Khotbah Minggu Zending // 25 Oktober 2020 // Perbahanen Rasul-rasul 15 : 30 – 35 // Ngajar Dingen Meritaken Kata Dibata // Pdt. Eben Eser Depari M.Th

Khotbah Minggu Zending // 25 Oktober 2020 // Perbahanen Rasul-rasul 15 : 30 – 35 // Ngajar Dingen Meritaken Kata Dibata // Pdt. Eben Eser Depari M.Th

Invocatio        : “Tapi nina Jesus man bana, “Berita Si Meriah   kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap  Aku isuruh Dibata”  (Lukas 4 : 43)

Ogen               :   Jeremia 2 : 1 – 3

Khotbah         :  Perbahanen Rasul-rasul 15 : 30 – 35

Thema            :   Ngajar Dingen Meritaken Kata Dibata


 


Mejuah-juah man banta kerina. Minggu enda igelari Minggu Zending janah enda ngingetken kita mulihi kerna pendilo ras persuruhen ntah amanat Tuhan Jesus sindube isehkenNa man ajar-ajarNa si pemena bagepe man banta paksa enda, “Laweslah ku kerina  bangsa manusia, bahanlah ia jadi ajar-ajarKu : Peridiken ia ibas gelar Bapa, gelar Anak ras gelar Kesah si Badia, janah ajari ia ngikutken kerina si enggo Kupedahken man bandu. Janah ingetlah ! Aku tetap kap ras kam seh ku kedungen jaman” (Matius 28 : 19 – 20). Dahin erberita si Meriah ku kerina bangsa manusia e jine enggo ilakoken Tuhan Jesus tupung IA ras ajar-ajarNa denga bagi siikatakenNa ibas invocatio Lukas 4 : 43, “Tapi nina Jesus man bana : Berita si Meriah kerna Kinirajan Dibata arus Kupeseh ku kuta-kuta si deban, sabab guna ngelakoken sie me Aku isuruh Dibata”. Kai siikataken Jesus enda negasken maka dahin erberita si Meriah e la banci la ilakoken ntah isehken sabab bagi niNa guna sie me IA isuruh Dibata ku doni enda, janah adi e ihubungken ku kita sebage ajar-ajarNa – pengikutNa paksa enda, maka guna erberita si Meriah eme kita tetap ringan ras nggeluh i doni enda sabab Berita si Meriah e la banci ngadi bas sekalak ntah piga-piga kalak bagepe piga-piga kuta saja ngenca.

Emaka erpalasken ogenta Jeremia 2 : 1 – 3 si ncidahken kecedan ate Dibata ngenen perasat bangsaNa Israel si paksa e enggo lanai setia man Dibata bali ras tupung ndube ibebasken Dibata bangsa enda i perbudaken Mesir nari bagepe tangtangna bangsa enda ringan i taneh Kanaan siipadanken Dibata e. Hubungen ntah persadanNa ras bangsaNa, iandingken Dibata desken iketen perjabun ija penganten si dilaki eme Tuhan Dibata janah penganten si diberu eme bangsaNa Israel. Tapi genduari bangsa Israel e lanai setia man Tuhan alu nundalken Tuhan jenari nembah man dibata-dibata sideban. Enggo berubah bangsa Israel e lanai bagi sigel-gel ndube. Em mahanca ceda ate Tuhan ngenen bangsaNa e.

Adi sihubungken ras Minggu Zending enda, adi siinget, siukuri ras sibandingken semangatta gundari enda ras si arah lebenta subuk kemahen ntah serayan Tuhan eme Pendeta, Pertua, Diaken – Emeritus GBKP (la pedah Zending sindube reh i negeri si deban nari ku kuta-kuta kalak Karo) bagepe perpulungen ibas er Berita si Meriah ntah Pekabaren Injil…..la kin lah ceda ka nge ate Dibata ngidah semangatta ibas er-Berita si Meriah e ?

La pedah er-Berita si Meriah ku kuta-kuta sideban man kalak si lenga nandai ras ngaloken Tuhan Jesus, er PI ku daerah-daerah PI Runggun bas wilayah Klasista saja pe uga kira-kira pendalankenta kidekah enda ? Kubas bagin si terkitiken, uga menda semangatta  ndalanken Tri Tugas Gereja eme Persadan, Kesaksin ras Diakonia ? Adi gel-gel e erdalan nahe 1 – 2 kilometer, make obor ntah senter guna PJJ, ndahi si mate-mate, ngapuli, rsd…. dalan gelap erkiteken listrik lenga lit… melungen erkiteken jelma lenga enterem. E pe meriah ukur kemahen (serayan) Tuhan ras perpulungen e ndahikenca. Gundari fasilitas enggo reh lengkapna rikut kemudahen-kemudahen umpama kendaraan bermotor, rsd. Uga nge penggejapenta kerna semangatta bas dahin-dahin gereja e ?  Em siikataken kami i datas ndai : La kinlah ceda ate Tuhan ngenen kecibalta paksa enda bali ras cedana ateNa ngenen kecibal bangsaNa Israel ibas jaman nabi Jeremia bagi isenaken ibas ogenta.



Erberita si Meriah e adi sinen ibas Perbahanen Rasul 15 : 30 – 35 eme guna mpetangkas man perpulungen kerna pengajaren si benar segelah reh tetapna – reh gegehna ukur perpulungen e ngikutken Tuhan Jesus bagepe guna mpekitik ntah meminimalisir turahna persoalen-persoalen bas perpulungen. Latar belakang nats enda eme litna persoalen bas perpulungen Antiokia erkiteken piga-piga kalak si reh i Judea nari ku perpulungen e meritaken ajaren si erbeda ras siiajarken Paulus ras Barnabas ija kalak si reh e ngataken maka labo terkelin perpulungen e ibahan Dibata adi la kin isunatken bagi niaturken Undang-undang Musa (ayat 1). Si reh e mungkin bas golongen kalak Farisi si enggo tek man Tuhan Jesus. Payo kalak enda  ngaloken maka si la Jahudi pe banci bengket kubas perpulungen Tuhan Jesus tapi alu syarat iberlakuken man bana sunat menurut undang-undang Musa. La isangkal kalak enda kuasa pengorbanen Jesus guna pengalemi dosa, tapi nina pe hanya alu dalan sunat kalak  si la Jahudi e ndatken anugerah keselamaten bas Tuhan Jesus nari. Adi terjeng tek ras iperidiken saja, lenga kuh keselamaten e ialoken perpulungen si ndube la kalak Jahudi e.

Persoalen e icakapken bas sidang i Jerusalem janah guna nehken keputusen sidang eme Paulus, Barnabas, Silas ras Judas reh ku Antiokia. Kenca ioge perpulungen Antiokia ulih sidang i Jerusalem e, meriah ukurna sabab e mpetetap ukurna guna ngikutken Tuhan Jesus sabab enggo jelas keselamaten siialokenna erpalasken kinitekenna man Tuhan Jesus ras ibas ia iperidiken e.

Erberita si Meriah e adi si nen pe erpalasken Kata Dibata paksa enda banci ilakoken secara verbal eme alu kata-kata (ngajar, nuriken, meritaken Kata Dibata) bagi siilakoken Judas, Silas, Paulus ras Barnabas (Perbahanen Rasul 15 : 32, 35) bagepe non verbal eme alu biak, sikap ras cara nggeluh si payo ras mehuli ija Judas ras Silas duana kalak siihamati ibas perpulungen (ayat 22) seh maka kai siibelasken ntah iajarkenna teraloken kalak simegikenca sabab sue kata ras perbahanenna. Bagepe er berita si Meriah e ilakoken arah persadan perpulungen e ibas keleng ate ras perayaken si mehuli ija inti keputusen sidang i Jerusalem siisehken man perpulungen Antiokia eme nggeluhlah ia kerina  ibas sada persadan si nteguh ras mehuli guna radu ras ersembah man Dibata. Payo ngaloken Kristus e mereken kebebasen, tapi jaga pe gelahna kebebasen e ula ncedaken ukur teman sada perpulungen ras persadan e. Emaka arus ipedauhna dirina ibas hal-hal simahanca ceda ukur temanna sada perpulungen terlebih si ncurnaken ia sebage perpulungen Kristus. Sabab perubaten apai ka perpecahen bas perpulungen labo pernah jadi kesaksin si mehuli kerna Kristus. Nggeluh setia man Tuhan ras tetap ndalanken si ngena ateNa me sura-sura Tuhan kerna bangsaNa Israel bas ogenta Jeremia 2 : 1 -3. Em pe sura-sura Tuhan kerna kita ras si jadi perayakenta segelah Berita si Meriah kerna Kinirajan  Dibata e eme pembebasen man si tertaban, keriahen, dame, kemalemen ate ras keselamaten si tuhu-tuhu e reh mbarna siberitaken.


Pdt. Eben Eser Depari, M.Th

(GBKP Rg. Simpang Selayang)

____Klasis Medan Namorambe_____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba