Sermon PJJ 11 – 17 Oktober 2020 // 1 Johanes 4 : 16b – 21 // Sehken kekelengen // Penjemaatan Unit Diakoni // Pdt. Christmas P. Ginting, M.Th, MH

Sermon PJJ 11 – 17 Oktober 2020 // 1 Johanes 4 : 16b – 21 // Sehken kekelengen // Penjemaatan Unit Diakoni // Pdt. Christmas P. Ginting, M.Th, MH

Bahan Sermon Guna PJJ Tanggal 11 – 17 Oktober 2020

Nats    : 1 Johanes 4 : 16b – 21

Tema  : Sehken kekelengen  ( Penjemaatan Unit Diakoni)


  1. Kata Perlebe

Min sikeleng-kelengen kita k’rina, bagi pedahken Jesus bas Pustaka, sebab kai si pindo bas gelarNa, ib’re Dibata man banta. Enda merupaken refrein lagu KEE No. 281. Mungkin lagu enda menjadi salah sada lagu favoritta. Tapi apakah kesenangenta guna nggeluh si keleng-kelengen sebage “hakekat” kalak si tek enggo sidalanken?  Sebab melala kel Dibata mereken / ncidahken keleng ateNa man manusia subuk ibas nepa doni enda, mereken pasu-pasu arah kesehaten, pendahin, kegeluhen ras si paling nyata sigejapken eme mereken Jesus Kristus lako nebusi dosa-dosanta manusia. Kekelengen Tuhan Jesus jadi sada jaminen kepastin maka kalak si tek terkelin. Mbelin kel kekelengen Dibata man manusia erkiteken si e kita rutang sikeleng-kelengen sapih-sapih kita. Sipentingna man banta aminna ise pe La enggo ngidah Dibata tapi adi sikeleng-kelengen kita, Dibata ringan itengah-tengahta.

  1. Uraian Teks

Ibas PJJ-nta sendah rikutken Kata Dibata ngajuk kita guna ndalanken kekelengen. Sidalanken kekelengen, ia ringan ibas Dibata (ay. 16b), ertina kegeluhenna ikuasai sura-sura Dibata. Sebab kerina si irancang / ibahan Dibata e me guna kiniulin man tinepaNa. Ibas Padan Si Ndekah ipake kata “ahev”. kata enda nggambarken sada hubungen si sangat mendalam secara pribadi, akrab ras dekat. Arah istilah kata enda kalak si ndalanken kekelengen lit hubungenna si mendalam ras akrab ras Dibata, ntah pe ikataken ‘ringan ibas Dibata’ (indo; tetap berada di dalam Allah).

Kekelengen si lit ibas kita e arus serta, ertina kekelengen idalanken labo erkiteken sekedar ‘ikatan’ secara hukum (umpamana; ikaten perjabun), tapi lebih asa sie kalak si ndalanken kekelengen si rehna ibas Dibata nari arusna isertai ‘kerelaan menanggung derita’. Enda me hakekat biak kekelengen Dibata siiberekenNa man banta manusia, pang ndalanken kekelengen aminna pe ndatken kiniseran guna ncidahken kebenaren.

Kalak si erkeleng ate ibas ia lalit kebiaren (ay. 18), sebab kekelengen si serta erbahanca la kita mbiar ertina kalak si erkeleng ate lalit si terbuni ibas ia, tangkas ukur tangkas kata, teridah ibas perbahanen. Motif  ibas ndalankenca erkiteken si ndalanken kekelengen e enggo leben nggejapken kekelengen si rehna ibas Dibata nari.

Ukuren / standar Dibata ras manusia ibas kekelengen ndauh kel perbedanna. Nembeh ate (kebencian) ibas standar Dibata enggo termasuk sebage tindaken ‘pembunuhen’, sebab ije nari me rehna sura-sura si jahat. Sada kebohongen man kalak si tutus ngelakoken ibadah sebage bentuk kekelengenna man Dibata tapi lit denga elem-elem / nembeh ate ibas pusuh man senina (sesama manusia). Kalak si bage bali ras kalak si pekulah-kulah. Ibas standar Dibata maka sikap pekulah-kulah e pe enggo termasuk perbahanen si jahat ( Ay. 20).

Ndalanken kekelengen labo merupaken sada pilihen / alternatif ibas kegeluhen, tapi merupaken sada kearusen / perentah ibas Dibata nari ( ay. 21). Sebab kekelengen eme biak Dibata si paling mendasar guna ngaturken tinepaNa. Manusia idilo guna ngekelengi Dibata alu encidahkenca ibas engkelengi temanna manusia (band. 1 Kor. 13: 13).

  1. Pengkenaina

Sue ras temanta sekalenda : sehken kekelengen. Arah tema enda iajari dingen ipersingeti kita guna nggeluh ibas kekelengen, itengah-tengah jabu subuk bapa, nande ras anak-anak nggeluh sikeleng-kelengen. Rukur ras ndalanken kekelengen alu muat bagin nampati keluarga si perlu  man sampaten, nampati teman sada perpulungen, bage pe nggit muat bagin ibas dahin-dahin diakoni si aturken runggun subuk diakoni karitatif bage pe diakoni transformatif. Perlu si inget: maka adi si sehken kekelengen labo erbahanca kurang kinilitenta tapi tambah-tambah keriahen, sebab bas temanta terakap erkiteken nggo tersampat. Bage pe ibas gerejanta GBKP melala unit-unit pelayanen Diakoni (PAK, PPOS, YKPC, Komisi HIV/AIDS & NAPZA, YAKES GBKP, Badan Pusat CUM), erkiteken sie ergiah-giahlah min kerina ngawan perpulungen GBKP muat bagin nampati unit-unit pelayanen diakoni alu ikut notokenca, ndahisa, bage pe nampati dana ras si debanna.

Emaka selaku kalak si tek si perlu ibas kita eme njaga dingen ertanggungjawab ibas ndalanken kekelengen si ibereken Dibata man banta arah perbahanen tep-tep wari, aminna pe melala rintangen ibas ndalankenca. Terpuji gelar Dibata. Amin

 


 Pdt. Christmas P. Gtg, M. Th, MH

(GBKP Rg. Griya Rumah Tengah)

_____Klasis Medan Namorambe_______

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba