Pantun Karo Rohani II Pertua II Pdt. Rela Sembiring II Pdt. Daud Sembiring

Pantun Karo Rohani II Pertua II Pdt. Rela Sembiring II Pdt. Daud Sembiring

NDUNG-NDUNGEN (PANTUN) KARO ROHANI

“PERTUA”

 

Simesikel dat jabaten pertua eme kalak singgit erdahin

Dahin Pertua eme si mehuli kin

Berusaha ia gelah manusia terkelin

Ibahanna kai pe gelah Dibata dat pujin

 

Ibas ndahiken dahin asuhina ate sabar

Mabai kalak ku Tuhan ia mepalar

KataNa entebu ra ergegeh desken tambar

Nggit ia ermakan gelah ola Perpulungen lalar

 

Ibas dahinna nggit ia menahan diri

La ia nggit nubukisa percakapen si la risi

Ijagana kal maka ia la naik emosi

Aminna gia jumpa ia ras kalak si nggit nimbaki

 

Sekalak Pertua bicarana mehuli

Gelah la sempat penggejapen kalak mesui

Erlayas ukur perpulungen adi Pertua nuri-nuri

Sabab katana entebu desken tengguli

 

Sekalak pertua ia pertemue

La malem atena adi geluh kalak murde

Ras ise pe ergaul banci ka sue

Iapulina ka kalak si kote

 

Sekalak Pertua erdahin pe guna ngajari

Gelah pengangkan ras kiniteken Perpulungen itambahi

Megati nge jumpa la bagu ukur reh nuhsahi

Erdahin tutus labo iupahi

 

Adi Pertua la perminem-minem

Ayona siang biberna cirem

Erkiteken meritaken megati pe kurang perpedem

Tapi tetap atena malem

 

Sekalak Pertua la sikel rubat

Sabab kekelengen ibassa rurat

Mekuah atena nandangi kalak si meluat

Notoken kalak ukurna bulat

 

Sikapna teridah lemah lembut

Isimbak kalak pe la ia megelut

La pe akapna tenteng ayona la teridah berjut

Em sababna jumpa pe metahat la ia surut

 

Ijujurkenna jabuna alu pekeri gegeh

Isi jabuna nandangi Kata Dibata atena tedeh

Ngepkep Perpulungen la ia ngelabuh

Icidahkenna man kerina jelma makai a erdahin patuh

 

Idahina dahin Tuhan alu ukur meteruk

La diatena rukur bas geduk

Pusuh peratenna tuhu melemuk

Desken page sirisi teridah tungkuk

 

Sumber: Alm. Pdt. Rela Sembiring

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba