Khotbah Minggu Kenca Trinitatis // 04 Oktober 2020 // Minggu Guna Ngergaken HAM // Johanes 8:1-11 // Bahanlah Singena Ate Dibata // Pdt. Elisabeth Br Ginting

Invocatio   : “Cilaka me kam, o kam si nalihken kebujuren si pentar jadi nggeduk, dingen ndampesken kebenaren ku taneh” (Amos 5:7)

Ogen          :Esekiel 18:7-9 (Tunggal)

Johanes      :Johanes 8:1-11 (Tunggal)

Thema       :Bahanlah Si Ngena Ate Dibata

___________________________________

Piga-piga bulan si lewat, i Jakarta Utara lit terjadi pembakaran hidup-hidup nandangi sekalak transgender. Peristiwa enda terjadi, ilatarbelakangi nembeh ate sekalak supir truk si menuduh si transgender ndai nangko dompet ras handphone-na, erkiteken lalap la ngaku emaka si supir ndilo piga-piga temanna guna menganiaya si korban jenari isiram alu bensin ras solar, kenca bage icilukna, api menjalar ku daging kulana seh mate meseng. Adi kita rikutken kinitekennta kita isuruh menanggapi berita enda, kuga nge sikapta kalak Kristen merespon kejadin si ‘main hakim sendiri’ enda? Tentuna labo sebanding kal kesah sekalak jelma si jadi korban e ibandingken ras barang si bene ndai, engkai? Kuga kin pengajaren Kristus kerna ngergaken manusia? Mari sipebagesi pengangkanta arah palas khotbah bagepe ogenta e ndai.

Palas khotbahta sekali enda ngerana kerna sada kejadin nandangi sekalak diberu si terdat erban dosa. Paksa si e Tuhan Jesus ngajar i lebe-lebe jelma sinterem, reh me guru-guru Undang-Undang ras kalak Parisi ibabana sekalak diberu si itangkapna asum diberu e erlua-lua. Jenari isungkunna man Tuhan Jesus, maka rikutken Undang-Undang isuruh Musa maka diberu si bage arus ibenteri alu batu seh mate sebagai ukumenna. Situhuna penungkunen enda isehkenna man Jesus guna ncubai/nguji IA gelah lit dalanna ngaduken Jesus. Sebab paksa si e, enggom lit sura-sura guna nangkap Jesus, janah enterem pemimpin agama Jahudi ras kalak Parisi pe menuduh Jesus nggo mabai kalak sinterem papak (7:47), bahkan sempat terjadi kelompok-kelompok bas sesama kalak Jahudi erkiteken deba ngataken maka Jesus eme Mesias si ipadanken, tapi lit ka deba si la tek (7:43-44). Emakana kesempaten enda me si ipakeken kalak e ndai, tapi kai si terjadi? Mungkuk Tuhan Jesus jenari isuratiNa taneh alu jari-jariNa, la minter ialoiNa penungkunen e ndai. Erkiteken lalap igegehi kalak e ndai nungkuni emaka nina Tuhan Jesus “apai kam si langa pernah erdosa, ialah lebe mentersa.” Kai si terjadi? Kepeken lawesen kalak ndai sekalak-sekalak, menaken arah si nggo metuana. Kenca jurgak Tuhan Jesus idahNa kepeken tading IA ras diberu e ndai je, la sekalak pe si ngukum diberu e. Emaka ikataken Tuhan Jesus “adi bage, Aku pe la kam Kuukum. Mulihlah ola bahan si la ngena ate Dibata.”

Arah kejadin enda banci si simpulken maka kalak Parisi bagepe kerina guru Undang-Undang e atena mempertentangken Tuhan Jesus ras Undang-Undang (Hukum Taurat) rikut pe hukum si berlaku paksa e. Bas Hukum Taurat diberu si terdat erlua-lua arus iukum alu menteri batu seh mate, menam bali ras tindakan “main hakim sendiri” bas zaman si genduari tapi rikutken hukum kalak Roma, si paksana erkuasa i tengah-tengah kalak Jahudi, hukum si bage rupa la ibenarken.  Emakana jawaben Tuhan Jesus me si menentuken kai dalan-dalan kalak Parisi ras guru Undang-Undang e ngaduken Tuhan Jesus. Tapi kepeken la bagi siniarapkenna, jawaben Tuhan Jesus justru ngajarken man kalak Farisi ras guru Undang-Undang e kerna ngergaken sesama manusia. Memang diberu e erdosa, tapi tetap ka nge manusia labo banci ipeseri ras asuh-asuhen si banci katawari pe ibunuh adi la bagi ukur/ersalah. Jawaben si ibereken Tuhan Jesus e, menekanken aspek moral, si la lit kaitenna ku hukum Taurat ras pe hukum sipil Romawi, seh maka la lit dalan kalak ndai ngaduken Tuhan Jesus. Ibabai Tuhan Jesus kalak e ndai kerina ngukurken persoalen e rikutken pertimbangen moral, kuga nina secara hati nurani. Dungna, gia la akap kalak e cocok jawaben e tapi la lit dalanna mempersoalkenca, dingen lanai ia beluh pe nanggapisa, piahna itadingkenna diberu e ndai ras Tuhan Jesus.

Minggu enda igelari Minggu ngergaken Hak Asasi Manusia (HAM), si ningetken kita gelah ertanggungjawab njaga kemulian ras kinihagan Dibata ibas diri manusia. Alu kata sideban, kita manusia bekas tinepa Dibata si ijadikenNa sue ras tempasNa, emaka arus me kita ngergaken kegeluhen ras ngergaken temannta manusia, la banci ‘main hakim sendiri’ si e me si igelari Hak asasi manusia. Ija kerina manusia bage kenca ia tubuh, lit hak si melekat bas dirina sebab ia manusia, kai e? eme hak mpertahanken kegeluhenna, hak iperlakuken secara adil (setara dilaki-diberu), hak guna ndarami kemalemen ate, hak guna beribadah ras hak guna njagai harga diri/martabat.

Tema-ta eme “Bahanlah Si Ngena Ate Dibata” ningetken kita ercurmin arah diberu e ndai gelahna ola erban dosa, dingen pe ngajuk kita gelah min engkelengi dingen ngergaken temannta manusia la bagi kalak Parisi ras guru Undang-Undang ndai. Kinatana, enterem kalak bahkan kalak Kristen pe si lenga ngasup ngergaken dingen engkelengi temanna manusia, banci jadi erkiteken mempertahanken kehormatenna/nama baik, demi jabaten, demi kepentingen diri sendiri/jabuna. Piah dungna mawen si terjadi : mempersalahken si benar, membela si salah. Banci ka pe, erban keadilen man kalak si la menguntungken tapi memenangken kalak si mereken keuntungen, la soal apakah kebujuren ntah lang siidalankenna, si e la ngena te Dibata bagi si iberitaken nabi Amos arah Invocatio-nta ndai. Janah ingetlah, kalak si ndalanken kebujuren, si la nipu/ngerampas hak kalak, si ndalanken kekelengen, si bageme si ikataken patuh man perentah Tuhan, dingen nggeluh me ia, bagi isi ogenta. Emaka teridah min kebujuren ras keleng ateta man kerina temannta manusia segelahna atan kita nggeluh guna jadi kemulian gelar Tuhan. Amin

Pdt. Elisabeth Br Ginting, M.Th

(GBKP Rg. Gedung Johor)

____Klasis Medan Namorambe______