Suplemen Khotbah, 13 September 2020 ll Jadilah Laskar Kristus ll Pdt. Jerri Karlo Tarigan, S.Th

Invocatio             : “ Ibas Tahun pewaluhken kenca Josia jadi Raja, tupung ia nguda denga kal, ia mulai nembah man Dibata nini-ninina Raja Daud” (2 Kro. 34:3a).

Ogen                     : Masmur 119:9-16

Khotbah              : 2 Timotius 2:1-5

Tema                    : Jadilah Laskar Kristus Si Tutus!

_______________________

PEMBAHASEN NATS

Lit nina lagu anak sekolah Minggu saya bukan pasukan berkuda, pasukan berjalan, pasukan menembak, saya tidak menembaki musuh, tapi saya laskar Kristus. Arti kata Laskar dalam KBBI eme Pasukan, serdadu, tentara atau bahasa inggris  ‘Army’, ibas negarata akhir-akhir enda usur sibegi kata laskar terutama ibas agama tetanggata nari. Tetapi megati siipertontonken laskar-laskar agama tetanggata ndai eme soal kekerasen, anarkisme, rsd.  Janah lit ka lagu erjudul ‘Laskar Cinta’ ciptaan Group Band Dewa 19. Emaka adi banci sisimpulken Laskar enda ertina sekalak ntah kelompok sierjuang demi memihak kai si jadi usihen, hormatina atau siagungkenna. Emaka ibas paksa enda renungenta ngangkat tema kerna Laskar Krsitus si Tutus, mari ras-ras kita mpebagesi pengangkanta kerna si e.

Masmur 119 enda nuriken kerna pemahamen pemasmur kerna undang-undang Dibata. Menaken ayat 1- 176 pemasmur nuriken uga pentingna undang-undang Tuhan e man bana. Undang-undang Tuhan e seh kal pentingna man bana. Engkai? Erkiteken e menyangkut dirina jine, menyangkut keselamatenna, kiniulin geluhna. Iturikenna pe alu jelas: Adi kerina undang-undangNdu kuperdiateken, emaka la aku ijuruken (ay. 6), Kuga banci anak perana njagai geluhna maka la erpandangen? Eme alu ngikutken kataNdu (ay. 9), Bahan maka kuerti dingen kupatuhi undang-undangNdu, sebab ibas matuhisa dat aku kemalemen ate (ay. 35), Ibas ngikutken perentahNdu jumpa aku kemalemen ate (ay. 47), O Tuhan, kuinget undang-undangNdu …, emaka terapul aku (ay. 52). Tentuna enda reh arah pengalamen pemasmur nari. Adi rembak ia ras undang-undang Dibata maka jumpasa kemalemen ate, perdalanna la lalar, ras dikune jumpa ia perbeben datsa pengapul ibas undang-undang Tuhan nari. Alu kesimpulen si gendek, itehna kai gunana kata Dibata e man bana, man geluhna ras man masa depanna. Emaka la kita heran ibas ayat 57-64 (si jadi bahan perikopta) teridah uga kal ngenana atena nangdangi Tuhan ras Undang-undang Tuhan e.

Ibas invocatio teridah kiniteken raja Josia anem gia ia nguda denga tapi nggit nembah man Dibata, selaku si merentah rayat Juda icidahkenna contoh simehuli. Bagepe Timotius selaku kalak singuda denga isingetken ibas pustaka si Badia uga kerna kepatuhenna man Tuhan, gia ia nguda tapi baci jadi usihen sikap geluhna. Ibas suratna sipeduaken man Timotius Paulus lit ibas situasi sipaksana lit ibas perbeben (itaban) janah ieteh Paulus pe maka lanai bo ndekah ia iukum mate (2 Tim. 4:16-17)  janah teman-teman si selama enda ras ia piga-piga  nggo nadingken ia, ibas situasi si berkecamuk enda ingetna temanna si Timotius sipaksana melayani, ‘anak rohani’ Paulus sicukup semangat melayani anim gia iyakini ras ieteh Paulus si Timotius enda pe pasti ndatken melala tantangen bagi si alamina e. Ayat 1 Paulus negasken man Timotius bahwa lias ate Dibata nge simpegegehi, gelah ola sempat kote Timotius amin gia reh melala perbeben. Lias ate Dibata enda baci igejapken erkiteken persadan ras Kristus Jesus. Persadaan ras Kristus eme jadi senjata ampuh guna jadi sekalak laskar (pejuang) Kristus, labo angkat pedang atau senjata tajam, tapi kata Dibata nge simenangken kita ibas erbage tantangen geluh, janah enda perlu latihen si tutus la banci setengah hati, desken sekalak si ikut ibas perlumban adi atena kin menang arus latihen tutus ras patuh man peraturen si lit  (bnd. Ayat 5) la  rate-ate. Janah gelah murni perjuangen sekalak laskar Kristus ula min sempat icampuri alu kepentingen Doni, gelah ngena ate Dibata (komandan) kai sibahan kita enda (bnd. Ayat 4).

PENGKENAINA

Temata ibas Minggu enda Laskar Kristus si Tutus, negasken man banta kerina bahwa kita enda me tentera Dibata sierjuang guna ngelawan Dosa ras nehken sura-suraNa ibas Doni enda, ibas kita erjuang senjatata e me Kata Dibata, emaka perjuangenta enda dem alu keleng ate labo kekerasen, ras dem ate perkuah. Ibas minggu enda sekaligus bengket kubas minggu Permata, anak-anak Permata itengah-tengah gerejanta enda perlu kal simaksimalken kiningudanna. sibereken ia ruang guna ncidahken kiniteken ras keaktifenna i tengah-tengah Gereja seh maka teridah ia itengah-tengah gerejanta banci mewarnai arah sisi semangat orang muda. Tugas orang tua guna mereken pendampingan, pengajaren ras dorongen bagepe motivasi man Permata seh maka permata e pe banci jadi laskar Kristus si tutus gia nguda denga. Bagi kai sibahan Paulus man Timotius, tetap ipegegehi ras imotivasina ia. Orang-orang muda khususna Permata sigenduari, melala kel tantangen siihadapina. tantangen secara Global, pendidikan, pergaulen, pendahin, seh pe ibas milih teman geluh, ula pediat terbuang masa muda ndu menyerah ibas perbeben atau hanyut alu hal-hal si la erguna tapi pakekenlah kiningudanndu ibas ngalaken tantangen-tantangen geluh alu cara si benar, emaka sijadi pergegeh ibas kam pakelah kata Dibata.

Selamat HUT PERMATA 72 TAHUN.

                                                                                                                 Pdt. Jerri Karlo Tarigan, S.Th