Pekan Kebaktin Keluarga Wari IV // Ertambahna Min Keleng Atendu (Pilipi 1 : 8 – 11) // Pdt. Eben Eser Depari, M.Th

 Invocatio         : “Sipeduaken bali ras si ndai e me, ‘Kelengilah temanndu manusia bagi                                kam engkelengi dirindu jine” (Matius 22 : 39).

Ogen               : Masmur 103 : 13 – 18

Khotbah          : Pilipi 1 : 8 – 11

Thema             : Ertambahna Min Keleng Atendu

Penjelasen

Adi ngerana kerna kekelengen oratna lanai bo man ajarenken engkai maka kalak Kristen e engkelengi ras uga kin oratna engkelengi e sabap kekelengen – nehken kekelengen me sada thema si usur kel ituriken man banta. Emaka tentuna enggom mbages kal siangka kerna kekelengen e. Emaka arah kebaktin Pekan Keluarga paksa enda, sue ras thema eme Ertambahna Min Keleng Atedu, isehken maka la banci lang kepeken wari ku wari bas reh dekahna kita jadi ajar-ajar Tuhan Jesus siigelari kalak Kristen e, ertambahna lah min keleng ateta, sabab bagi isenaken ibas invocatio Matius 22 : 39, maka la banci lang arus si kelengi temanta manusia bagi kita engkelengi dirinta jine. Emaka uga pengkelenginta dirinta, bage ka me arusna pengkelenginta temanta manusia.

Erpalasken 3 bagin Kata Dibata si jadi palas khotbah paksa enda, isenaken me tanda-tanda ntah wujud maka tetap reh tambahna keleng ateta. Arah invocatio Matius 22 : 39, kekelengen siisehken kita e eme man kerina temanta manusia alu la ngenen ise ia, kai suku ras agamana, rsd. Em siikataken keleng ate agave labo storge (erkiteken iketen ntah hubungen dareh), philia (erkiteken hubungen pertemanen ntah persahabatan) ras eros (erkiteken perasaan cinta ntah ngena ate). Ibas kita nehken keleng ate man kerina teman manusia e, ncidahken kita enggo ngusih Dibata (Yoh. 3 : 16).

Adi sihubungken ras ogen Masmur 103 : 13 – 18, maka ibas kita nehken keleng ate e, bali ras keleng ate bapa man anak-anakna ija sekalak bapa la banci lang tetap ngukuri ras nikapken si mehuli guna anak-anakna sabab e kin tanggung jawab siiampeken Dibata man bana sebage wakilNa lako pebelin-belin ras ngajari si kerajangenNa si iberekenNa i tengah-tengah sada jabu e. Maka tetap iukurken ras isikapken bapa e hal-hal si maba kiniulin man anak-anakna, erkiteken ietehna ise ras uga anakna e bali ras Dibata meteh ise ras uga kita manusia enda. Emaka uga pe sekali anak e, keleng ate orang tua e tetap nge lit man bana seh mawen ningen, “Anak nge banci ipeskenna la mperdiateken orang tuana, sedangken orang tua labo terpeskenna ngenen anakna”. Ijem teridah kekelengen agave ndai ija prinsipna, “Ku kelengi kam sekali pe kam…..” ntah “Ku kelengi kam, amin pe kam….”.

Jenari erpalasken Pilipi 1 :  8 – 11, tandana reh ertambahna keleng ateta e eme ibas lanai kita ndaram-ndarami alasen guna la nehken kekelengen e. Em si banci iusih kita ibas rasul Paulus nari ija tupung Paulus nuratken suratna enda, ia sangana ibas penjara emaka ndauh ibas perpulungen e nari. Tapi penjara ras jarak e la ngolangi ras mpengadi Paulus ibas nehken keleng atena man perpulungen Pilipi. La banci jumpa alu pedempak ayo, arah surat ijumpaina perpulungen e. Adi ihubungken ras masa pandemi Covid 19 enda si mahanca  kita arus menjaga jarak seh maka lanai usur kal ras-ras pulung subuk sebage teman sada perpulungen ntah kade-kade, ula kal jarak e jadi alasenta lanai nehken kekelengen, umpama : payo ianjurken kita ula lebe jumpa losd bas kerja-kerja termasuk bas i mate-mate. Jumpa les kita alu reh galangna sitamaken lesta. Me enggo reh terakapna man temanna si sangana kepaten e umpamana.

Terbagesen tanda reh tambahna keleng ateta e eme ibas reh belinna ketedehen ateta lako jumpa ibas persekutuan subuk ibas jabunta bagepe temanta sada perpulungen. Ula kal situasi pandemi enda mahanca lit kalak enggo merasa nyaman lanai erkebaktin i gereja ntah bas PJJ, PA, rsd raduken teman sada perpulungen. Pandemi enda oratna mahanca reh buena waktuna ngelakoken persekutuan ibas jabunta sekalak-sekalak sekaligus jadi pertotonta segelah metter ka kita ras-ras ibas persekutuan perpulungen. Tambahna eme ibas kita tetap ertoto kerna jabunta, temanta sada perpulungen bagepe kalak si deban gelahna tetap itambahi Dibata keleng atena, pemetehna kerna si tuhu-tuhu bagepe pengangkan si serta segelah reh ngasupna ia milih apai si mehulina bas geluhna rikut reh tambahna ibas ia biak-biak  si mehuli segelah reh damenta siakap kerina nggeluhken geluhta babo doni enda.

Pdt. Eben Eser Depari, M.Th

(GBKP Rg. Sp. Selayang)

___Klasis Medan Namorambe____