Perpulungen Jabu-Jabu, 01-07 November 2020 // Pdt. Daud Sembiring

IBERE TUHAN KEPENTAREN, KENGASUPEN, RAS PENGERTIN

(Keluaren 35:30-35)

(Evaluasi TI)

Ibas masa genduari enda, lit istilah “idemi Kesah Si Badia”  hampir kerina iperseri alu pengalamen-pengalemen rohani siteridah alu peristiwa-peristiwa adikodrati (supernatural). Misalna saja, sekalak ianggap idemi Kesah adi beluh ia erbahasa lidah, erbahan mukjijat kesembuhen tah ernubuat. Adi siperdiateken ogen kita sendah, kepeken orang pertama sitercatat sekalak si idemi Kesah Dibata eme Bezaleel. Gelar Bezaleel iertiken Tuhan perlindungen, tah pe iteruh bayang-bayang Dibata. Bas kai ia idemi Kesah Dibata? “Nina Tuhan man Musa, “Nggo Kupilih Besalel, anak Uri kempu Hur, ibas suku Juda nari, janah enggo Kudemi ia alu KesahKu. Nggo Kubereken man bana pengertin, kebeluhen ras kengasupen erbahan barang-barang si mejile; …….. Bage pe enggo Kupilih Oholiab anak Ahimasah, ibas suku Dan nari guna nampati Basalel. Man tukang sideban pe enggo Kubereken kengasupen simbelin, gelah banci ibahanna kerina sienggo Kuperentahken…” (Bdk. Kel. 31:1-11). Pernyataan Tuhan enda iulihi imomoken Musa man kalak bangsa Israel “Tuhan nggo milih Besalel, anak Uri, kempu Hur ibas suku Juda nari. Ia nggo idemi Dibata alu KesahNa, janah nggo iberekenNa man bana kepentaren, kengasupen, ras pengertin erbahan kerina barang-barang simejilena….. Man Besalel ras Oholiab anak Ahimsah, ibas suku Dan nari, nggo ibereken Tuhan kengasupen ngajarken kebeluhen ertukang man kalak sideban” (Bdk. Kel. 35:30-35). Idemi Kesah erbahanca Basalel enda ndatken pengertin, kebeluhen ras kengasupen tapi la seh ije saja, pemere enda banci iajarken, itularken, ilatih man kalak sideban. Pelipatgandan kemampuan ras berbagi tugas perlu ibas ngaloken pendilo Tuhan. Pemere Tuhan e la kepe ibuniken man banta saja tapi ibagiken dingen iajarken. Berkat Tuhan harus ilipatgandaken segelah hasilna luar biasa.

Cerita sekali enda tuhu-tuhu menarik man banta sijadi evaluasi kita kerna perkembangen tehnologi informasi. Apai ka tahun enda tahun IT. Ndungi dahin si ipercayaken Tuhan man Basalel ras teman-temanna labo bias hanya ertoto saja. Bagi mbaca mantra, “Sim sala bim, jadilah!!!” langsung jadi. Lang! Memang mbangun Kemah Si Badia e perlu hikmat Tuhan tapi perlu pengembangen dingen melatih diri ra melatih kalak sideban. Basalel perlu mengembangken ketrampilan, keahlin dingen mpergunaken teknologi terbaik sibanci ibahanna guna hasil maksimal ibas pengolahen logam, barang mulia, uis rsd. Ndalanken perentah Tuhan, nuntasken dahin pelayanen perlu mpergunaken tehnologi tepat guna tepat sasaren segelah hasilna pe maksimal.

Basalel idemi Kesah Dibata, labo alu penampaken hal-hal supranatural tapi pendahin pertukangen si tempa-tempa biasa saja man tatapen. Hal siperlu sicatat kerna Besalel idemi Kesah adi sinehen kerna pendahinna. Pertama, sekalak si idemi Kesah kepeken ndatken pemere, karunia Dibata. Jadi e labo perban hebatna. Labo perlu tual, meganjang ukur. Peduaken, idemi Kesah Dibata e iumputi alu pemere keahlin, kengasupen, kepentaren, ras pengertin.

Memang keahlin tah kecakapen ibutuhken kal ibas ndalanken sada pendahin. Adi sekalak ahli ibas bidang tertentu maka hasil karyanya pasti berbeda ras berkualitas. Tapi ibas melayani Tuhan keahlin saja la cukup tapi lebih asa sie ibutuhken kal pusuh, hati sitergerak ras terbeban. Adi keahlin saja ngenca ngenca siarapken maka banci ibabaina kita kubas performer, melayani guna nguji kebeluhen, one man show. Nterem jelma melala kebeluhenna, keahlinna tapi sitek ngenca lit ukurna, hatina si terbeban melayani pendahin Tuhan alu bulat ukur. Bagi nina Keluaren 36:2, “Kenca bage idilo Musa Besalel, Oholiab ras kerina kalak si beluh si nggo ibereken Tuhan kengasupen ras si nggit nampati, jenari isuruh Musa ia kerina menaken dahin e.” Kepentaren, kengasupen ras pengertin enda pemere Dibata, anugerah Dibata man bana kerina. Kombinasi antara kemauan ras kemampuan melahirken keunggulen. Karunia ras telanta plus hati yang rela melayani Tuhan hasilna pasti maksimal.

Mari jadikenlah pemere Tuhan alu kepentaren, kengasupen, ras pengertin erbahan kerina barang-barang simejilena, siberkualitas, berguna man doni enda, manusia, khususna guna mpermuliaken Tuhan dingen nehken sura-suraNa. Ambah sie pemere Tuhan enda arusna ngasup min kita ngajarkenca, neruskenca, melipatgandakenca segelah hasilna lebih berkualitas ras maksimal. Janah hal si lebih penting, perlu lit ukur siersuruh, nggit, tulus, nutus guna melayani Tuhan. Adi sienda banci sidalanken maka kualitas anak-anak Tuhan ibas bidang kai pe pendahinna pasti jadi “alat Tuhan” si luarbiasa. Amin.

Pdt. Daud Sembiring

(GBKP Rg. Namorambe)

_____Klasis Medan Namorambe__