Pekan Kebaktin Keluarga Wari ke-V // Jabu Si Tetap Erdahin (Perbahanen Rasul-Rasul 18 : 1-4) // Pdt. Christmas P. Ginting, M.Th, MH

Invocatio        : “Terpaksa igegehindu erdahin alu curcur panasndu, gelah taneh enda banci mereken asil man bandu, seh mulih ka kam ku taneh, sebab ibas taneh nari kam ijadiken (Kej.3:19a)

Ogen               :  Kuan-kuanen 10 : 3 – 5   

Khotbah         :  Perbahanen Rasul-Rasul 18 : 1 – 4  

Tema              :  “Jabu si tetap erdahin”

1. Kata Perlebe

Erdahin eme tugas ras pendilo siisehken Dibata man manusia. Alu bage manusia arus erdahin, la erpilihen dahinna, ertina labo lit dahin e mehaga ras la mehaga. Amin bage gia manusia jine si erbahan sukat-sukat dahin si mehaga ras la mehaga. Arah erdahin me ilengkapi ras ikuhi keperlun kegeluhen manusia (Kejadin 3:17-19 / sue ras Invocationta ras pe Ibas Kejadin 2 :15). Manusia la banci mekisat, ngada-ngada  saja dahinna (kuan-kuanen 22 : 13, 26 : 13). Tapi asa waktu ras kesempaten si lit arus ipakeken manusia alu mehuli. Sabab arah pendahin siilakoken kita (manusia) ngasup guna ncukupken keperlun jabunta si teptep wari, bage pe ngataken bujur man baNa ibas ulih pendahinta e (umpamana  nggalari guna keperlun sekolah / perkuliahen anak-anakta, nggalari tagihen listrik, telepon, nggalari perpuluhen, nehken persembahen pengataken bujur man Dibata ras sidebanna). Tentuna arah kita ngelakoken pendahinta labo banci mulus-mulus saja bage pe silakoken e ibas proses waktu sicukup panjang guna banci kita seh kubas ‘karier’ ntah pe keduduken pendahinta sicukup bergengsi rikutken kacamata doni. Arah pekan kebaktin keluarga ibas wari / berngi sipelimaken enda mari radu ras kita ngerenungken Kata Dibata bagepe diskusiken alu mbages gelah pendahin siilakoken kita e tetap mpemuliaken Dibata bage pe la mengganggu kubas kiniersadanta ibas jabu bage pe bas perpulungen.

1. Isi Teks

Ibas nats khotbahta enda ituriken, maka sekitar tahun 49 Masehi, Kaisar Klaudius mpelawes kerina kalak Jahudi i Roma nari. Erkiteken Akuila ras ndeharana Persila  kalak Jahudi, ia sada jabu pe arus lawes nadingken kuta Pontus, berkat ia ku Korinti. Sebagai jabu simbaru tandang ku korinti ibas menaken ras ndalani kegeluhen labo banci kundul-kundul saja, arus erdahin guna ncukupken keperlun geluhna. Gia jabu Akuila ras Persila iperhadapken kubas lingkungan ras situasi simbaru, jabuna erdahin mbuka peluang usaha eme erban tenda. Janah Arah dahin si ilakokenna erbahan tenda, la atena membebani ise pe guna ngelitken keperlunna (1 Tesalonika 2:9), tapi idahikenna e alu meriah ukur janah dem pengataken bujur man Tuhan. Bage pe Iaturken Tuhan, maka jabu Akuila ras Persila jadi ingan kesilang Paulus si reh i Aten nari. Perjumpanna e dungna jadi perjumpan persadan kiniteken bas Jesus Kristus, jenari jadi sada aron ‘patner’ guna erberita si meriah. dingen jadi teman si ihamati Paulus. Labo man jabu Akuila ras Persila saja Paulus ngajar, ia pe ngerana ibas rumah pertoton, iajarina kalak Jahudi ras kalak Junani gelah tek man Jesus.

Emaka arah nats Khotbahta sendah, lit sidat piga-piga hal si mehuli ibas pengalamen Paulus, Akuila ras Persila eme:

1. Keputusan Paulus maka ia mpeseh Berita Si Meriah anem gia lit kebiaren, sabab rutang akapna bana guna banci mpeseh Berita Si Meriah e.
2. Arah jabu Akuila ras Persila siidah uga jabu si ras-ras erdahin, jabu si ras-ras ermeriah ukur ngalo-ngalo kalak si kesilang dingen tading irumahna.
3. Aminna gia pindah i Italia nari ku Korinti ras lit gangguan man bana, Akuila ras Persila tetap ndahiken dahinna alu tutus. Sabab ibas kegeluhen / tradisi kalak Jahudi erdahin eme sada si mulia emaka nina:”cintailah kerja”, yang tidak mengajarken satu ketrampilan kepada anak laki-lakinya, berarti mengajarnya untuk merampok”.
4. Keluarga Akuila erdahin guna ncukupken keperlun geluhna, labo ngeranai janah kundul-kundul saja ngenca.
5. Pengalamen Paulus bage pe Akuila ras Persila, adi dahin idahiken alu tutus ibas erkemalangen man Dibata pasti rulih. Sabab sieteh maka sipemena siibereken Dibata man manusia eme tugas ntah erdahin (mengusahaken dan memelihara taman). Ertina kai pe dahinta dahiken alu tutus, erguna man kalak sideban ras jadi kemulian man Dibata (Sue ras invocationta)

Bage pe ibas ogenta pe Kuan-kuanen 10:3-5 isingetken  man banta kerna: “Kalak si mejingkat / bujur ras kalak Perkisat”, janah ibas nats enda ijelasken maka kalak bujur la ipelepas Tuhan kelihen, kalak mejingkat kebayaken jadi ulihna dingen kalak pentar rani kap ibas paksana. Simpar tuhu ulih pendahinna arah pemere Tuhan emaka banci isampatina kalak si deban. Sebalikna  isingetken arah nats enda, maka sura-sura kalak jahat la ipebentas  Tuhan, kalak malas jadi musil dingen man kemelanken adi lit kalak tunduh tupung paksa peranin. Geluhna jadi sinanggel man kalak sideban.

Arah teluna nats Pekan keluarganta sendah banci sisimpulken alu sementara eme kalak si tetap erdahin alu  tutus aminna melala tantangen sinihadapi,  janah erkemalangen man Tuhan maka kai siidahiken maba kiniulin bas geluh jabu bage pe  kalak si deban.

• Pengkenaina

Tema pekan kebaktin keluarga wari/berngi pelimaken enda eme ‘jabu si tetap erdahin’, ertina erdahin alu tutus la ipengaruhi situasi ras inganta tading. Sabab tujun tetap erdahin ibas kerina situasi eme njaga ketahanen ekonomi, pangan, paken bage pe kerina keperlun jabu. Kerna si enda tetap perlu silumbaken gelah tetap tercukupi keperlun jabunta. Emaka iarapken man banta arah pekan keluarga sekali enda eme :

1. Kita la jadi beban man kalak si deban sebalikna kita banci nampati kalak si deban si kekurangen geluhna.
2. Kai pe usaha ras dahinta sidukungenlah kita ibas jabu, Moria ras Mamre bage pe anak-anak. Alu bage malem ateta ibas jabu, janah ula kurangi gegeh ras keriahen ukurta dingen bangunlah kerjasama si mehuli bas jabu ras kalak si deban.
3. Erkiniteken ras erdahin labo banci si pesirang, ertina duana e bagin kegeluhen manusia. Sada ncukupken keperlun ‘daging kula’ secara doni ras sada nari ncukupken keperlun ‘pertendin’ gundari ras pagin. Kegeluhen kenca doni enda labo terpesirang ras paksa genduari.
4. Ertanggung jabab kita ibas kerina siilakoken kita, sabab iperdiateken ras ieteh Dibata kinijingkatenta ibas erbage si mehuli, janah e tentuna jadi pasu-pasu man banta subuk erdahin ras erkiniteken.
5. Ibas tahun 2020 enda kita dekahen ndalani kegeluhenta ibas badai pandemi covid-19, emaka enggo dekahen kita tading i rumah erdahin pe i rumah nari. Erdandanken sie kita iajari dingen ibabai kreatif makeken teknologi informasi. Mis: erbinaga dingen sipasarken ulih dahinta (juma, asuhen, usaha, rsd) arah media sosial (facebook ras Whatsapp).
6. Johanes 5:17 “Bapangku erdahin kap lalap, emaka Aku pe arus erdahin”
7. Kuan-kuanen 12:27 “Kalak malas la pernah seh sura-surana, tapi kalak si erdahin alu tutus ndatken untung simbelin”

Pdt. Christmas P. Ginting, M. Th, MH

(GBKP Rg. Griya Rumah Tengah)

___Klasis Medan Namorambe____