Sermon PJJ // 04-10 Oktober 2020 // Moria Si Paguh // Masmur 16:5-11 // HUT Moria // Pdt. Elisabeth Br Ginting

Sermon PJJ Tanggal 04-10 Oktober 2020

Moria Si Paguh (Masmur 16:5-11)

(HUT Moria: 16 Oktober 1957 – 63 tahun)

_____________________________________

Masmur enda eme pertoton si nuriken pengakun kerna ketetapen ukur si merupaken buah kiniteken. Kemungkinen tupung nulisken bagin enda, raja Daud ngidah kegeluhen bangsa-bangsa si ersembah man berhala, seh maka ibandingkenna ras dirina si ersembah ku Tuhan Dibata saja. Em sabapna ikatakenna maka Tuhan kap kebayakenna, si mereken kerina keperlunna (ay.5) sedangken kalak si ersembah ku dibata-dibata sideban melala maba kesusahen man dirina jine (ay.4). Khusus pe man kalak Lewi, si la ndatken warisen/tading-tadingen dingen ngendesken dirina guna erdahin ibas rumah pertoton, Tuhan me kap kebayakenna! Emaka pertoton enda mewakili kerina kalak si ersembah ku Tuhan. Selaku sekalak raja, Daud nggejapken maka tupung ngalaken perbeben ntah pe imbang-imbangna, Tuhan kap si mabai dingen ngajari ia, emakana ipujina me Tuhan alu pusuh si ersurak-surak, sebab adi ndeher ras Tuhan kap ngenca maka igejapna ia paguh.

Genduari enda pe kita nggeluh la terlepas arah perbeben-perbeben si mpeturah kearun ate, tapi ogennta enda ningetken kita kuga raja Daud nggejapken maka adi ndeher ras Tuhan ngenca maka paguh ngalaken kai pe. Marakna pinakit sosial, narkoba, pergaulen bebas ras penyalahgunaan media sosial genduari enda pe jadi perbeben ka nge bas geluhta, apai ka bas ngepkep anak-anak singuda denga. Kerina e la banci ihambat perkembangenna adi la kin radu-radu ras kerina membentengi diri, emaka iperluken ije peranan nande guna mpersada arih ras bapa i tengah jabu mbimbing anak-anak generasi penerus. Sehubungen ras HUT Moria, nande i tengah gerejanta, si pe-63 tahunken. Nande si erkiniteken tentu mbelin kal pengaruhna ibas jabu, sebab adi nande erkiniteken seisi jabu pe ratur, tapi adi lang tentu kacau seisi jabu. Sekalak nande si erkiniteken tentu labo gegehna jine ipenalemna, tapi ernalem ia man Dibata sebab tek ia ibas Tuhan nari ngenca idatkenna gegeh bas ngalaken erbage-bage tantangen e. Tangtangna ndube kategorial Moria enda ibentuk bas masa misionaris Belanda ertujun guna nambahi keterampilen nande/diberu kalak Karo, emaka tanggal 16 Okt 1957 Moria isahken jd kategorial pernanden i gereja. Pengarapennta bas umur si pe-63 tahunken enda reh paguhna kerina Moria bas erkiniteken dingen tetap ngasup jadi kemalemen ate subuk i tengah jabu bagepe i tengah gerejanta. Amin

Pdt. Elisabeth Br Ginting, M.Th

(GBKP Rg. Gedung Johor)

____Klasis Medan Namorambe____