Suplemen Khotbah Minggu II 06 September 2020 ll Minggu Budaya II Jesus Ngelayasi Adat ll Pdt. Eben Eser Depari, M.Th

Suplemen Khotbah Minggu II 06 September 2020 ll Minggu Budaya II Jesus Ngelayasi Adat ll Pdt. Eben Eser Depari, M.Th

Minggu, 06 September 2020

Invocatio       : Dage sirayakenlah pestanta, labo alu roti si lit ije ragi sindekah – ragi dosa dingen

kejahaten – tapi alu roti si la itama ragi, alu biak si bersih dingen benar.” (1 Kor 5: 8).

Ogen              : Job 52 : 7 – 11

Khotbah       :  Johanes 2 : 1 – 12

Thema : “Jesus Ngelayasi Adat”

_________________________

Shalom man banta kerina. Adi si nen ibas Kamus Besar Bahasa Indonesia, secara sederhana Adat eme aturen, kebiasaan ntah pe cara si nggo biasa ilakoken gel-gel nari si iterusken seh gundari janah menjadi kebiasaan. Ija wujudna merupaken buah perukuren si isina  eme  nilai-nilai budaya, norma, hukum, bage pe aturen sada ras sidebanna si erkawiten sehingga membentuk sada sistem. Bage pe kalak Karo, lit ka aturen si mengatur kegeluhenna si iterusken jadi man ikuten bas kegeluhenna secara pribadi bagepe komunitasna.

Adi sinen telu bagin Pustaka si Badia sijadi palas khotbah paksa enda, maka kepeken budaya siilakoken masyarakat bas zaman nats enda, lit perserina ras budaya ntah adat siilakoken kita paksa enda eme litna pesta ntah kerja-kerja ija bagi isenaken ibas Johanes 2 : 1 – 12 kerna kerja erdemu bayu i kuta Kana bagepe ibas invocatio 1 Korinti 5 : 8.  Ibas invocatio isingetken kerna uga arusna kalak Kristen e ngelakoken pesta eme alu la lit ije dosa ras kejahaten tapi alu biak si bersih ras benar. Sabab mawen bas keriahen e, banci la isadari enggo lit ije ilakoken hal-hal si la sentudu ras sura-sura Dibata ija tentuna siinget alasen Jop maka tep-tep kali anak-anakna dung ngelakoken pesta, lampas erpagi-pagi isehkenna persembahen tutungen man Tuhan guna pebadiaken anak-anakna  e sabab rukur ia, banci saja sanga ia pulung ras-ras ermeriah-meriah bas pesta e, enggo ilakokenna dosa si la teridah si mahanca ceda ukur Dibata alu la iarapna (Jop 1 : 4 – 5).

Tentuna bagem kita bas paksa enda pe, ibas ngelakoken budaya ntah adatta, perlu kal kita metenget segelah ula sempat siakap denga budaya ntah adat, kepeken enggo singgur ibas kiniteken ntah kepercayaan sindekah. Em sababna maka gerejanta umpamana ngelarang kita erban acara perumah begu, ngerana man kalak si enggo mate sabab situhuna bage sesekalak mate, maka si tading e terjeng kulana nari ngenca sindube ijadiken Dibata ibas abu taneh nari si labo meteh kai nari pe. Sedangken tendina, bage ia mate ije me enggo seh ku ingan pengadi-ngadinna sementara siigelari doni kematen nimai-nimai pendungi zaman eme kerehen Tuhan Jesus sipeduakaliken. Emaka labo pas adi ngerana kita man sada benda ntah sesuatu si sama sekali labo banci ngaloi kita, si labo meteh kai pe siibelasken kita e. Bagepe secara roh, e banci imanfaatken kuasa kegelapen nalihken rupana tempa-tempa ras manusia denga kita padahal situhuna setan iblis nge sireh e. Tanggung jawabta selaku kalak sienggo ipelimbarui Dibata kegeluhenta ngelayasi adatta segelah bas sura-suranta erbahan ras nehken si mehuli e, tetap sendalanen ras sura-sura Dibata.

Ibas ogen Jop 42 : 7 – 11 teridah  hal si semal ka si lakoken ibas budayanta eme erbahan purpursage – sialem-alemen salah bas lit salah lepak enggo ilakoken (ayat 8 – 9). Bagi teman-teman Jop eme Elipas, Bildat ras Sopar nggit ngakui kelepakenna jenari mindo maaf man Jop, bagelah min kita pe arus nggit ngakui adi lit kin salahta jenari mindo maaf dingen sialemen-alemen gelah ula sempat ceda perkade-kadenta. Janah bagi Jop jine pe, la saja ngalo-ngalo ras ngalemi salah teman-temanna e, tapi ia pe ertoto  guna temanna si telu e mahanca senang mulihi geluhna kerina erkiteken enggo terjadi rekonsiliasi – pemulihen hubungen antara sada ras sidebanna. Bagem pe kita, arus ngasup ngalo-ngalo temanta, sangkep geluhta bas atena ngakui salahna e bahkan notokenca gia pernah ceda ukurta ibahanna.

Ibas ayat 11 ogenta enda pe teridah kesemalen si ndube usur si lakoken bas budayanta eme ngeripe – persada gegeh guna nampati temanta, keluarganta, sangkep geluhta si lit bas kepiceten. Bas litna ngeripe eme maka gel-gel nari la lit kerja kalak Karo la tembe – la erkedungen sabab bas lit si kurang e, ipersada keluarga – sangkep geluh gegehna nutupisa emaka la teridah la lit bas si erkerja e.  Tentuna enda sada budaya si mehuli kal guna silakoken gelah persadanta pe tetap nteguh, si kote epe ipegegehi seh maka la teridah kurang bas ia. Em hakekat ersenina – erturang – ersangkep geluh eme lako nggeluh sikeleng-kelengen, si sampat-sampaten, si tatang-tatangen segelah kerina radu megegeh ras ermeriah ukur. Emaka bas kalak Karo, penting kal SIMA_SIMA ntah sangkep nggeluh ija kita tading seh maka lit istilah “Perkade-kaden 12 + 1” ija si sada e eme  jiran tetangga ntah sebaleng rumah, teman sada lingkungen, sada arisen ntah STM, teman sada gereja, teman erdahin, bahkan teman engkawil, sada kedai kopi, rsd. Adi bas gerejanta, persada gegeh perpulungen si enterem e lako ngelitken siiperluken eme siigelari lelang-lelang, janji iman, rsd eme gelah terpepulung siiarapken pulung bagi prinsip “Dat-dat sitik nina Pua” ntah bagi nina perpola, “Tak-tak lau pola e ipepulung-pulung mahanca dem sada tongkap”.

Ibas Johanes 2 : 1- 12  ituriken kerna Kerja Erdemu bayu i kuta Kana, maka kerehen Tuhan Jesus ku kerja e ncidahken Jesus ngergai adat si lit. Hal si man usihen ijenda maka kerehen kalak ku kerja e siiwakili Maria ras Jesus labo ncedai keriahen pesta e ntah mahanca gulut – ceda ukur simada kerja e termasuk bas lit kekurangenna eme enggo keri la anggur (ayat 3) tapi justru lako mahanca mehaga – la teridah lit kekurangen si erkerja e seh maka sukut si erkerja e mujiken si empo erkiteken hal si erbeda si mehuli “siilakokenna” bas kerja e eme terus menerus ngelaken anggur si mehulina man kalak sireh padahal biasana bas kerja sibage rupana tangtangna nge ielaken anggur si mehulina, jenari reh dekahna pesta e berlangsung, kenca enggo puas kerina temue e minem lau anggur, reh urakna kualitas anggur siielakenna eme anggur si biasa (ayat 9).

Pdt. Prof. Gerrit Singgih pernah ngataken, “Dalam budaya Timur, yang paling kental adalah rasa malu”. Ketika manusia berbuat dosa, yang paling berat bagi mereka bukan rasa bersalah tetapi rasa malu sehingga mereka bukannya mengakui dosa yang telah mereka perbuat tetapi bersembunyi dari Allah karena malu di dalam ketelanjangan mereka. Guna nutupi rasa melana e kap maka isemitna bulung ara man gonjena tapi dungna ibahan Dibata kulit rubia-rubia man gonje kalak enda. Bas kalak Karo pe MELA e mbelin kal emaka ula kal sempat ia ipermelaken i lebe-lebe jelma si enterem, terlebih bas acara peradaten siilakokenna. Bas dampar sideban guna mereken memotivasi geluh lit kuan-kuan nina, “Ermalu-malu nggeluh enda”.

Tentuna bagem kita pe, kerehenta kubas dahin-dahin adat siilakoken, ula min terjeng ndarami ntah pebelin kekurangen si lit bas kerja e. Tapi oratna kita min nutupi kekurangen si lit gelah tetap mehaga si erkerja e. Bagepe ula kal erkiteken pengerananta – pengidointa ntah sekali gia payo kal si arah kita e mahanca ipermelaken si erkerja e – juru kerja e.  Erlajar kita bagi Maria, Jesus ras serayan bas kerja e ija kalak enda menjadi orang-orang yang tidak terlihat ibas “nelamatken” kerja e (ayat 9). La pe ia ipujiken, labo akapna dalih segelah kerja e tetap erdalan alu mehuli – si erkerja epe tetap mehaga  sabab bagi isuratken ibas undangen kerja-kerjanta pe maka kita itenahken lako petunggungken ras pehagaken kerja e. Emaka kai si mahanca tetap mehaga ras erdalan alu mehuli dahin-dahin peradaten siihadiri kita, e lah si darami ras silakoken. Alu bage meriah ukurta kerina, Tuhan Dibata pe tetap terpuji.

 

Pdt. Eben Eser Depari, M.Th

Share this post

Leave a Reply

Your email address will not be published. Required fields are marked *


Kami sedang meningkatkan kualitas pelayanan kami, jangan sungkan untuk mencoba fitur chat botnya ya, Infoin kami ya supaya chat botnya semakin canggih. Selamat Mencoba