MINGGU NOTOKEN SERAYAN I II KENCA TRINITATIS II 27 SEPTEMBER 2020 II Pdt. Antonius Tarigan, S.Th

MINGGU NOTOKEN SERAYAN I II KENCA TRINITATIS II 27 SEPTEMBER 2020 II Pdt. Antonius Tarigan, S.Th

MINGGU NOTOKEN SERAYAN I (KENCA TRINITATIS)

27 SEPTEMBER 2020

 

Invocatio       : Ola suhsahi bangsa pilihen-Ku ola bahan jahat man nabi-nabingKu” (Masmur 105:15)

Ogen               : Josua 1:16-18

Khotbah         : Heber 13:15-19

Tema              : Patuh Dingen Tetap Ertoto Kerna Serayan Tuhan

__________________________________________

Mejuah-juah man banta kerina, ibas minggu enda sibengketi Minggu notoken serayan Tuhan, sada penungkunen man banta selaku ngawan niperpulungen, pernah nge sitotoken serayan Tuhan i tengah-tengah gerejanta? Yah banci saja lit singatakenca ninta pernah deba la pernah. Sada hal lebe isehken man banta maka serayan Tuhan eme hanya manusia biasa, ia labo sempurna, mbue keterbatasen ras kekurangen janah la luput ibas kesalahen. Emaka adi la kin itumpak-tumpak perpulungen e alu pertotonna, bagepe la patuh si ikatakenna (nogani), labo ia ngasup ndahiken dahin si mbelin e. Arah kebaktin mingguta ibas Minggu Notoken Serayan Tuhan enda iajuk kita selaku ngawan ni perpulungen guna  Patuh Dingen Tetap Ertoto Kerna Serayan Tuhan.

Penjelasen Nats

Ibas invocatio icidahken uga belinna keleng ate Tuhan man bangsaNa ras nabi-nabiNya. Ola suhsahi bangsa pilihenKu, ola ban jahat man nabi-nabingKu”. Dibata mpekena-kena bangsaNa Israel ras menjamin keselamaten bangsa e. Maka ibas ayat e tempa-tempa ngataken bahwa ise nuhsahi ras erbahan jahat kempak bangsa Israel, Dibata sendiri akan bertindak ras  membela bangsa e ras nabi-nabiNa.

Ibas pengogenta si pemena  Josua nerusken pendahin si mbelin, tentuna dahin e labo gampang. Ija Josua ibereken tugas mulia maba tongkat estafet si ndube ibaba Musa guna iterusken seh  ke taneh Kanaan. Janah nats ogenta enda eme bagin ibas perentah Josua kempak singaturken pasuken Israel guna ndalani kerina perkemahan ras nikapken bekal ibas ngepari Lau Jordan kidekah 3 wari guna ngkuasai Tanah Kanaan. Janah Josua pe mpegegehi kalak enda alu ngataken:  Tuhan Dibatandu mereken Taneh si arah Timur lau Jordan enda man bandu jadi inganndu tading. Josua tuhu-tuhu bertindak selaku peminpin si mabai bangsa Israel gelah tetap semangat ras alu yakin nandangi penyertaan Tuhan ibas merebut taneh si ipadanken Tuhan man bana.

Respon bangsa Israel nandangi perentah Josua eme si isingetken ibas nats ogenta  Josua 1:16-18, eme ndalanken Perentah Josua. Asakai si ikatakenndu man kami banci idalanken kami, janah nggit kami lawes ku japa pe kami isuruhndu. Janah nggit kami patuh man bandu bagi perpatuh kami man Musa. Tuhan Dibatandulah sinemani kam bali ras penemaniNa Musa. Ise si la nggit ngakui kuasandu ntah pe la patuh man perentahndu la banci la ibunuh. Tetaplah ukurndu janah teklah. Hal enda ncidahken dukungen si mbelin si isehken bangsa enda kempak Josua ibas nggantiken kepemimpinen Musa. Janah labo hanya terjeng sie justru bangsa Israel pe mpegegehi Josua hal enda teridah arah perkataan : “Tuhan Dibatandulah sinemani kam bali ras penemaniNa Musa”. “Tetaplah ukurndu janah teklah”.

Surat  Heber enda eme Surat ialamatken sipemenana nandangi kalak Jahudi si enggo  jadi pengikut Kristus. Ia enggo ngaloken janah jadi pengikut Kristus, tapi erkiteken lit terjadi kiniseran si mberat berupa penganiayaan, subuk secara kehidupan sosial bage pe secara fisik, subuk arah pihak bangsa Jahudi ntah pe bangsa Romawi. Em erbahanca ia enggo mulai ragu ras goyah ibas kinitekenna man Kristus janah mulai mpertimbangken mulihi guna mulihken ku agama Jahudi. Alu bage Surat Heber mereken pergegeh ras  peneguhen ras ngingetken kalak enda segelah tetap erkiniteken man Yesus Kristus, ras tetap jadi kalak Kristen. Erkiteken sie me ibas kitab Heber enda icidahken kesempurnaan Kristus sebagai keselamatan ras kegeluhenNa si ndauh lebih unggul ras sempurna asangken ise pe ibabo doni enda. Penulis Heber menyatakan identitas sejati Yesus selaku Tuhan Allah. IA me Penguasa Tertinggi. IA lebih mulia asangken agama ntah pe malaikat siapai pe. IA ndauh ganjangen asangken pemimpin Jahudi siapai pe (mis: Abraham, Musa, ntah Josua) ras ndauh ganjangen asangken Imam ras nabi nabi siapai pe. Janah Ibas nats  khotbahta sendah enda eme piga piga nasehat ibas cara nggeluh si tep-tep wari ras nasehat moral.

Ibas ayat 15-19 ituriken; (ay15) E maka tetaplah sehken puji-pujin man Tuhan Dibata katawari pe, si jadi persembahenta arah Kristus, eme persembahen arah babah si ngakui maka IA kap Tuhan. Enda ertina maka persembahen si isehken kita lanai bo guna korban pengalemi dosa tapi pe korban pengataken bujur sebab korban pengalemi dosa enggo sempurna ilakoken  Yesus. Emaka ijenda kita iajuk harus tetap nehken puji-pujin man Tuhan, sebagai bentuk persembahenta man Tuhan ibas keselamaten si enggo sialoken. (ay.16) Ola lupa erbahan si mehuli dingen sisampat-sampaten, sabab sie me persembahen si ngena ate Dibata. Uga hubungenta nandangi kalak si deban arus si cidahken alu mehuli, nggit sisampat-sampaten dingen sikeleng-kelengen. Dingen bage kiniersadaan sapih-sapih kita tetap paguh. (ay.17) Patuhlah kam man peminpinndu janah ikutkenlah katana. La erlatih-latih ikep-kepna pertendinndu, sabab ia ertanggung jabap man Dibata. Arah kepatuhen eme mpeturah keriahen ukur. Desken orang tua pe nandangi anak-anakna tuhu malem kal ate orang tua adi anak e patuh nandangi kai si ikatakenna, nambahi megedang me umurna. Tapi justru sebalikna adi la lit kepatuhen e mabai kecedaan atena. Bage me pe sekalak pemimpin malem kel atena dingen semangat ia ndahiken dahin e adi patuh sini ipinpinna e, janah mbue hal banci idahikenna guna kiniulin perpulungen e, tapi  dikune la patuh ceda atena ndahi dahin e, ras la lit gunana. (ay.18) Tetaplah ertoto kerna kami. Tek kami maka bersih pusuh peraten kami, sabab lalap nge kami ersura-sura ndalanken si mehuli. Dukungan doa tetap iarapken serayan Tuhan  ibas perpulungen e nari. Sebab e kap gegeh/kekuaten man bana ibas ndahiken dahin Tuhan. Sabab notoken serayan Tuhan e merupaken tanggung jabab ibas perpulungen nari, labo lit sura-sura si ilat ibas serayan Tuhan nandangi perpulungenNa. Sebab kai sini idahikenna e eme dahin si mulia, pendahin Tuhan kap. (ay.19) Tole kupindoken man bandu, maka ertoto kam man Dibata gelah banci pedas aku mulih ndahi kam. Ajaken man perpulungen guna tetap ertoto man Tuhan segelah perpulungen e pe ndatken gegeh ibas Tuhan nari. Bagepe arah pertotonna man Dibata lit pengarapen penulis gelah pedas mulih ndahi perpulungen e.

 

Aplikasi

Tema kebaktin Mingguta eme Patuh Dingen Tetap Ertoto Kerna Serayan Tuhan. Kata Patuh ibas KBBI ertina: suka menurut; taat; berdisiplin. Berarti ijenda iajuk gelah perpulungen e menurut, taat ras disiplin, dingen pe tetap ertoto kerna serayan Tuhan. Pertoton perpulungen mbelin kal pengaruhna man serayan Tuhan e, sebab e mabai ia megegeh, semakin bijak, la meganjang rukur, semangat, ras pentar ibas ndahiken dahin Tuhan e. Erdandanken sie dikune lit kekurangen/kelemahen ibas serayan Tuhan e, ola lebe langsung perpulungen e memponis/mengkambinghitamken serayan e. Mari ercurmin kita lebe, enggo nge lit alu patuh kita notoken serayan Tuhan guna mendukung ia ibas pelayanenna? Asum i iahken serayan e kita guna reh ku perpulungen, Gereja, PA ras sidebanna, sidalanken nge? Patuh kin kita? Ola kari man iah-iahen lalap, nggo pe tande piga bulan ras tahunna lalap man iah-iahenken tapi la enggo menggep. Tapi dikune lit keperlunta ibas gereja e kurang mejingkat siakap serayan Tuhan e ndahikenca. Adi nina ibas invocatiota ibas Masmur 105:15 “Ola suhsahi bangsa pilihenKu, ola ban jahat man nabi-nabingKu” enda ertina maka kita selaku ngawan perpulungen harus patuh nandangi serayan Tuhan e, ula suhsasi ras ola jahati ia. Adi lit kin perpulungen segat atena serayanNa maka segat atena Tuhan e, janah kalak sibage labo dat pasu-pasu. Tapi dikune lit perpulungen e patuh ras notoken serayanNa, Tuhan erngena ate man bana.

Lit sada keluarga Kristen, ibas sekali paksa itenahkenna me panditana gelah reh ku rummahna lako makan malam. Kenca enggo dung makan malam, pamit me pandita e mulih ku rumahna. Kenca mulih pandita ndai nungkun me sindehara kempak perbulangenna, lit ndai idahndu sen kutamaken ibas amplop buena 5 juta, lang nina perbulangen, adi bage enggo pasti pandita ndai nangkosa. Sebab kutamaken ndai idatas meja makan, kita ngenca teluna ndai man ibas meja makan e, enggo pasti ia muatca. Yahhh nggo bahaya pandita pe pinangko, nina perbulangen. Pada hal guna man bana nge ndai ateku kusalamken, tapi adi bage nge ibahanna nggo segat kel ateku, pinangko kepeken ia. Adi bage ulanai pedah kita reh-reh ku gereja gelah ietehna maka segat kel ateta ia, me nggo rugi akapna la kita reh-reh; nina ndehara. Emaka lit 3 bulan dekahna lanai ia ku gereja-gereja, la kuperpulungen ras PA-PA, tuhu-tuhu labo diatena kai pe. Ibas sada dahin lakon-lakon jumpa me pernanden e ras pandita enda. Reh nina pernanden enda nungkun man pandita enda, O pandita kuakap igejapkenndu nge maka kami la reh-reh ku gereja, PJJ, PA ras dahin-dain gerejanta si deban me?, ngaloi pandita e Ue kuja kin kena kidekah enda maka lanai pernah idah? Nina pernanden enda Situhuna segat kel ate kami kam pandita sebab asum terahir kam irumah kami nari kebenen sen kami ibas amplop lit buena 5 juta, ija asum sie kutamaken ibas meja inganta man. Uga pe kam nge muatca. Oh ue nina pandita e, asum kuidah amplop e isina sen, engkai maka murde ije ateku emaka kubuat. Kutamaken ibas Alkitabndu, adi ije kubahan uga pe idahndu nge ateku.  Sinik nari nge pernanden enda ndai, Nggo mela iakapna sebab ituduhna pandita enda pinangko. Mulih ia ku rumah minter ibukana Alkitabna ije  denga kepeken sen ndai. Lit kepeken 3 bulan dekahna keluarga enda la pernah mbuka Alkitab, la pernah ngoge kata Dibata, la pernah ertoto. Tuhu-tuhu la diatena Tuhan. Segat atena serayanNa, rikut ras segat atena Tuhan. Menyalahken, la mediate, menghujat, rsd, megati kel terjadi itengah-tengah perpulungen, enda ertina maka kalak si bage la enggo Notoken SerayanNa, tapi justru dirina saja ngenca atena itotoken dingen iperdiateken.

Selaku ngawan ni perpulungen sadar min maka serayan Tuhan e eme penjaga jiwana secara iman, si meminpin ia guna banci menang ibas erbage-bage peperangan rohani si megati jadi ibas kegeluhenna. Ija asum ia kote/lemah, sakit, erceda ate serayan Tuhan ije hadir guna mpegegehi ia. Labo hanya terjeng sie, ija sekalak serayan Tuhan tetap setia ibas notoken perpulungen e ibas tep-tep pertotonna. Serayan Tuhan mperdiateken perkembangen kinitekenna (la kenca idah-idah perpulungenna e, terdaram-daram serayan Tuhan e). Emaka selaku ngawan perpulungen iarapken tetap taat ras patuh nandangi serayan Tuhan dingen alu bagepe itotokenna serayan Tuhan ibas pertoton pribadina. Labo hanya mandangi, mengkritik, merentah ras nokohi serayan Tuhan e. Bagi sikap bangsa Israel kempak Josua  ibas pengogenta Josua 1:16-18 “asakai si ikatakenndu man kami idalanken kami”, seh maka serayan Tuhan e erdahin ia alu keriahen ukur, labo ibas ketertekanan ntah pe mengeluh.

Bagepe selaku serayan Tuhan maka sidahikenlah dahinNa guna memelihara jiwa-jiwa perpulungenNa. Aktif ibas pelayanan, ngelai alu meteruk ukur, la mesera man jumpaan, nggeluh alu bujur, la menghakimi tapi lebih cenderung mendukung ras notoken perpulungen e, nggit ngalemi (berjiwa pengampun), membaur ras ngawan e (ula mata-matan/ pandang bulu). Artina maka kita selaku serayan Tuhan Tuhan harus jadi teladan man perpulungen e. Ola ka erkiteken pandemic covid 19 enda sibahan jadi alasen lanai ndahiken dahin Tuhan. Ije ka kesempatenta guna santai, lanai idah-idah, lanai siakap kita serayan Tuhan pe, sebab lanai kebaktin minggu, lanai er PJJ lanai er PA, lanai ndahi kalak sakit rsd.  Radu radu keke dingen semangatlah kita selaku serayan Tuhan ibas situasi pandemic covid 19 enda, adi kita pe serayan e labo er PJJ, erkebaktin Minggu, uga ka perpulungen e??? Labo menahang dahin selaku serayan Tuhan, mbelin kel tanggung jawab sini ibaba. Selaku serayan Tuhan maka lit ka lah waktu pribadita ras Tuhan segelah kita pe la pernah mengalami kekeringan spiritual seh maka dahin pelayanan si jadi sada dahin rutinitasta la membosanken. Apaika adi Serayaan Tuhan ras perpulungen e teridah kiniersadaanna ras kompak. Alu bage tentuna gereja Tuhan jadi paguh. Amin

 

Pdt. Antonius Tarigan, S.Th

GBKP Rg. Lau Cih

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba