Khotbah Minggu, 08 Nopember 2020 // Minggu Kesehaten // Biak Si Maba Kejuah-juahen (Bilangen 11:31-35)

Khotbah Minggu, 08 Nopember 2020 // Minggu Kesehaten // Biak Si Maba Kejuah-juahen (Bilangen 11:31-35)


Invocatio : ” Kubereken man panganndu kasa kai sinuan-sinuan si erbuah i babo doni enda ras kerina batang kayu si erbuah si lit sinuanna i bas buahna”. (Kejadin 1:29)

Ogen : Epesus 5:1-5

Khotbah : Bilangen 11:31-35 

Tema : Biak Si Maba Kejuah-juahen


  1. Perlebe

Ibas masa pandemi covid 19 enda, lit sada kebiasan baru si terjadi ibas kita nalami. Adi gelgel kita berjabat tangan, enda gundari kita melasken kata “salam sehat”. Tujunna eme guna menghindari penyebaren virus enda si kin nina banci menular arah tan. Arah sie banci siidah uga perluna kita terus ipersingeti kerna kesehaten. Bagepe ibas erbage-bage moment adi rusur si jadi penungkunenta baik secara langsung entah lang pe, eme “Uga berita, me sehat nge?”. Bage pentingna kesehaten e bas geluhta, terlebih ibas pertoton tiap kebaktin pe, entah e kebaktin minggu, PJJ, acara kebaktin sidebanna, topik si paling utama eme kesehaten, sebab adi sehat kita banci kita ndalani kegeluhen alu payo ras mehuli. Adi enggo sehat kita pasti mejuah-juah. Bahkan kesehaten pe enggo ianggap jadi sada lambang kebahagiaan ras kesuksesan. Emakana gelah sehat, la kita lupa rusur ngelakoken pemeriksaan rutin “general check up”, olahraga teratus, man pangan si bergizi, pan vitamin, rikut pe mpekena-kena kula. Terlebih ibas masa-masa pandemi si bangenda.

Amin bage gia, ibas kita njaga kesehaten kulata, si paling penting si la arus ilupaken kita eme kesehaten pertendinta. Labo terjeng pangan ras kula saja sierbanca kita sehat, tapi perlu ka nge perukuren pe. Adi nina pakar kesehaten, si menjadi penyebab penyakit eme 70-90% erkiteken rukur la mejuah-juah. Adi gulut ukur tentu immunnta pe reh lemahna. Emakana ibas Kuan-kuanen 17:22 ” Keriahen desken tambar si mereken kejuah-juahen, adi ukur serbut erbahanca daging kertang tading tulan”.

Emaka perlu kita harmoni ibas ngaturken kesehaten. Harmoni ije eme keseimbangen antara kesehaten fisik, sosial, perukuren (mental), ras kiniteken. Enda me ikataken sehat secara holistik. Emaka arah bahan khotbahta wari si sendah mabai kita guna meteh ras mabai kita guna mpekena-kena biak si lit ibas kita, gelah danci maba kejuah-juahen bas geluhta (temata)



  1. Isi

Ibas bahan khotbahta ituriken biak si la maba kejuah-juahen bas geluhta eme biak merangap. Enda terjadi ibas bangsa Israel. Ibas perdalanen menuju ku taneh perjanjian, jungut-jungut bangsa e erkiteken tersiksa kel ibas masalag man. Iturikenna kerna kerincuhenna man daging (ayat 4), sebab sedekah enda si ipanna eme terjeng manna saja. Mbegi jungut-jungut bangsa e, lesek kel ate Musa, emaka iturikenna kerina man Tuhan. Mbegi keluhen Musa emaka ibahan Tuhan me angin rembus, ibaba angin e leti i lawit nari, ergungun seh sada meter ganjangna ibabo taneh. Cinep ia kerina ibas ingan erkemah (ayat 31). Ngidah si e, sibuk bangsa enda erkuskas nangkap leto. Tapi erkiteken kerangapen bangsa enda, eme tiap jelma ipepulungna leto e lebih sada ton selama 2 wari, justru ngerugiken bangsa enda. Ngidah perbahanen bangsa enda turah rawa Dibata, ipeturahNa pinakit engkenai enterem jelma i tengah-tengah bangsa. Ulihna ibas ingan e pajek “kuburen kalak rangap”.

Arah sie teridah enggo mulai terganggu kesehatenna secara holistik, eme:

  • Segi kesehaten fisik ras moral ( ija ibuatna leto enda lebih asa siibutuhkenna, teridah kerangapan ije)
  • Segi sosial ras moral ( la iukurkenna kerna kalak sideban, tapi ia ngenca, teridah keegoisan)
  • Kiniteken ras moral ( lanai ia tek kerna pemere Dibata si tetap ncidahken keleng ateNa ibas masu-masu bangsa e, mbiar ia kerna wari si pepagi)

Ibas si e arus tetap siinget uga mbelinna keleng ate Tuhan man manusia. Ibas invocatiota pe tangkas ikataken, ibas proses penciptaan, manusia me tinepa Dibata si paling terakhir, tujunnaa gelah sikap kerina si jadi kebutuhen manusia e, baik masalah pangan, ibgan tading, ras sidebanna. Hanya rusur denga aru ateta kerna sie. Padahal tangkas ipadanken Dibata ibas Matius 6:34a nina, “Ola aru atendu kerna wari si pepagi, sebab pepagi lit denga ka nge si man ndelenken”.

Bagepe biak sideban si banci maba kejuah-juahen man banta ras sekelewetta eme bagi ibas pengogenta sipemena, eme tetap nggeluh ibas terang. Ibas si e ipersingeti Rasul Paulus man perpulungen i Efesus kerna statusna selaku anak-anak Dibata. Adi sekalak anak Dibata harus tuhu-tuhu sehat perukuren entah moralna. Enda kerina teridah ibas ndalani kegeluhen si la erlua-lua, erlagu la mehuli entah pe merangap, la mbelasken cakap caram entah cakap silang-lang. Tapi si arus ilakoken eme geluh si erpalasken keleng ate, bagi Yesus si tetap setia guna ngkelengi manusia, dingen si nggo nggit ngasamken kesahNa guna keselamatenta.


  1. Aplikasi

Lit semboyan kesehaten nina, “Di dalam tubuh yang kuat, terdapat jiwa yang kuat”. Adina si perdiateken arah semboyan e, adi ngasup lah kita makekenca tentu enda tuhu-tuhu jadi gegeh man banta guna ngasup ngelakoken si ngena ateNa. Kalak si mejuah-juah pertendinna radu ras perukurenna, ia me si banci mabai kejuah-juahen mab kulana bagepe man kalak sideban. Guna si e perlu siperdiateken ras si jaga kesehatenta secara holistik. Tetaplah si jaga kesehaten fisikta (tetap man ras minum si cukup ras bergizi;ula merangap sebab lit singatakenca adi sangana picet rukur e ras latihka siakap rukur entabeh kel man. Bahkan lanai iangkarna pe man. Ulihna naik gula, naik tensi, asam urat, kolesterol, jantung, ras sidebann; olahraga teratur, ras cukup istirahat), sosial (peduli nandangi kalak sideban, tetap cidahken geluh sikeleng-kelengen ibas geluhta), mental (tetap berpikir positif ras mehuli kerna kalak sideban), spiritual (tetap jaga hubungen si mehuli ras Tuhan). Adi sipakelah kerina biak enda kerina, tuhu-tuhu kita banci maba kejuah-juahen man banta bagepe sekelewetta. Salam sehat ras Amin.

 


Pdt. Melda P. Br. Surbakti, S.Th

(Rg. Simalingkar A)

____Klasis Medan Namorambe_____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba