Khotbah Minggu Penjemaatan PAK Gelora Kasih, YKPD Alpa Omega ras PPOS // 11 Oktober 2020 // Pdt. Christmas P. Ginting, M. Th, MH

Invocatio      : “Tuhan si nangtangi kalak si ibas penjara nari, si pemedakken mata si pentang. Petedisna kalak si enggo guling, keleng ateNa man kalak si bujur (Msm 146:7b-8)

Ogen              :  Job 31 : 16 – 20   (Responsoria)

Khotbah        :  1 Petrus 1 : 22 – 23  (Tunggal)

Tema              :  “Ngkelengi Alu Bulat Ukur”

1. Kata Perlebe

Kekelengen eme si penting kal man manusia. Situhuna umumna jelma erusaha njadiken dirina jadi kalak si perkeleng. Sebab alu perkeleng e ia njadiken dirina erguna man kalak si deban. Bage pe kerina ka nge jelma erusaha gelah dame geluhna, sebab alu dame eme banci inanamina erti nggeluh enda ras sekaligus pe ia banci erguna man kalak si deban. Bagi sada ilustrasi perbandingen man banta eme: lit sekalak pernanden si enggo metua (jompo) dingen nggeluh si sada (mbalu). Ibas sada wari reh Permata nampati ia. Kenca jenari reh ka sekalak Permata diberu tergelar si Bungancole. Secara teratur tiap tiga Berastagi karaben ibabana pangan ras isapu / ibersihkenna rumah pernanden enda. Tapi pernanden enda La pernah ngataken bujur, malahen ia tersinggung ras merawa-rawa. Mawen-mawen irawaina si Bungancole, adi telat reh maba pangan. Bage pe jungut-jungut ia adi pangan La akapna entabeh. Tapi sikap Bungancole nandangi pernanden e tetap La berubah eme tiap Tiga Berastagi dahinna bagi biasa nandangi pernanden e. Tapi teman-teman Bungancole mamang atena, engkai maka si Bungancole lalap nggit nampati pernanden mbalu ras si enggo metua ndai. Nina Bungancole man temanna Permata: labo salah pernanden enda bicara bage pe perbahanenna, sabab aku nampati ia labo erkiteken ia mehuli bangku tapi erkiteken ia memerluken penampatku. Enda me kekelengen  si tuhu-tuhu si isehken Bungancole man pernanden si enggo mbalu e.

Emaka ibas minggu penjemaaten YKPD, PAK ras PPOS enda iajuk kita guna ncidahken kekelengen si tuhu-tuhu, labo ngkelengi alu pekulah-kulah ntah erbera-bera ibas dahikenca.

1. Isi Teks

Hal enda banci siidah ibas teluna teks minggu enda kerna kuga arusna sikapta selaku kalak si erkiniteken  ibas nehken kekelengen alu bulat ukur (agave), eme:

• Ibas invocationta (Msm 146:7b-8), icidahken Dibata uga IA erdiate (peduli) nandangi : keadilen si terjadi ibas kegeluhen kalak si tek. Hal enda banci siidah ibas Dibata erkeleng ate man kalak si kote, si kesusahen, ipetedisNa kalak si guling erdandanken perbeben, si medanggel alu erbage sebab, terkhusus siidah ibas teks enda eme keleng ateNa man kalak si bujur ibas nehken keleng ate e, sebab labo ngena ateNa pekulah-kulah.
• Bagi si ilakoken Job (ibas pengogenta) selaku kalak si mbiar man Dibata eme: ija tupung Job mejuah-juah denga ntah pe ope denga Job ngenanami kiniseran tetap denga ia kepate ras nampati kalak si musil, diberu balu-balu; anak melumang iberena man, ipebelin-belinna ras iajarina; iberena uis arah mbulu biri-birina man kalak si La ngasup nukur uisna; janah La ia nggit nipu sabab mbiar ia man Dibata. Kerina sie icidahken Job perban ietehna maka Dibata si tetap erkeleng ate man kalak si kote, si kesusahen, si medanggel alu erbage sebab, ras pe nggit IA ngkorbanken diriNa guna kegeluhen tinepaNa. Hal enda me siikataken ngkelengi alu bulat ukur.
• Perikop Khotbahta pe ipersingeti Rasul Petrus man perpulungen si enggo ipilih Dibata ras merap ibelang-belang Pontus, Galati, Kapodokia, Asia ras Bitinia, perban  iayak-ayak dingen  ngenanami kiniseran erkiteken kinitekenna man Yesus.  Salah sada ulu kiniseran e eme ibas penguasa pemerintahen Kaisar Nero sikejam. Tujun surat enda eme mpegegehi kerina kalak kristen ibas erbage ingan, gelah tetap megegeh ibas erkiniteken / megenggeng ibas kiniseranna. Ibas kecibal si bagenda me iarapken Rasul Petrus perpulungen gelah tetap geluh badia, tetap erkemalangen man Dibata, makeken kesempaten alu mehuli  ras geluh sikeleng-kelengen,  sebab nina: “kam enggo itebusi alu dareh Kristus si meherga “ (bnd. Ay. 19). Alu bage tanda kalak si erkeleng ate ras nggeluh badia nina Rasul Petrus man perpulungen  paksa si e arus teridah ibas ia :

1. “Kepatuhen” ngikutken pengajaren si tuhu-tuhu  ras “ mbersihken  diri” (ay.22)

Maksudna ngatakenca maka labo kepe kita ngasup ncidahken keleng ate alu bulat ukur adi la kin lit kepatuhennta ngikutken pengajaren situhu-tuhu ras pembersihen dirinta ibas dosa-dosa nari arah penebusen Kristus alu darehNa si mambur. Sabab Penebusen e mpeturah kepatuhen ibas kegeluhen kalak si tek. Alu bage kepatuhen si tuhuna jababen (respon) manusia nandangi lias ate Dibata. Bage pe kepatuhen e jine labo sempurna ibas kalak si tek, adi la kin lias ate Dibata ndai nge si ngkuhisa, gelah turah keleng ate situhu-tuhu nandangi teman si sada kiniteken (ertina lalit ije ukur erbera-bera, rayo-ayo, rsd).

2. Tubuh jadi manusia simbaru arah Kata Dibata singgeluh tetap rasa lalap (ay. 23)

Ertina arah kata Dibata eme jadi gegehta guna ngubahken kita jadi manusia si berbeda kasa si enggona, misalna dikune ibas paksa si enggo-enggona labo kita ngasup ngkelengi arah kata Dibata ngasup kita ncidahken keleng ate man temannta manusia; di kune sebelumna labo kita tutus ersembah maka alu penjemba kata Dibata e tambah ketutusenta ersembah man Dibata; rsd.

Jadi arah teluna bahan enda banci sisimpulken sementara maka tanda kalak si ngkelengi alu bulat ukur (la terpaksa ntah pekulah-kulah / erbera-bera) eme kalak si enggo tubuh peduakaliken janah ibersihken ibas kerina dosa-dosana nari, janah kegeluhenna tetap badia (sue kata ras perbahanen) ras erkiniteken man Yesus guna makeken kesempaten siibereken man bana alu mehuli.

3. Pengkenaina

Minggu enda minggu penjemaaten unit pelayanen Diakonia ibas gerejanta: YKPD Alpa Omega, PPOS, PAK Gelora Kasih, emaka iarapken man banta eme:

1. Sicidahken tandana kita enggo itebusi Kristus maka enggo lit keleng ate nandangi temannta eme: muat bagin arah pertoton, mereken penjemba, ndahisa ras nampatisa alu erbage bentuk kekelengen, bage pe ngaturken jadwal kunjungen nandangi unit-unit pelayanen Diakonia si lit bas gerejanta GBKP enda.

2. Metedeh ateta maka kita pe banci ngusih kiniulin ras kekelengen siicidahken Job ibas geluhna. Bagi nina pepatah ngataken: “orang yang selalu berlutut dihadapan Tuhan mempunyai tangan yang tidak terkepal”, maksudna adi kalak si erkiniteken si ersembah man Tuhan maka teridah arah tanna si melumbar mere man kalak si kote.

3. Sue ras temanta: “Ngkelengi alu bulat ukur” ertina ngekelengi si rehna arah kiniteken man Yesus, La kita mbiar ngkelengi sebab ibas keleng ate si tuhu-tuhu lalit kebiaren (bnd.1Joh. 4:18)

4. Bagi kata bijak : “Tuhan tidak menuntut dari apa yang kita punya, tetapi menuntut dari apa yang ada pada kita”

5. Galati 6 : 9; “Emaka ola min kita erleja-leja erbahan si mehuli, sabab adi tetap tutus ateta ndalanken sie, seh me paksana siperani ulihna”.
6. 1 Johanes 4 : 19-20; “Kita ngkelengi sabab leben IA ngkelengi kita. adi lit kalak si ngatakenca maka keleng atena Dibata, tapi nembeh atena seninana, kalak si bage  perguak. Sabab kalak si la ngkelengi seninana siidahna, labo tuhu ia ngkelengi Dibata si la idahna”.

Pdt. Christmas P. Ginting, M. Th, MH

(GBKP Rg. Griya Rumah Tengah)

          ________Klasis Medan Namorambe____________