Turi-Turin Sinuria Ngembah Manuk Mbur ll Pdt. Sada Kata Ginting ll Pdt. Daud Sembiring

Turi-Turin Sinuria Ngembah Manuk Mbur

Kerna adat Ngembah Manuk Mbur enda ibahan ibas kalak Karo, lit kap ndube turi-turin sinuria, bagenda nina:

Kenca seh telu bulan jelma manusia ipetuang-tuang, ipetembe-tembe Dibata ibas bertin nandena, maka jelma manusia enggo ertempas bagi jelma manusia. Ije reh me Dibata man tinepana e, “Kai kal nge pemindonmu, maka engko nggit jadi jelma manusia”?

E reh nina tinepa Dibata e man Dibata, “Aku la nggit jadi jelma manusia”. Emaka ndekah ianeng-aneng Dibata, gelah nggit tinepana e jadi jelma manusia. Dungna nina Dibata, “Erjandi kita” kai pe pemindonmu kubere gelah nggit ko jadi jelma manusia. Jenari erpadan ka kita, maka  bicara kuga gia, mesera ntah ntabeh ibas wari terang pagi, ula kal isumpahi ko Aku, tapi sumpahilah gelah jandi pengindomu, dikune pagi la iakap ko sikap kerna kegeluhenmu.

Emaka genduari bahanlah pemindonmu, kai pe nipimu kubere, gelah nggit ko jadi manusia. Entah jadi raja atem, entah jadi penggual, entah jadi perende-rende, entah jadi pande namura, entah jadi percakap-cakap, entah jadi kalak merawa maka dat nakan, entah jadi perjuma, entah jadi kai denga sideban, gelah engko  nggit nandangi wari terang ndai.”

Jenari nina ka Dibata man tinepana, “Bagenda kerna perjabun, entah mesera iakap ko muat empon, entah mesunah, entah empo la erngadi-ngadi, entah la enggo pernah mbalu, ntah mbalu la erngadi-ngadi, entah la enggo pernah mante anak, entah mate anak la erngadi-ngadi. Entah mesera muat nakan pagi rebi. Entah la pernah latih ku juma reh rusur nakan man pangan. Enta jadi permakan melala lembu ras kerbo man permakanen, las la tampil las, udan la tampil udan, embari nge rusur asuh-asuhen gelah ola ku juma kalak.

Kerna umur, banci ndekah ngiani wari terang, cawir metua ras nggawer-nggawer abu, entah mate danak-danak, entah mante nguda anak perana.

Melala atem beras iraukmu man belanjam ibas wari terang ndai, entah sitik saja ijemput ko pe banci, kubere nge, mbue ras sitek atem dorek nge.

Ije ituriken Dibata me kai siman pindon jelma manusia, janah kuga senangna ras kuga serana tep-tep jabaten sinijabat ibas kegeluhen. Emaka pemindon jelma lain-lain kerina. Sada pe la seri. Rukur jelma ibas bertin ndai e, “Adi bage, kai kal nge kupindo lako jabat-jabatenku ibas kegeluhen, janah si kuga nge kupindo kegeluhenku?”

Reh nina Dibata ka, “Ola simesera pindoko, ola simetahat muat nakan, pilih gelah sideban, rukur ko seh bulan si reh, ije kusungkun ka ko, kai pemindonmu, bahan pemindonmu si terulin.” “Ue”, nina sinitepa ibas bertin e.

Bulan sirehna, bulan peempatken reh nina Dibata, “Kuga enggo me iukurken ko, maka bage denggo geluhku kupindo atem kidekah sebulan enda? Entah jadi kalak bayak, entah jadi raja mbelin, entah jadi puanglima, entah jadi perjuma?

Emaka lit deba isambarina pemindonna, lit deba la isambarina. Ituriken Dibata ka kuga serana denggo, adi la mejile pengindo, nina, “Rukur ka ko seh ngayak bulan sireh, pekena pemindonmu, sebab mesera kal nggeluh adi la mejile pengindo, Aku denggo isumpahi ko, emaka gelah ola Aku isumpahi ko, ban gelah mejile pemindonmu.”

Bagem reh Dibata teptep bulan ndahi tinepana, seh enggo siwah bulan bas bertin, seh inganna pe enggo ibas ingan nandangi berkat ngidah wari terang ndai. Emaka nina Dibata pepitukaliken, Lanai ndekahsa engko ngidah wari terang, emaka bahan pemindonmu e, erjandi kita, maka adi mesera akap ko nggeluh pagi maka ola kal Aku isumpahiko, tapi sumpahilah gelah padan pengindom ras janji padanmu. Sebab adi Aku, kai kal pe ipindo ko kubereken nge. Si entabeh ras si mesera, apai pe kubere nge janah adi kentisik atem nggeluh ngidah terang ndai, sitik jemput beras si kubereken enda. Adi atem ndekah nggeluh mbue kal rauk beras sikubereken, asa kai atem, banci nge ibuatko man bekalmu ibas wari terang.”

Turiken dage pemindonmu sekali nari. Pemindonmu si arah lebe si la akapko merandal banci nge simasapken, tapi pemindonmu sisekali enda adi kari enggo kusuratken, lanai banci imasapken, sebab eme babanmu ku wari terang, janah e me pagi ngikut-ngikut si lalap asa dekahna engko ngidah wari terang.

Emaka ibahanna pemindonna man Dibata, si jadi jandi padan ras pengindo. Kerina isuratken Dibata ibas dagingna. Ibas tapak-tapak tanna isuratken Dibata kerna lako jabatna, entah ia jadi raja, entah ia jadi guru, entah ia jadi perbinaga, entah ia jadi penggual, entah ia jadi permakan, entah ia jadi sidebanna. Ibas perdempakenna isuratken Dibata, entah ia jadi kalak beluh rukur, entah pinter-pinter saja, entah kin ia kalak murbit ras sidebanna. Bage pe isuratken kuga akapna pagitna nggeluh ibas wari terang enda, ras uga tabehna. Ibas biberna isuratken Dibata kerna medurma ras sianceng rusur ngerana, kerna entabeh usur ipanna ras la entabeh ipanna. Ibas kurumna pe isuratken kerna ndehar usur rejekina tah lang. ibas matana isuratken kerna pengenehenen ndauh tah ndeher kerna sada-sada kejadin. Ibas tapak-tapak nahena isuratken kerna kalak perdalanna ndauh sinigelari perlajang, janah ije isuratken kerna kalak permbalu.

Tambah-tambah sie ibahan Dibata man bana sibar-sibar jelma mesera ras mesunah akapna muat belanjana nggeluh enda. Adi mesera pindona muat nakan, maka sibar-sibarna ngayak isang kal ibahan Dibata, sigedang-gedang ia ngidah wari terang tapi mesera ia muat nakan. Adi kin pengindona ntabeh rusur man pangan maka sibar-sibarna ibereken Dibata, ngayak babah, sebab adi bage uga serana pe muat duit, aminna ibas tutupen pe ntabeh nge lalap panganna, tapi terjeng pangan nge ngenca. Adi kin nganggeh-nganggeh duit melala ipindona, maka sibar-sibar ngayak igung kal nge ngenca ibereken Dibata. Adi kin ngenen-nen duit pemindonna sibar-sibar ngayak mata ngenca. Tapi adi pemindonna mbue kebayaken, kalak sierjujung kebayaken, maka ibereken Dibata sibar-sibarna seh ngayak bukna  I takal.

Kenca enggo keri pemindonna, keri enggo isuratken Dibata ibas batang dagingna, emaka  nina Dibata, “Genduari jemput tah rauk dage beras sikubereken enda man bekalmu ibas wari terang.”

Emaka ijemput entah irauk tinepa e. Jenari nina Dibata “Ngikutken pemindonmu, maka kubereken enda sukat-sukat nggeluh, keris-keris babo sukat-sukat, gunana gelah keris-kerisna, la banci lebih asakai sinjpindo ko e, la banci la banci kurang.”

Kenca dung kerina jandi, padan pengindo, surat isuratken Dibata, sukat-sukat ras keris-keris iberekenna, itamakenna bas kula jelma sinitepana e, emaka nina Dibata, “Genduari banci ko lawes nandangi wari terang, perlawesmu e pagi kerina ngikutken pemindonmu, ije pe nandaken kuga kegeluhenmu ibas wari terang.”

Emaka tubuh me anak tinepa Dibata e.

Bagem nina turi-turin enda, janah Kalimbubu me niakap simewakili Dibata simada tinuang ngiket jandi sienggo ipindo manusia sinibas bertin enda denga ku Dibata. Emaka reh me Kalimbubu ku jabu sinatang tuah enda.

(Sumber buku: Pdt. Sada Kata Ginting, M.Th, Ranan Adat)