Perpulungen Jabu-Jabu GBKP II 27 SEPTEMBER – 03 OKTOBER 2020 II Setialah Man Tuhan II Pdt. Antonius Tarigan, S.Th

Perpulungen Jabu-Jabu GBKP II 27 SEPTEMBER – 03 OKTOBER 2020 II Setialah Man Tuhan II Pdt. Antonius Tarigan, S.Th

Supelemen Bahan PJJ GBKP,

27 SEPTEMBER – 03 OKTOBER 2020

Tema : Setialah Man Tuhan

____________________________________  

Tanah si bakal ibengketi bangsa Israel, eme tanah Kanaan, labo kosong ntah pe sama sekali la lit si ngianisa. Sope bangsa Israel mengketi Tanah Kanaan nggo lit kalak si tading ije eme kalak Kanaan. Perlu icatat maka kalak si ikataken sebagai kalak Kanaan eme lit ibas piga-piga suku bangsa alu jumlah sistem sosial-budaya ras keagamaan si umumna terkait kubas  kegeluhen pertanian ras perkotan. Sementara bangsa Israel ibas arti tertentu merupakan bangsa “nomaden”, pengembara alu pola hidup peternakenna. Ertina asum mengketi tanah Kanaan, bangsa Israel pasti jumpa ras berinteraksi ras kalak Kanaan e. Termasuk “berinteraksi” ras tradisi -tradisina. Hal biasa adi bangsa Israel “melirik-lirik” erbage praktek sosial-budaya-keagamaan sini ilakoken bangsa Kanaan e. Erkiteken  sie me TUHAN mereken perentah man bangsa Israel ola nggit erlajar ntah pe ngelakoken perbahanen si mbau  iakap Tuhan.  Ibas Nats oratenta enda lit piga-piga perbahanen si mbau sini ilakoken bangsa Kanaan si arus ihindari bangsa Israel eme: mpersembahken anak-anakna ibas api ibabo batar-batar, ertendung, ngoge tanda-tanda, mpergunaken mang-mang, make guna guna, nungkun man begu kalak si enggo mate. Mempersembahken anak-anak sebagai korban ibas api eme merupakan tradisi Kanaan si biasa ilakoken sebagai penghormaten/penembahen man dewa Molokh, ilah sini isembah bangsa Amon ras Fenisia, janah kemungkinan besar ipercaya sebagai dewa kesuburan tanah (pertanian). Persembahen kempak dewa Molokh enda merupaken bentuk penembahen berhala si seh kel nembehna ate TUHAN (nen. Ul. 12:31). Piga piga kalak Israel ibas jaman raja-raja ngorbanken anakna (nen. 2Raj. 16:3).

Raduken ras pelaksanaan ritual si mbau e lit ka kegiatan ertendung ntah ngoge tanda-tanda, ermang-mang, make guna guna, nugkun man begu kalak sienggo mate. eme merupakan hal si enggo biasa teridah ibas negeri e. Engkai maka nembeh kel ate TUHAN kalak singelakoken praktek-praktek sosial-budaya-keagamaan sie sebab jelas jelas kalak e enggo nalihken ukur manusia ibas TUHAN nari, ras em ikataken sebagai penembahan berhala. Erkiteken  sie TUHAN ngelarang keras bangsa Israel erlajar, ntah pe ngikuti, ras ngelakoken kebiasaan kalak Kanaan e. Musa merentahken bangsa Israel gelah nggeluh setia man TUHAN alu bulat ukur.

Ibas PJJnta enda kita ngerana kerna Teknologi Informasi ras Okultisme. Maka kata Tekonologi lanai bo asing kel man banta, sebab tahun enda pe gerejanta memasuki tahun Teknologi Informasi. Ija Teknologi informasi eme alat si ipake guna nampati manusia, ibas erbahan mengubah, nimpan, ngkomunikasiken ras menyebarken informasi. Janah kata Okultisme asal katana “occultus” (bhs: Latin) si ertina tersembunyi, rahasia, gaib, misterius, gelap, ntah pe kegelapan. Alu bage okultisme banci iertiken sebagai paham si menganut ras mpraktekken kuasa ras kekuaten ibas dunia kegelapen ntah pe dunia roh-roh jahat. Praktek Okultisme mbue ipraktekken kalak labo hanya ibas i kuta-kuta tapi pe ibas i perkotaan, termasuk kota metropolitan. Labo hanya masyarakat kecil, tapi pe kalak bayak, kalak terpandang, pengusaha pejabat bahkan  kaum itelektual pe lit singelakoken praktek okultisme enda. Isekelewetta pe ntah lit praktek-praktek ramalan nasib, sihir, ras erbage bentuk sideban, janah la sitik si  tersesat erkiteken sie. Ibas jaman TI (Teknologi Informasi enda pe praktek sibagenda rupa lit denga justru menjadi viral ras isenangi. Sebagai contoh; Praktek pengobatan Ningsih Tinampi, Kiyoshi anak Indhigo, Mama Loren (nggo mate; mungkin lit sinursurna). Kalak Kristen iperentahken gelah nadingken kebiasaan e, termasuk kebiasaan kebiasaan ertoto nandangi roh kalak si enggo mate. Jiarah ku kuburen labo salah tapi labo lit oratna tangis, ras ngerana man kalak si enggo mate ntah i kuburen sebab enggo kita ngelakoken praktek okultisme janah mbau iakap TUHAN. Bagepe ibas kita ketergantungen nandangi pemaken HP, Android, Ipad, enda merupaken bentuk praktek Okultisme, sebab enterem kalak ibas jaman gundari enda adi la ijemakna HP androidna sada wari saja nggo gelisah, dikune bene ntah pe tading HP na gulut kal iakapna, lalit ketenangenna. Hati hati kita.

Lit piga piga akibat man kalak si ngelakoken praktek Okultisme

Akibat secara rohani;

Serangan depressi, misalna sekalak si hanyut kubas sada  kesedihan tanpa alasan. Lit ibas tekanan, icekam, perasaan mbiar man sekelewetna. Sikap tertutup keras terhadap kata Dibata. I gereja pe mesukah kel munduk-unduk ras terpedem, mulih kari igereja nari segar  kel dagingna. Gejala enda labo seri nandangi tep-tep kalak. Kalak siterlibat ibas dunia okultisme la metedeh atena Kata Dibata mungkin iogena tapi la ia mengerti. Adi ngoge buku-buku si deban la ia munduk-unduk ras terpedem.

Akibat secara psikologis/mental:

Pikiran bunuh diri megati sendalanen ras depressi. Inget Saul ras Yudas Iskariot si mengakhiri geluhna. Gejala  si deban lit kebiaren si la normal. Mbue hal isekelewetna si erbahanca ia mbiar, labo mbiar man Tuhan tapi mbiar si aneh aneh ras la wajar, mbiar erdalan mentasi kuburen, ingan keramat, mbiar sora-sora si aneh rsd.

Akibat secara fisik:

Urat syaraf terganggu, erkiteken mpraktekkan okultisme secara aktif. Lit ka erkiteken faktor alamiah umpamana penuaan, kemandulan ras kematen la wajar, eme kematen lenga seh waktuna ( Kel 23:24-26). Tentuna labo kerina kemandulan erkiteken praktek okultisme.

Akibat dalam keluarga:

Kekacauan terjadi ibas keluarga, ija kerina jadi kacau. Keluarga Yakub jadi kacau, erkiteken ibas rumahna lit dewa asing ras anting-anting keramat sebagai jimat. Kekacauan e berakhir kenca iambekken benda e ibas rumah e nari ( Kej 34:1-35, kususna Kej 35:1-5).

Akibat nandangi kesusuren berikutna:

Kesusurenna jadi kacau ras terkutuk, la normal, cacat, sial, terlaknat ras terhukum turun-temurun ( Bdk Kel 20:4,5).

Akibat nadangi kegeluhen sirasa lalap:

kalak si terlibat okultisme maka ia la jadi ahli waris Kinirajaan Dibata ( Gal 5:20,21), justru iambengken kubas api si la ernimpet-nimpet (Bd Ket. 21:8, 22:15).

Arah PJJnta  sendah enda iajuk kita kerina kalak si erkiniteken man Tuhan gelah tetap setia man Tuhan. Kiniteken si enggo si iyakini kita e, sigelem gelah ola pulah amina gia erbage-bage isekelewetta siberusaha guna mempengaruhi kita, tapi kita tetap setia man Tuhan saja ngenca.

 

Pdt. Antonius Tarigan, S.Th

GBKP Rg. Lau Cih

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba