Khotbah Minggu 18 Oktober 2020 // Kenca Trinitatis // Minggu Moria // Pdt. Daud Sembiring

Khotbah Minggu 18 Oktober 2020 // Kenca Trinitatis // Minggu Moria // Pdt. Daud Sembiring


Invocatio        : Ukurkenlah mbages-mbages ope denga idalankenndu maka                                 kai pe si ilakokenndu tuhu mehuli jadina (Kuan. 4:26)

Ogen               : Titus 2:3-5

Khotbah         : Mazmur 131: 1-3

Tema               : Nande Si Mereken Kedamen


Mejuah-juah man banta kerina.

Senina dingen turang ibas kekelengen Tuhanta Yesus Kristus.

Adi ngerana kita kerna kedamen maka mulai kin tubuh seh matena i babo doni enda, manusia e ndarami kedamen labo kesusahen. Kenca mate pe, perayakenna ku surga ingan kesenangen e labo ku neraka ingan ukumen e. Adi kesusahen ningen e la pe darami reh nge katepen asangken kedamen e man banta. Perayaken manusia guna ndatken kedamen e beragam cara ras bentukna. Banci saja alu mpepulung erta, teman melala, jabaten meganjang, piknik ibas ingan wisata rsd. Kepeken ibas minggu Moria enda ibabai kita maka “nande” nina ibas penggelaren kalak karo guna njelasken identitas diberu sienggo erjabu banci mereken kedamen e man siisi jabuna. Nande ingan tertande man kerina siisi jabu. Bahken iperluas seh kubas ruang lingkup gereja, masyarakat, bangsa ras negara. Tertande e butuh kula, pusuh, tendi, mental simegegeh segelah si-tertande man bana e ndatken kedamen.

Senina ras turang, temanta nande simereken kedamen. Uga nge ndia carana nande e banci mereken kedamen khususna  bas minggu moria enda? Hal penting kal siarus siidah ras sitandai sebab e hal mendasar kal adi ateta ngenehen uga kin nande simereken kedamen e. Dibata e seumpama sekalak nande, ingan tertande man anak-anak-Na. Ijaga, irawat ras itegu-teguNa anak-anakNa ibas ndalani kegeluhen i doni enda. Keleng ate Tuhan la pernah masap, erkurangna gia anak-anak-Na e la pernah ngangkai kerna keleng ate Tuhan e tapi  lalap ngangkai ise kita. Tuhan e ingan cicio ras tertande, ingan ndatken keleng ate ras gegeh. Endam e, uga gegeh, sifat ras karakter Tuhan e itanemkenna ibas diri sekalak nande man anak-anakna. Adi ateta meteh kerna kiniulin, keleng ate ras uga cara Tuhan merawat anak-anak-Na maka cukup nehen uga sekalak nande hadir ras berbuat man anak-anakna, man keluargana. Adi karakter Tuhan e enggo itanemkenNa bas diri sekalak nande maka labo la mungkin kedamen e banci iberekenna man keluargana, gereja ras masyarakat adi e ipergunakenna.

Guna nehi tujun nande simereken kedamen e maka kualitas sekalak nande aruslah teridah, teruji ras terasah. Labo saja jadi nande sibiasa tapi si luar biasa. Nande tah moria GBKP aruslah di atas rata-rata pernanden si labo kalak sierkiniteken segelah banci ia mereken kedamen e. Kualitas siarus ihadirkenna eme; pertama, beluh rukur alu mbages ope lenga idalanken (bnd. Kuan. 4:26). Dem pertimbangen untung rugi, sebab akibat, rsd. Syarat guna sie perlu 3B. Baik (secara moral), Benar (sesuai fakta), Berguna (lit manfaatna). Tujunna segelah kai sidalankenna maksimal ras berkualitas. Umumna nande keleng nge atena anakna. Adi lit dengalah naluri keibuan bas ia pasti keleng atena e labo nari iraguken. Tapi sadar tah la sadar kita maka terkadang kejahaten verbal terjadi ibas keluarga. Akapna sikatakenna e biasa tapi man anak-anakna e enggo menyakiti pusuhna tuhu-tuhu. Kejahaten verbal enda banci erkiteken latih, melala masalah, komunikasi la sikap rsd. Emaka hati-hatilah, ukurilah mbages-mbages ope lenga ibelasken.

Peduaken, beluh njaga lagu langkahna tetap bersih sue ras pengajaren agama sialokenna, moralna teruji. Peteluken, beluh engkuasai diri, lit self control, beluh mabaken bana baik arah carana ngerana la sembarangen, pentar dingen sikap melasken kata-kata simembangun labo ncikuraki, menebar berita hoax, mpegebuken keadan, nontari, nuriken hal-hal simaba perubaten tah pe minem-minem sierbahanca kebenen kesadaren diri. Peempatken, beluh mereken pengajaren, usihen uga cara ngkelengi isi jabuna.

Ngajar ise pe beluh tapi saat pengajaren e teridah, teruji, ibas kegeluhen singajari e. Meteh melala pangan ntabeh la erbahanca kita besur, tapi panlah, nanamilah maka pangan e mereken gegeh man banta. Meteh dame la mengubah keadan tapi lakokenlah gia kitik maba keadan lebih baik dari sebelumna (Bnd. Titus 2:3-5). Sekalak moria pasti mengalami sada pembaharun nggeluh saat mengalami perjumpan ras Tuhan. Sekalak silit hubungen intimna ras Tuhan pasti kualitas nggeluhna berbeda ras kalak pada umumna.

Senina dingen turang, Masmur 131 enda engkuhi kualitas nande simereken kedamen guna ngelengkapi bahan invocatio ras ogenta idatas ndai. Ija masmur enda masmur ziarah Daud. Sada arak-araken simbelin ibas ingan sindauh nari bengket atena beribadah ku Jerusalem. Ibas masa perdalanen me masmur enda iendeken, uga ia nggejabken penemami ras pengarak-ngarak Tuhan ibas ia erdalan suari ras berngi. Gia mungkin latar belakang masmur enda itulisken guna menangkal fitnah-fitnah pengikut raja Saul ras para pengawalna maka Daud enda haus kekuasaan alu dalih ketetepan ilahi ia merebut kekuasaan ibas tan Saul nari. Daud menyangkal sienda kerina arah masmur enda.

Ibas ayat 1a, lit pengulangan kata keterangen simereken penekanen ras ncidahken sada tekad sibulat ras nutus. Penggunan istilah “hati/ukur”, “mata” dan “ngayaki /berjalan) bagi siikataken Briggs ibas tafsirenna ipahami sebage pernyatan kiniteruken ukur siterwujud arah pusuh, cara pandang ras pola nggeluh. Pemazmur ertekad tutus njaga pusuh, mata dan pola hidupna ibas kiniteruken ukur dan mpedauh hal-hal sierbahanca meganjang ukur. Njaga kiniteruken ukur arah kerina kegeluhenna. Njaga pusuh segelah nilahi kai si la ngena ate Tuhan. Moria simereken kedamen e teridah arah kiniteruken ukurna.

Ayat 1b dan c banci ikategoriken sebage paralelisme sinomin, ija lit ungkapen “aku la meganjang ukur” isejajarken sinonimna alu ungkapen “la megombang pe”. Bage pe ungkapen “perkara-perkara simbelin” (1d) isejajarken secara sinonimna alu ungkapen “perkara-perkara simetahatsa” (1e). Penggunan paralelisme sinonim ibas ayat 1 ini menekanken upaya pemazmur njaga kesederhanan ibas ersikap sebage upaya melihara kiniteruken ukur ras la terjerumus ibas upaya penonjolan diri.  Leslie C. Allen nambahken penekanen ibas ayat 1 ija pemazmur sedar kerna keterbatasenna dirina.

Ayat 2 imulai alu kata  “lo” (jika tidak atau sesungguhnya) sibanci iartiken sebage ungkapen sumpah ibas bentuk positif seh maka bagin enda nuduhken sada tekad kuat pemazmur guna mpeteneng ras mpetetap pusuh ukurna ras tendina. Ertekad ia maka ipeteneng ras ipetetapna pusuh, ukur tendina sebage bagin disiplin nggeluh ibas kiniteruken ukur. Ibas ayat 2 enda pemazmur menganalogiken dirina sebage sekalak anak dame ibas ampun nandina (seperti anak yang disapih berbaring dekat ibunya). Gaya sastra ibas ayat 2 enda eme paralelisme emblematik ija pemazmur mpergunaken sada perbandingen guna mpersadaken dua arah dua kegeluhen siberbeda. Ianalogikenna dirina sebage anak isapih ras medem ibas ampun nandina. Anderson ngungkapken erpalasken II Makabe 7:27,  anak si isapih e biasana umurna 3 tahun.

Metafora anak siisapih tuhu menarik, perban gambaren enda lit dua sisi. Pertama, gambaren enda iartiken anak sienggo puas minem susu nandina maka gambaren puas ras besur enda ncidahken gambaren pemeliharan Dibata. Tah, sebalikna anak siisapih ncidahken maka anak e tetap perlu kebutuhen pangan baik susu ras suplemenna. Ia perlu erlajar puas alu kai sialokenna sanga ndher ia ras Tuhan seri bagi ia ndeher ibas ampun nandena. Gottried Quell mengungkapken bagian enda merupaken gambaren kerna anak sigendong nandena ibas perdalanen nandina bas perdalanen ziarah ku Yerusalem. Nande simereken kedamen e teridah arah uga nyaman, tenangna, tercukupina kebutuhen lahir batin seisi jabuna (khusuna anak-anakna).

Ernalemlah (berharaplah) man Tuhan, genduari nari seh rasa lalap. Penggunaan kata ‫yachal : Berharaplah, ibas bentuk imperatif tunggal maskulin. Bentuk imperatif biasana mindo tindaken segera ras banci ka nuriken sura-sura ras harapan singerana. Jadi bagin enda harapen ras ajaken pemasmur man bangsa Israel man Tuhan. Situhuna la lit kesejajaren antara ayat 3a (O Israel, ernalemlah man Tuhan) ras ayat 3b (genduari nari seh rasa lalap) tapi biasana gaya enda igelari paralelisme sintetik, ija bagin b (peduaken) merupaken lanjuten arah bagin a (pertama).

Ernalem man Tuhan genduari nari seh rasa lalap ncidahken maka pertolongen Tuhan la saja I doni tapi she rasa lalap. Nande simereken kedamen e la terjeng doni saja ngenca perayakenna tapi me seh rasa lalap. Dame I doni ras I surga, selamat lahir batin. Sekalak nande arusna ngukurken kesejahteraan jabuna la saja genduari tapi she rasa lalap. Pangan daging kula e mehuli tapi pangan pertendin e pe perlu.

Selamat minggu moria

Selamat jadi nande simereken kedamen.

Mari sisampati nande i tengah jabunta sekalak-sekalak gelah jadi nande simereken kedamen.

Ula pediat ia erjuang sisada ibas mereken kedamen e man keluarga, gereja ras masyarakat.

Amin.


Pdt. Daud R. Tuahta Sembiring, S.Th

GBKP Runggun Namorambe

_____Klasis Medan Namorambe_____

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba