah man Tuhan. Kesusahen geluh si jadiken alasen la kita tek nari nandangi kuasa Tuhan si ngasup nampati kita. Kuga kegeluhen jabunta ibas ersembah man Tuhan terlebih ibas masa pandemi enda lenga kita banci ersembah man Tuhan i gedung gereja bagi biasana, e ka si ban jadi alasen tempa-tempa nggo kita lupa ersembah man Tuhan i rumahta sekalak-sekalak. Siakap maun i gedung gereja ngenca kita banci ersembah man Tuhan, emaka i rumahta la ka siban penembahenta man Tuhan ,padahal Tuhan si sembah kita e, Tuhan si labo teriket ku bas sada ingan, ija    nari pe banci Ia i sembah. Si penting kuga ketedehenta tetap banci jumpa ras Tuhan arah penembahen si ibahan kita. Gelah ula la kita  ersembah man Tuhan, bagi siilakoken perpulengen bas kitab “heber “erkiteken nterem singgo nadingken perpulungen guna ersembah man Tuhan ibas beratna kiniseran kalak Kristen masa sie. Tapi kita tetaplah si bahan penembahenta man Tuhan,sebab ibas kita tutus ersembah man Tuhan ije me kita ergegeh ibas ngalaken erbage-bage perbeben geluh ras tetap ngasup ngataken bujur ibas siugapa na pe.

Pdt  Agustina Br Peranginangin STh, MPsi.

(GBKP Rg. Kemenangan Tani)

____Klasis Medan Namorambe____