Pantun Karo ll Merga Kalak Karo ll Pdt. Daud Sembiring

 KARO MERGANA

Biak Karo Mergana Bagi pantun arah enda:

Sabah Nageri paksa ngeroro

Aron ku juma ras-ras maba nakan

Sipat mehuli merga karo-karo

Usur pakena kuan-kuan isi bohan

              Buat kulit tama kapurna

              Gelah itutung muat minakna

              Lit pinakit Karo Mergana

              Adi la erduit mesui takalna

Biak Beru Karo, bagi pantun enda:

Kaliceket dalin ku sapo

Kena baju man tantangen

Tersinget pertandang Beru Karo

Beluh nandangi si man tandangen

 

GINTING MERGANA

Biak kalak Ginting teridah arah pantun enda:

Ku tukur bayam serenting

Santan ni pereh tama ku belanga

Enda me sifat merga Ginting

Megegeh, tapi la pet ngerana

 

Biak Beru Ginting eme:

Meherga kal sikuning gersing

Meratah kap jine rupa bulungna

Lain ka tuhu si beru Ginting

Elah kenca man maka nggiling lacina

 

 TARIGAN MERGANA

Biak kalak Tarigan bagi pantun enda:

Ku suanken batang galiman

I tengah rih ndube turahna

Kuan-kuan man kalak Tarigan

Ralih-alih perbahanenna

           Galang sengawan perjukjuk mbertik

           Mbertik I gul eras bungke rimbang

           Merga Tarigan perotik-otik

           Bage ka pe perombang-ombang

 

Biak Beru Tarigan, bagi pantun enda:

Ku putikken bulung surindan

Naktaken kuidah duruhna

Terberita beru Tarigan

Erpengagak nina jelmana

 

SEMBIRING MERGANA

Biak Sembiring morgana, tersena arah pantun enda:

Melala ling-ling siganjang-ganjangen

Kelbungna ka pe sibagesen

Sembiring pe sibiring-biringen

Sapih ia pe sibuaten

 

Biak beru Sembiring, tersena bagi pantun enda:

Metenget erdahin maka la guling

Tingkahken saja uga payona

Tersinget nina beru Sembiring

Melias ras merawa ia punana

 

PERANGIN-ANGIN MERGANA

Biak kalak Perangin-Angin bagi pantun enda:

Pasar baru ingan nepa kudin

Dahna tutu ula min marpar

Adi merga Perangin-angin

Ukurna bagi perpucuk sanggar

 

Biak beru Perangin-angin

Marpar cingkeru i Pernantin

Pumahi sitik ibaba ku Tigabinanga

Adi turang beru Perangin-angin

Soal metik nomor sadana

 

(disadur dari informasi lisan dan tulisan beragam sumber)

disarikan oleh: Pdt. Daud Sembiring