Minggu Reformasi Gereja, 01 November 2020 // 2 Raja-raja 23:1-14 // Reformasi Spiritualitas // Pdt. Daud Sembiring

Minggu Reformasi Gereja, 01 November 2020 // 2 Raja-raja 23:1-14 // Reformasi Spiritualitas // Pdt. Daud Sembiring


Invocatio         : “Sendah Kubereken man bandu kuasa nandangi bangsa-bangsa ras kerajan-kerajan lako mbungkarken dingen ngeruntuhken, lako ngekernepken dingen ngeradasken, lako manteki dingen nuan.” (Jeremia 1:10).

Ogen               : I Korinti 3:10-17

Khotbah           : 2 Raja-raja 23:1-14

Tema               : Reformai Spiritualitas


Mejuah-juah man banta kerina kekelengen ni Tuhanta Jesus Kristus kepala gereja.

Salam reformasi, sebab minggu enda bengket me kita kubas Minggu Reformasi.

Lit motto Reformasi Gereja “ecclesia reformata semper reformanda secundum verbum Dei” atau “gereja yang telah ter-reformasi harus terus ber-reformasi sesuai dengan Firman Tuhan.” Gereja e arus dinamis labo statis menghadapi tantangen jaman. Firman Tuhan e kekal abadi tapi singaloken Firman Tuhan e berubah-ubah seiring tantangen jaman janah gereja arus ngasup mereken jawaben iman, teologis ras praktis ibas setiap jaman. Indikator siipake kita bas minggu enda eme Firman Tuhan, verbum Dei, sola scriptura. Adi sitatap tole perdalinen sejarah gereja icidahken maka gereja e terus menerus ipelimbarui Tuhan arah pendahin bapa-bapa gerejanta segelah kiniteken perpulungen e reh dewasana. Janah semangat enda njemba kita paksa genduari guna nggit ipake Tuhan ibas mpekena-kena gerejan-Na enda guna maba pembaharuan si membangun kiniteken si reh dewasana ibas gerejanta. Tantangen GBKP eme gua ia mereken jawaben imanna/ senjata gereja eme: Alkitab, tradisi gereja (Calvinisme), konfesi GBKP, budaya karo, ras moderenisme.

Kekelengen ni Tuhan, ngerana kerna reformasi spiritualitas, marilah kita erlajar arah telu cerita/tokoh ibas kesempaten enda. Pemena, nabi Jeremia. Nabi enda seangkaten masa pemerintahen Josia. Nabi besar enda ibereken Tuhan kuasa guna nandangi bangsa-bangsa ras kerajan-kerajan lako mbungkarken dingen ngeruntuhken, lako ngekernepken dingen ngeradasken, lako manteki dingen nuan (Jer. 1:10). Sekalak nabi Tuhan labo saja nontari tapi mpekena mulihi gelah reh sikapna. Labo meritaken hukumen saja tapi maba berita keselamaten, rsd. Labo hanya mengkritik tapi mereken solusi ras jalan keluar.  Peduaken, Paulus. Paulus atena menegasken kerna uga kin seharusna jadi dasar utama ibas membangun jemaat. I kontrasken Paulus antara kai siibanggaken kalak Korintus kerna kepentaren. Paulus konsisten sejak awal nari kerna salib Kristus ras Injil sebage pusat pemberitanna. Gereja ibangun ibas dasar sinteguh eme Kristus Jesus. Selanjutna, ia nuriken maka i datas dasar/pondasi simegegeh enda pembangunen harus berlanjut terus menerus. Palas saja la bias, perlu ibangun datasna kai ateta sibahan, gua maka mejile ras sikap. Jaman banci saja berubah, cara penyampaian banci i akomodir tapi isi pemberitaan la banci bergeser. Salib Kristus ras Firman Tuhan la banci tergantiken ras i geser. Peteluken, Raja Josia. Em sibahas ibas kesempaten enda jadi bimbinen khotbahta.

Raja Josia merentah selaku raja Yehuda ibas umurna 8 tahun janah dekahna pemerintahenna 31 tahun (2 Kro 34:1). Kualitas kerohanian Yosia seh kal ulina bagi siikataken ibas 2 Kronika 34:2; “Ilakokenna kai singena ate Tuhan. Iusihna perbahanen nini-ninina Raja Daud, janah tutus iikutkenna kerina undang-undang Dibata.” Standard dingen figur ibas ia erkiniteken eme Raja Daud, adi raja sideban lanai jadi standard beriman bas geluhna dingen bangsa Israel.  Telu kata ibrani merefleksiken kerna spiritualitas Yosia eme: Pertama; Yasar siertina: lurus, benar ras jujur. Peduaken, yelekh/halakh siertina: erdalan ras tindaken. Peteluken, loser siertina: tidak berbalik. Reformasi spiritualitasna alu menata spiritualitas dirina uga nggeluh, erdalan ras bertindak lurus, benar ras jujur arah terang Kata Dibata. Kata Dibata e jadi inspirasi, penggerak utama simengubah kegeluhenna dingen mbentuk karakterna si luar biasa.

Ibas pe 18 tahunken masa pemerintahenna, Josia ngelakoken reformasi spiritual eme mentahirken Juda ras Jerusalem arah paganisme, sinkretisme tah pe penembahen dibata si deban. Ibas umurna singuda denga ia mulai nembah man Dibata nini-ninina Raja Daud. 2 Kronika 34:3 makna ras terjemahen kata “lidrosh le elohei Dawid, abi.” Terjemahen Karo “nembah” tapi terjemahen Bahasa Indonesia ipakena “mencari” guna nterjemahken kata “lidrosh”. “Mencari Tuhan” eme idiom semitik alu pengertin ganda. Pertama, menyelidiki hukum Tuhan guna ndatken petunjuk nggeluh. Peduaken, mindo pengalemi dosa ras ndatken perkuah ate Tuhan. Ope lenga reformasi spiritual mentahirken Kerajan Juda ras Rumah Pertoton maka geluhna lebe mengalami reformasi diri. Arah Firman Tuhan ietehna kerna ise ia, ise bangsana iadep-adepen Tuhan. Tuhu-tuhu enggo meluat mekelesa. Kesadarenna kerna kehadiren Tuhan menggerakken kesadarenna kerna ise ia i lebe-lebe Tuhan. Pertobaten Josia secara pribadi man Tuhan, pertumbuhen spiritualna erbahanca terjadi kebangunen rohani, geraken pembaharuan i tengah-tengah bangsa Juda ras Jerusalem.

Reformasi spiritual ibas diri sekalak raja, pemimpin tertinggi, simbol negara Juda berdampak kubas reformasi spiritual man bangsana. Respon pertamana: mengiket perjanjin ras Tuhan (ayat 1-3). Rawa Tuhan e “tertunda” man bangsa Israel labo berarti ibatalken. Dosa ras hukumen Tuhan e berbanding lurus, sendalanen. Dosa la banci ibatalken seakatan iampuni erkiteken Tuhan e perkeleng. Hukumen tertunda erkiteken kiniulin ras kiniteken raja Josia saja nge maka rawa/hukumen Tuhan e lenga nusur man bangsa Yehuda (2 Raja 22:19). Respon peduaken; reformasi radikal secara hukum (ayat 4-20). Yehuda enggo ngelakoken “perselingkuhen agama”, sinkretisme, paganisme lewat para penguasa ras raja-raja. Dosa enda arus ibersihken, imurniken, janah guna mentahirken enda butuh waktu enem tahun guna menghancurken kerina patung berhala, mpengadi imam-imam dewa asing, pelacur bakti, nenun uis Asera (dewi kesusuren), bukit-bukit pengorbanen rsd (ayat 20, 24). Renteten aksi-aksi Josia sijumlahna lebih kurang 17 enda ncidahken bobrokna masyarakat Jehuda. Respon peteluken; Paskah irayaken guna mpegeluh mulihi akar budaya bangsa, lambang kemahakuasaan Dibata mbebasken nini-ninina mbarenda ibas perbudaken i Mesir. Perayaan enda seh kal dekahna lanai idalanken. Kembali ke akar, back to bible. Terkadang perkembangen keagamaan, tradisi enggo menyimpang arah pesan awal berdirina sada agama, kiniteken. Reformasi mengembalikan ke akar, guna membangun tatanan simbaru ibas pondasi situhu-tuhu alu pendekaten berbeda. Janah enda me siilakoken Martin Luther, Johanes Calvin ras angkaten reformasi gereja.



Cataten sejarah nulisken kerna raja Josia tuhu-tuhu jelas maka ia ndalanken kai sibenar ibas mata Tuhan. Ayat 25, “la enggo pernah lit sekalak raja pe bagi Raja Josia tutusna, nembah man Tuhan asa atena, asa ukurna, ras asa gegehna ngikutken undang-undang Musa. Kenca ia pe lanai nggo pernah lit raja si bagi ia e patuhna.” Cataten maka kegeluhen spiritualna jelas ibas cataten sejarah raja-raja. Pertobaten ibas pusuhna iikuti alu tindaken sincidahken tanda ketutusenna ngikutken peraten Tuhan. Spiritual aruslah actual. Kiniteken aruslah teridah arah perbahanen. Pelajaren pe man banta maka pertobaten arus icidahken alu erbage-bage perubahen ibas prilaku, perbahanen ras tindaken konkret. Pertobaten e memang ibenai ibas pusuh nari tapi arus teridah ibas penatap mata.

Seh matena raja Josia memang bangsa Israel e tetap nembah man Tuhan. Tapi kenca matena bangsa enda mulihi nembah man dibata sideban. Adi sirunut ja benana “perselingkuhen agama” enda ibenaken teridah me mulai raja Salomo nari seh hampir kerina raja Jehuda. Enggo ndekah, ras rurat megegeh. Emaka reformasi Josia enda labo secara otomatis mengubah secara drastis. Reformasina hanya sebatas tampilen saja. Seri bagi kuan-kuan, “Tuhan mpedarat bangsa Israel i Mesir nari cukup sada berngi ngenca, tapi mpedarat tabiat Mesir ibas diri bangsa Israel e butuh 40 tahun i padang gurun.” Apai ka tabiat penembahen berhala enda seh ratusen tahun enggo membudaya, rurat megegeh bas diri bangsa Israel/Juda mesera denga ipekena seh kuakar-akarna. Pertobaten lahiriah denga lenga seh pertobaten batiniah. Arusna min seh ije reformasi e. Emaka reformasi Juda enda hanya sementara, temporal. Kenca kematen Josia, Juda mulihken ipimpin raja si jahat ras kerina bangsa Juda erdosa mulihi. Pertobaten sejati/situhu-tuhu menghasilken buah-buah perubahen nggeluh sibertumbuh ibas keleng ate Tuhan ras nadingken kejahaten. Sebalikna, pertobaten semu sifatna sementara ras lahiriah saja. Kedungenna pertobaten palsu/semu enda pasti mulih kubas dosa-dosana adi lanai lit kepentingenna i je datna labo kepentingen Tuhan.


Pesan-pesan iman banta masa genduari erpalasken khotbah kita ibas minggu enda.

  • Geraken reformasi spiritual ibenai alu geraken baca Alkitab. Gereja terus ipelimbarui alu terang Firman Tuhan. Uga ningen meteh sura-sura Tuhan adi la lit kemetedehen ate mbaca Alkitab. Apai benar ras salah, bujur ras sesat, rsd adi la nina Alkitab.
  • Geraken reformasi spiritual iterusken alu kemetedehen ate kempak Rumah Pertoton dingen ibersihken alu motivasi-motivasi, motif-motif si la sentudu ras peraten Tuhan.
  • Geraken reformasi spiritual ijaga alu tetap ngkelengi Tuhan alu “segenap jiwa, segenap hati, segenap kekuatan” labo setengah-setengah, suam-suam kuku.
  • Gereja eme penggerak utama perubahen adi ateta mpekena masyarakat, bangsa ras negara. Ibas pergerakenna arusna min enda geraken bersama gelah berdampak mbelin khususna si pengambil kebijakan ibas pemerintahen dingen pemimpin-pemimpin ibas gereja enda.
  •  GBKP mengalami reformasi adi inti (core) budaya, tradisi gereja, modernisme menguatkan Firman Tuhan. Janah reformasi enda lenga dung ras terus mengalami proses dinamis. Semangat reformasi ecclesia reformata semper reformanda secundum verbum Dei”  arus terus i dengungken. Gereja ula ermeriah ukur ibas zona aman tapi zona iman. 

Salam reformasi, selamat wari minggu. Mari perbaiki geluhta alu terang Firman Tuhan. Amin


Pdt. Daud Sembiring

(GBKP Rg. Namorambe)

____Klasis Medan Namorambe_____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba