Pekan Kebaktian Keluarga Wari VI // Jabu Si Erbudaya (Johanes 2:1-12) // Pdt. Daud Sembiring, S.Th

Pekan Kebaktian Keluarga Wari VI // Jabu Si Erbudaya (Johanes 2:1-12) // Pdt. Daud Sembiring, S.Th

Invocatio        : “Asangken kerina teman-temanku kalak Jahudi si sebekbek ras aku, lebihen aku ibas ndalanken agama Jahudi. Tutusen ateku nandangi adat istiadat si isuratken nininta asangken ia kerina.” (Gal 1:14)

Ogen                : Kejadin 29:6-30

Khotbah          : Johanes 2:1-12

Tema               : Jabu Si Erbudaya


Tema umum Pekan Kebaktin Keluarga ibas minggu enda eme  “Jabu si paguh erkiteken kuasa Kristus” (Pilipi 4:13). Nehi tema enda, sisi penting maka jabu enda paguh pajek cinder erkiniteken man Tuhan eme “Jabu si erbudaya.” Budaya bagin kegeluhen manusia adi nggeluh i doni enda. Misalna, Koentjaraningrat mbagi kebudayaan e ku bas 3 wujud. Pertama, ideas (system ide), misalna norma (norma sosial, sopan santun), adat istiadat, bahasa, agama, ras secara tertulis lit bas hukum adat. Peduaken, activities (system aktifitas) misalna upacara adat nereh empo, si mate-mate, mengket rumah, rsd. Peteluken, artifacts (system artefak), misalna, rumah siwaluh jabu, uis karo, tumbuk lada, lesung, kampil, rsd. Sitelu enda lit bas kegeluhen kalak karo ope lenga seh injil, berita kerna Jesus. Janah kenca seh pe sitelu enda tetap lit janah jadi bagin kegeluhen kalak karo sienggo erkiniteken.

Emaka adi kita ngerana kerna “Jabu Si Erbudaya” berarti kita harus ngerana kerna dua konteks keberadaan si saling kait mengait. Jabu ibas pengertin enda eme Jabu kalak si erkiniteken man Tuhan Jesus tapi nggeluh ibas konteks telu wujud versi Koentjaraningrat enda ndai. Budaya e orat nggeluhna kalak karo. Mulai tubuh seh matena. Kita selaku warga GBKP, perjumpan Injil ras budaya enda jadi pergumulen rangkap ibas gereja. Ibas sada pihak, kita bergumul ras Tuhan dalam pengertin menghayati, mengamini kebenaren Kata Tuhan ras keleng ateNa ibas Yesus Kristus. Pihak sideban, sekaligus kita bergumul arah budaya, adat istiadat ras masyarakat I tengah-tengah ija gereja hadir ras berkembang. Pergumulen rangkap enda arus terus jadi pergumulen iman ras kehadirenna I doni endan adi ateta kinitekenta kontekstual ras menjadi jawaban iman.

Ibas Galatia 1:14 sebage bahan invocationta, istilah adat istiadat, tradisi eme istilah teknis guna tradisi lisan. Kalak Jahudi tek maka tradisi lisan, bagi Padan Si Ndekah si tertulis ibereken Tuhan man Musa I Sinai. Tradisi lisan imaksudken guna ngkelilingi, ngelindungi ras nafsirken Padan Si Ndekah sitertulis enda. Lebih lanjut tradisi enda isuratken ibas Talmud-talmud Babilonia ras Palestina. Kedungenna tradisi enda jadi aturen, hukum ras cerita rakyat siterkadang lanai lit hubungenna ras kiniteken pe. Kerna sienda banci sinehen ibas Yes 29:13; Kol 2:16-23; 2 Tim 3:1-5. Tugas rangkap gereja ndai adi erlajar arah sienda maka tradisi, budaya, adat istiadat enda arusna min menguatkan kiniteken, njaga ras ngelindungi Kata Dibata labo nutupi piahna kiniteken e enggo medoni lanai persoalen keterkelinen ibas Jesus Kristus. Budaya Karo arusna ngkuhi kinitekennta man Tuhan.

Paulus sebage rasul Kristus Jesus, ija pa pe tading, ngaku maka ia kalak Jahudi si ersunat, berasal arah suku Benjamin (Pil. 3:4-9). Sebage kalak sienggo erkiniteken man Jesus sebage Juruselamatna, tapi nggit denga ia ndalanken adat istiadat, budaya siberlaku itengah-tengah masyarakat Jahudi paksa jamanna, alu ngikuti upacara pentahiren I Rumah Pertoton (Perb. 21:16-20). Motivasi Paulus sienda labo ibas pengertin segelah ndatken pembenaren, keselamaten tapi guna memenangken kalak Jahudi kubas Injil Kristus Jesus (I Kor. 9:19-23). Ndalanken tradisi sindekah sebagai bagian simenguatkan kiniteken ras persadan labo ndatken kebenaren sebab kebenaren situhu-tuhu hanya lit ibas kiniteken man Tuhan Jesus Kristus.

Bahan ogenta pe sekalenda ncidahken uga perjumpan Jakup ras keluarga mamana Laban, turang nandena Ribka. Ibas perjumpan enda, nina Laban, “Payo, kam tuhu-tuhu nge sada dareh ras aku” (Kej 29:14). Perban ietehna maka ia keluargana arah turangna Ribka maka tading me ia ras-ras. Perdalanen Jakup imudahken Tuhan arah pemeliharanNa alu mpejumpaken ia ras keluargana arah nandena. Perlindungen pertama lit arah keluarga. Umputen perjumpan enda alu cerita ras proses singgedang, erjabu me Jakup ras Lea, Rahel ras dua gundikna. Arah cerita enda banci siidah Tuhan memelihara kesusuren Abraham arah penampatNa alu mereken keluarga ras pasangen nggeluh dingen kesusuren. Tuhan merancang melala hal-hal luarbiasa arah keluarga. Tuhan make keluarga sebage perkakasNa guna nehken sura-suraNa simbelin ku tengah-tengah doni enda. Khususna arah keluarga Jakup sejarah Israel iukir ibas sejarah iman ras nasionalna. Bage pe cerita Jakup ras keluargana lit hubungenna ibas perkembangen ras pertumbuhen kinitekenta selaku kalak Kristen.

Umputen Jabu si erbudaya enda lit arah bahan kotbahta alu pendekaten budaya kerja-kerja erdemu bayu i kuta Kana. Biasana kerja-kerja erdemu bayu, perjabun ibas jaman Jesus acarana mbelin ras banci memakan waktu sindekah seh pitu wari. Anggur salah sada unsur si arus lit ibas jamuan makan ibas kerja-kerja e. Anggur e lambang keriahen arus isikapken ibas jumlah simelala segelah tamu puas minem. Kekurangen anggur eme sada hal simpermelaken simada kerja e janah e mesera ngelupakenca seumur geluh perjabunna. Perasaan mela e banci jadi gunjingen, ocehen. Memang budaya, filosofi timur bahken berlaku pe man kalak Karo “perasaan mela” seh kal mehergana man jagan. Ula sempat min ipermelaken ibas kai pe. Mbelin kal perpanna e.

Erlajar arah peristiwa tanda sengget i kuta Kana, situhuna dua hal banci sipetik pelajaren jadi Jabu si erbudaya. Pelajaren pertama, tanda sengget enda situhuna labo awal tubuhna kiniteken ajar-ajar kempak Jesus sebab sebelumna pe enggo lit pendilo ras perkatan Jesus man ajar-ajar. Tanda sengget siibahan Jesus ije ncidahken kedalamen kiniteken. Kiniteken ajar-ajar bertumbuh, sikap dingen reh paguhna arah peristiwa siterjadi I kuta Kana. Ngenehen kemulian Jesus erbahanca kiniteken ajar-ajar bertumbuh. Arah kemuliaan Jesus kita mengalami kehadiren Tuhan. Arah peristiwa Tuhan campur tangan bas kerja-kerja enda, tradisi, budaya erdemu bayu enda kiniteken ajar-ajar bertumbuh ras reh paguhna. Pelajaren peduaken, kepedulin Jesus sanga kerja erdemu bayu i kuta Kana enda ncidahken kenyataan maka Dibata mediate, kepate nandangi kegeluhen manusia sierdosa si sarat bencana, tragedy, hal-hal di luar perkiraan. Kepedulin kempak hubungen sosial sada ras sidebanna seh kal pentingna janah enda jadi usihen man ajar-ajar, man kita kalak karo, warga GBKP ijapa pe ringan. Kepedulin sosial jadi ciri khas budaya kalak karo. Filosopi kalak karo, “Aku kap kam, kam kap aku.” Ise pe kade-kade. Kita eme keluarga.


Pdt. Daud Sembiring, S.Th

(GBKP Rg. Namorambe)

____Klasis Medan Namorambe____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba